2 ROHTHÜP 35 - AMÜSA BAIBEL (BSI)

Josiah-nü Phungkhu Thsüti Mungcho

¹ Yangthsaba Josiah-nü Abüdongba nengla Jerusalem la Phungkhu Thsüti mungcho; akhudiba choo dhüremüyüu nyümong arühnü thsüti nengdang kanglungrü tsü müpsehcho.

² Abinü bebürüti khyang amübükuh la arüh nguchi changtajücho ko arüh te tsa nguchinung nyümchi yocho.

³ Abinü Abüdongba khyang müsacheh jürü Levirü ko Israel adorüti tesü athülaba hiroh-i jücho: “David tsurü yangthsaba Solomon-nü thsaba Amübükuh la tsü Amüsa Yuzeng Singdi tsü yohpüng. Adelü nührünü dhimüchi hichi mürachinung, ta nührünü Abüdongba nührü Tsingrang ko Israelrü dikehnung.

⁴ Yangthsaba David ko atsurü Solomon nyühnü changnah jücho kyo, amübükuh la tsü atsutpu tsutpunü püm,

⁵ ko Israelrü nührü khürünülü kukhi müipi rükuchehnungthsa nührü jangjang müshoung.

⁶ Phungkhu Thsüti nengdang nührünü sanza ko miza müpsehnung. Hütsüeko Abüdongba-nü Mosa khu jüba athülaba tsü ajünirü Israelrünü iithsachehnungthsa, nührü jangjang ayah müsa müsachehng.”

⁷ Phungkhu Thsütila bichinung nengdang, yangthsaba Josiah-nü apu yo lanü kanglungrü san, sanza, mizaza hajar sangre ko misüpung hajar asang jücho.

⁸ Müyurü, bebürü ko Levirü dhsütahla bichinung abi pohki thsazirüti nüsü amübü jücho. Ko Amübükuh xükümba adiuba, Hilkia, Amungthriba bebürü Zekaria ko Jehielrü nüsü bebürüti khyang sanza ko mizaza hajar anyüpü thsih dhüroh, ko thsüti shikhe kangmübü nengdang misüpung thsih asang jücho.

⁹ Levirü langnürü, Konania, Shemaia ko abi ani Nethanel, Hashabia, Jeiel ko Jozabad-rünü kangmübü jüsohnung Levirü khyang sanza ko mizaza hajar münga, ko misüpung thsih münga jücho.

¹⁰ Khode Phungkhu Thsüti nengdang lüpcho küdangcho, yangthsabanü yuzengjücho kyo, bebürü ko Levirünü arüh palu nguchila yacho.

¹¹ San ko miza tsü müpsehpü khanglang, Levirünü aküp khohcho ko bebürünü bholu chah ashüh tsü xahkehcho.

¹² Hütsüpü arühnü Mosa yuzeng la yocho roh-i mübüchehnungthsa, trüp mübü nengdang kanglungrü tsü kukhi mülung aichi changtacho.

¹³ Yuzeng roh-i tsü Phungkhu Thsüti kangmübü tsü Levirünü michang la mürecho ko Amüsa mübü füh, kürafüh ko aruhfüh lanü chongnung ko müyurü khyang shuh tsü zahzah chahla jünung.

¹⁴ Hütsüta nguchipü khanglang, Levirünü arühbürü ko Aron trah bebürü nengdang shuh khyücheh yohpünung, tunüo bebürü tsü üpümshünü ko asu kangmübü jücho kanglungrü tsü trüpnü ama yingcheh müdeng licho.

¹⁵ Asaf tsü khithsarü Levirü hiri tsü yangthsaba David-nü thülacho arüh palu müdümla licho: Asaf, Heman ko yangthsaba azikehrü Jeduthun. Amübükuh la anyahrütilü arüh nguchi pehjünung müdhsütahcho, tunüo arüh nengdang aparü Levirünü thsüti tsü rungnümjücho.

¹⁶ Hütsüta, yangthsaba Josiah-nü mülacho kyo, Abüdongba mübünung, Phungkhu Thsüti mungnung ko bholu chah trüp mübü mübünung, hütsü nyümong lüpcho küdangcho.

¹⁷ Hütsüla roba Israelrü apümnü nyümong dhünyeh Phungkhu Thsüti ko bhüpza müyohba hüm thsüti tsu mungcho.

¹⁸ Azikehrü Samuel nyümong lanü, hi kyo Phungkhu Thsüti khodesü mümungdhing. Akhulang yangthsarü sünüsü yangthsaba Josiah, bebürü, Levirü ko Judarü, Israelrü ko Jerusalemrünü

¹⁹ Josiah yangthsathsacho kang dhürekeula Phungkhu Thsüti mungcho hi kyo mümungdhing.

Josiah Yangthsathsacho

²⁰ Yangthsaba Josiah-nü Amübükuh nengdang hiri apüm nguchipü khanglang, Ijip yangthsaba Neko-nü rothsarü nüpü Eufrates Yongkhi te Karkemish la khatanung rocho.

²¹ Josiah-nü abi yatinung müküpcho, ta Josiah yang Neko-nü yusi hita müthehcho: “Juda yangthsaba, Ihnü hi nüte khatarü mah. Ih nüte khatanung müro, ta I rorüh te khatanung rocho ko Tsingrangba-nü Ite dhsüdhsanung yoko. Tsingrangba I lahpi lile, hütsüeko Ih tüyati, mahkhang abinü nüh changjünung.”

²² Ta Josiah-nü khatanung dhrongchehcho. Yangthsaba Neko khu Tsingrangba-nü yocho abinü münyicho ko abinü tsah thrimülapü Megido Ngah la chitanung wücho.

²³ Chitala tsü Ijiprü tbüdengnü yangthsaba Josiah chah kyacho. Abinü abi kuliba te yocho, “Ih notsieng; Ih dee khee dhsakehko.”

²⁴ Arühnü abi kuri akhüluba lanü dhikeh hiwü anyüuba kuri akhüluba la dhikehcho ko Jerusalem lang hiwücho. Hütsüla abi sücho ko yangthsarü kong la abi dhrürangcho. Judarü ko Jerusalemrü apümnü abi meshücho.

²⁵ Azikehrü Jeremia-nü yangthsaba Josiah meshü khi khüdu tangcho. Hütsü Israel la khithsarü khingkurü adhrerü apüm nengdang meshüde thsasing khi kangcho. Hiba khi tsü meshü khi vakhala ngunung.

²⁶ Josiah-nü nguchicho apüm abinü Abüdongba mübücho, Yuzeng te yochonyicho,

²⁷ ko abi Yukheh adikehlanü achangka chii, Israel ko Juda yangthsarüti yukheh la thrahyoh lile.