2 ROHTHÜP 36 - AMÜSA BAIBEL (BSI)

Juda la Yangthsaba Joahaz

¹ Judarünü Josiah tsurü Joahaz tsü throcheh, müyühjü Jerusalem la yangthsaba kangsohcho.

² Joahaz tsü Juda la yangthsaba kangde kang mükyüpü asang licho, ko abinü Jerusalem la choo asang yangthsacho.

³ Ijip yangthsaba Neko-nü abi rang tsicho ko abi khyang Judarünü akhüm taripi süreh, hajar asang thsih müyü, ko hon süreh sangrepü müyü jüsohcho.

⁴ Neko-nü Joahaz ani Eliakim tsü Juda la yangthsaba kangsohcho ko aneng Jehoiakim mülijücho. Joahaz tsü Neko-nü Ijip lang notsicho.

Juda la Yangthsaba Jehoiakim

⁵ Jehoiakim tsü Juda la yangthsaba kangde kang mükyüpü münga licho ko abinü Jerusalem la kang dhürekheh yangthsacho. Abinü Abüdongba abi Tsingrang nyüm amünyi shitpahcho.

⁶ Babylon yangthsaba Nebukadnezar-nü Juda mahcho, Jehoiakim rangcho ko Babylon lang ixilihnü rahpü notsicho.

⁷ Nebukadnezar-nü Amübükuh lanü kuthsi khürü zang hiwü Babylon la abi kuh la yohpücho.

⁸ Jehoiakim-nü athrünyinungkeh nguchicho ko amünyi shitpahcho tsü Israel ko Juda yangthsarüti yukheh la thrahyoh lile. Atsurü Jehoiakhin tsü abi mülih yangthsaba kangcho.

Juda la Yangthsaba Jehoiakhin

⁹ Jehoiakhin tsü Juda la yangthsaba kangde abi kang dhürekeh licho ko abinü Jerusalem la choo asangpü nyümong dhüre yangthsacho. Abinüsü Abüdongba nyüm amünyi shitpahcho.

¹⁰ Khode chisi kyang chihcho, yangthsaba Nebukadnezar-nü Babylon lang Jehoiakhin tsü rang notsicho ko Amübükuh la kuthsi zang hitsicho. Hütsüpü Nebukadnezar-nü Jehoiakhin au azaba Jerusalem la yangthsaba kangsohcho.

Juda la Yangthsaba Zedekia

¹¹ Zedekia tsü Juda la yangthsaba kangde abi kang mükyüpü kheh licho ko abinü Jerusalem la kang dhürekheh yangthsacho.

¹² Abinü Abüdongba nyüm amünyi shitpahcho ko abi te Abüdongba yu choba azikehrü Jeremia yu münyicho.

Jerusalem Khülucho

¹³ Zedekia-nü yangthsaba Nebukadnezar nyüm yacho, sünü abi pohki lisohnung khing Tsingrangba nengla nyengchosohcho. Abinü lasih thsamüla Abüdongba, Israel Tsingrang yang ronung hongzicho.

¹⁴ Hütsüchah lahkeh, Juda langnürüti, bebürü ko müyurünü arüh mükangmüshü liba yuchoti iithsa kyothri mübü, Abüdongba apunü Amüsa kangsohba Amübükuh münyisohcho.

¹⁵ Abüdongba, arüh jümürü Tsingrang-nü mütozah apu müyurü müzahsohnung azikehrüti müthehcho, tunüo Abinü arüh ko Amübükuh rikinyücho.

¹⁶ Ta arühnü Tsingrangba yusi hirü mükhimüngucho ko Abi yu layü pehjü ko Abi azikehrü müthsanyüjücho khu, achangkathsa arüh chah Tsingrangba rihlong chüroba lanü arüh süsü mütsichehcho.

¹⁷ Achotsü Abüdongba-nü arüh mahnung Babylon yangthsaba norocho. Yangthsabanü Judarü dhrezarü Amübükuh lanü mii kyüsehcho. Abinü azarü azirü, khingkurü adhrerü, ko dhsangnangrü ko tsayengrü sü chahsü yanglilüm müngucho, Tsingrangba-nü arüh apüm abi kheh la jücho.

¹⁸ Babylon yangthsabanü Amübükuh lanü kuthsi, yangthsaba ko abi pohki thsazirüti kuthsi lüpcho zang Babylon lang hitsicho.

¹⁹ Abinü yangdi, Amübükuh ko yangthsaba kuh ko kuthsi apüm trüp-pehjücho ko yangdi tbü thsangnyangjücho.

²⁰ Abinü anyingcho apüm Babylon lang notsicho, hütsüla Persia yanglih müchürode arühnü abi ko abi shümtsurü ayurü kang dikehcho.

²¹ Hütsüta azikehrü Jeremia khu Abüdongba-nü choyohcho tikehcho: “Sabath nyümong mümung rocho pisasohnung alih tsü kang nyühre pehjü jonung.”

Cyrus-nü Jihudarü Thalisohcho

²² Persia yangthsaba Cyrus akhudiba kang, Abüdongba-nü azikehrü Jeremia khu yocho tikehsohcho. Yuzeng khüdu abi yanglih apümlang thrahpü jünung ko yuva chüro khisohnung yuzeng Cyrus khyang jüsohnung Abüdongba-nü abi thsüchicho:

²³ “Persia yangthsaba Cyrus yuzeng tsü hi: Abüdongba, Ning Tsingrang-nü Ih limih apüm yangthsaba kangsohko ko abi khyang Juda lih Jerusalem la Amübükuh khüdu thsajünung bhamüling nyümkehjüko. Ade, nührü Tsingrangba müyurü apüm, hütsülang püte ko Abüdongba nührü Tsingrang nührü te lieng.”