2 ROHTHÜP 29 - AMÜSA BAIBEL (BSI)

Juda Yangthsaba Hezekia

¹ Hezekia kang mükyüpü münga thsade Juda la yangthsaba kangcho ko abinü Jerusalem la kang mükyüpü düku yangthsacho. Atpa tsü Zekaria tsulatpü Abija licho.

² Abi jümürü yangthsaba David kyo Abüdongba-nü künyangnungthsa nguchicho.

Amübükuh Müsachehcho

³ Hezekia yangthsaba kangpü hütsüba kang la akhudiba choo la, abinü amübükuh trahtri thali khangthrucho ko hütsü külüpchicho.

⁴ Abinü Amübükuh kekhüm nyüchürolang bebürü ko Levirü mülung khüdu dsibülung arüh te yocho,

⁵ “Nührü Levirütinü nührü jümürü Tsingrang Abüdongba Amübükuh müsachehng ko nührübürü khakhuchüjüng. Amübükuh münyijüba apüm khyümüing.

⁶ Ihsa jümürünü Ihsa Tsingrang Abüdongba te yuje mücho ko Abinü künyangnungthsa münguchi. Arühnü Abi pehjüko ko Abi liba lahpi khang piko.

⁷ Arühnü Amübükuh kukhang khangticho, dsi mehsohcho ko müchiji mütrüpcho mahkhang Israel Tsingrang Amübükuh la trüp-mümübü.

⁸ Hütsünü Juda ko Jerusalem te Abüdongba rihlong chürocho ko Abinü arüh chah nguchicho ngu atümung nehcho ko dhridhricho. Nührünü hi dee tsüple.

⁹ Ihsa tpurü rothsala kyüsehcho ko Ihsa nitpürü ko tsurüti arangyohlang kümtsicho.

¹⁰ “Abinü Ihsa te rihlong müchürosohnung nengdang, Abüdongba Israel Tsingrang te, Ihnü azengchotaba khüdu külüpnung dhrongchehcho.

¹¹ I tsurüti, bekhyah tübeh. Abüdongba khyang müchiji trüpnung ko Abi mübünungla müyurü nünung throchehba tsü nührü lile.”

^12-14 Levirü tsü hiri licho: Kohat hung lanü, Amasai tsurü Mahath ko Azaria tsurü Joel Merari hung lanü, Abdi tsurü Kish ko Jahallel tsurü Azaria Gershon hung lanü, Zima tsurü Joah ko Joah tsurü Eden Elizafan hung lanü, Shimri ko Jeuel Asaf hung lanü, Zekaria ko Matania Heman hung lanü, Jehuel ko Shimei Jeduthun hung lanü Shemaia ko Uziel.

¹⁵ Hirinü arüh jünirü Levirü dsibülungcho ko arüh apüm ayahnü roh-i arüh jangjang müsachehcho. Hütsüpü yangthsabanü arüh khyang nguchinung jücho roh-i, Abüdongba Yuzeng roh-i arühnü Amübükuh ayah müsacheh dikehcho.

¹⁶ Bebürütinü Amübükuh ayonglang tsü müsachehnung züducho ko amümüsa kohro apüm arühnü Amübükuh kekhüm la hichehcho. Levirünü hütsüri apüm Kidron Ngahlang yangdi khu hiwücho.

¹⁷ Nguchi tsü akhudiba choo akhudiba nyümongla dikehcho ko nyümong akeh-ula Amübükuhlang züduba kuh chongsah trahtri zeh nguchi apüm thümcho. Adesü arühnü nyümong keh khyo Amübükuh la mübüji külüpnü nyümong dhüredhürohla nguchi thümcho.

Amübükuh Thali Müsachehcho

¹⁸ Levirünü Hezekia yangthsaba yang yu hi hirocho: “Ihrünü trüp mübü nengdang bholu, Amüsa hümdhse nengdang tsingthsang ko apa kohro zehnü Amübükuh ayah müsachehba apüm thümko.

¹⁹ Yangthsaba Ahaz-nü abi Tsingrangba te yuje mücho bekhyahla hitsicho kohro apüm thali hiroko ko ihrünü hütsü thali müsachehko. Hiri apüm Abüdongba bholu bete yohpüle.”

²⁰ Hütsüdenü yangthsaba Hezekia-nü yangdila langnürüti dsibülungcho ko arüh müjang Amübükuhlang wücho.

²¹ Yangthsaba kukhi ko Judarü münyi hitsinung nengdang arühnü misüpung dhünyeh, san dhünyeh, sanza dhünyeh ko miza dhünyeh amübü jücho. Yangthsabanü Aron trah bebürüti te kanglungrü tsü bholu chah kangmübü jünung yocho.

²² Bebürünü misüpung tsü akhu müpsehcho, hütsüpü san ko sanza ko kangmübü müipi chahnü ashüh tsü bholu chah xahcho.

²³ Achangkathsa miza tsü yangthsaba ko ashibülungrü yang hiropü hütsüchah arüh kheh nyümkehsohcho.

²⁴ Hütsüpü bebürütinü miza tsü müpsehcho ko ashüh tsü müyurüti münyi hitsiba kangmübü bholu chah xahcho, tunüo yangthsabanü Israelrü atümung nengdang trüp mübü ko münyi mübü mübünung yuzengjücho.

²⁵ Abüdongba-nü yangthsaba David khyang yangthsaba azikehrü Gad ko azikehrü Nathan khu jücho athülaba nyinü David-nü nguchicho roh-i yangthsabanü Levirü tsü Amübükuh la tbenglah ko dhingza bipü lisohcho.

²⁶ Bebürüsü hütsüla rühti bipü yacho.

²⁷ Trüp-mübü tsü jünung Hezekia-nü yuzengjücho; ko amübü jünung dikehde, müyurütinü Abüdongba nengsekhi thsacho ko khithsarütinü rühti mehnü ko apa ikhongtisü bichinü khi thsacho.

²⁸ Hütsüla lirü apüm amübüla zehcho ko kangmübü tsü trüpkanü arühnü khi thsanü rühti mehcho.

²⁹ Hütsüpü yangthsaba Hezekia ko müyurü atümungnü mükhoh thung Tsingrangba mübücho.

³⁰ Yangthsaba ko langnürütinü Levirü te David ko azikehrü Asaf nyühnü thrahcho nengsekhi tsü Abüdongba te thsanung yocho. Achotsü atümungnü akünyang khi thsa mükhukeh mübücho.

³¹ Hezekia-nü müyurü te yocho, “Adelü ayahnü nührü müsa kangko, Abüdongba khyang anengse jüba kangmübü mübü hirung.” Arühnü hütsü nyi khürünü amükangnü kangmübü trüp mübünung chürocho.

³² Arühnü Abüdongba khyang trüp mübünung misüpung nyühre, san thsih khüdu, ko sanza thsih anyüh hirocho;

³³ adesü müyurü tsunung arühnü misüpung thsih dhüroh, ko san hajar asang kangmübü hirocho.

³⁴ Hiri apüm müpsehnung bebürü kükyo mülichonü Levirünü tro nguchi tsü nguchicho. Hütsütadelü bebürü adrong abürü jangjang ayahnü müsa kangcho. (Ayahnü müsa linungla bebürü tenü Levirü alaa yuje choba thsacho.)

³⁵ Üpümshünü trüpba kangmübü mübü chah lahkeh müyurünü tsuba kangmübü jücho lanü asu trüpnung ko trüp mübü te müjang jüba yongkha tungkehnung nguchi tsü bebürü nguchi thsacho. Hütsüta Amübükuh la mübü tsü thali dikehcho.

³⁶ Yangthsaba Hezekia ko müyurüti künyang licho, tunüo hütsüri apüm dhsüdhsa nguchinung Tsingrangba-nü trocho.