2 ROHTHÜP 30 - AMÜSA BAIBEL (BSI)

Phungkhu Thsüti Rungnümcho

^1-3 Müyurünü Phungkhu Thsüti tsü akhudiba choo bechola mükhyüchehcho, tunüo ayahnü müsachehrü bebürü kükyo mülicho ko Jerusalem la müyurü adrong müshibülungcho. Achotsü yangthsaba Hezekia, abi thsazirüti ko Jerusalem la lirünü anyüuba choo la mungnung betrümcho. Yangthsabanü Jerusalem ko Judarü apüm yang yu jücho. Abinü Efraim ko Manaserü Abüdongba Israel Tsingrang neng dhichi Jerusalem amübükuh la Phungkhu Thsüti mungla zehnung pathsa dsiyohcho.

⁴ Yangthsaba ko müyurünü arüh lümchung la tsü künyangcho,

⁵ achotsü Yuzeng roh-isü Phungkhu Thsüti tsü akhudi tenü adiu mungnung, arühnü kihku lahpi Dan lanü kihjing lahpi Beersheba chii Israelrü apüm Jerusalem la dsiyohcho.

⁶ Israel ko Juda apümlang yangthsaba ko abi adirünü mülacho yusi hipü wüsohcho: “Israelrü, Assyria khehlanü nührü khümchoko. Ade Abraham, Isak ko Jakob Tsingrang yang ximülaang ko Abinü nührü yang ximülanung.

⁷ Arüh Tsingrang Abüdongba te yuje müchorü nührü jümürü ko jünirü Israelrü tükyo. Arüh dee mütsa khingchicho nührünü nguko.

⁸ Arüh kyo hong tüzi, ta Abüdongba yocho nyieng. Abüdongba nührü Tsingrang-nü lede nengdang müsachehjüba Jerusalem la Amübükuh yang rung, ko adelü nührü te zii müchüronungthsa Abi mübüng.

⁹ Abüdongba yang nührünü ximülakhang, arangyohrü kang kümtsiba nührü jünirü te arühnü müi lümnung ko arüh kulang thalisohnung. Abüdongba nührü Tsingrang tsü amüi ko yanglilüm ko nührünü Abi yang ximülakhang, Abinü nührü khyüchonung.”

¹⁰ Yusi hiri tsü Efraim ko Manase yucho la yangdi apümlang kihku lahpi Zebulun yucho chii wücho, ta müyurünü arüh münyüjücho ko mükhimüngucho.

¹¹ Hütsütanye Asher, Manase ko Zebulun yucho lanü Jerusalem lang aronyürü khürü licho.

¹² Juda la Tsingrangba-nü nguchi nguchicho ko yangthsaba ko abi adirü yuzeng nyi arüh adhrongchehbala müjangcho.

Phungkhu Thsüti Mungcho

¹³ Hümdhse Choo anyüula Bhüpza Müyohba Hümdhse Thsüti mungnung Jerusalem la nyitsarü khütang shibülungcho.

¹⁴ Arühnü Jerusalem la kangmübü mübüba ko müchiji trüpnung bichiba bholu apüm hiwü Kidron Ngah la pehcho.

¹⁵ Ko hütsüba choo nyümong dhüremüyüula arühnü Phungkhu Thsüti kangmübü nengdang sanzati müpsehcho. Ayahnü mümüsaba bebürü Levirü tsü khütang shahcho, hütsünü Abüdongba te arüh jangjang müsachehcho ko adelü arühnü Amübükuh la kangmübü trüp mübünung kohcho.

¹⁶ Tsingrangba nyitsarü Mosa Yuzengnü mülacho roh-i arühnü Amübükuh la arüh yaji la yacho. Levirünü kangmübü shüh tsü Bebürü khyang jücho ko arühnü bholu chah xahcho.

¹⁷ Nyitsarü adrong ayahnü mümüsachonü, arühnü Phungkhu Thsüti sanza kyüsehnung mükohcho, hütsünü Levirünü arüh khyang kyüsehjücho ko sanza tsü Abüdongba khyang müsacheh jücho.

¹⁸ Adesü Efraim, Manase, Isakar ko Zebulun yuchoti lanü rocho adrong ayahnü müsaba mümüsachehcho, hütsünü arühnü Phungkhu Thsüti tsü athsalangnü mümungcho. Yangthsaba Hezekia-nü arüh nengdang hiroh-i kihchicho:

¹⁹ “O Abüdongba, ihrü jümürü Tsingrang, ayahla mümüsachehnye sürünü lasih apümnü Nüh mübüro, Nühnü mülang pehjüng.”

²⁰ Hezekia-nü kihchicho Abüdongba-nü lalingcho; Abinü müyurü mülang pehjücho ko arüh mütsa pehjücho.

²¹ Bhüpza müyohba thsüti Jerusalem la shibülung liba müyurünü nyümong dhünyeh akünyang amülahla mungcho ko nyümong mükhu Levirü ko bebürünü arüh suhre apümnü Abüdongba secho.

²² Levirünü Abüdongba mübübala sihthsa nücho nengdang Hezekia-nü arüh secho. Nyümong dhünyeh Abüdongba arüh jümürü Tsingrang khyang kangmübü mübü nengsepü khanglang,

Anyüpiu Mungcho

²³ arüh atümungnü adesü nyümong dhünyeh mungkehnung dhrongchehcho. Hütsüta arühnü künyangta mungcho.

²⁴ Yangthsaba Hezekia-nü müyurü khyang kyüseh tsusohnung misüpung hajar khüdu, ko san hajar dhünyeh, ko abi thsazirütinü misüpung hajar khüdu, ko san hajar dhüre jücho. Bebürü adrong ayah müsachehba müsacho.

²⁵ Hütsüta atümung künyangtacho, Judarü, bebürü, Levirü, kihku lahpinü rorüti, ko Israel ko Juda lih la arühtoh lipehba shuparüti.

²⁶ Jerusalem yangdi tsü akünyangnü jengcho, tunüo David tsurü yangthsaba Solomon tinü hi kyo khodesü mütikehdhingcho.

²⁷ Bebürü ko Levirünü müyurü khyang Abüdongba amüwa chingjücho. Tsingrangba-nü ninglang Abi kuh lanü arüh dangkhidangnang yuchicho ko arüh khyüchocho.