2 ROHTHÜP 28 - AMÜSA BAIBEL (BSI)

Juda Yangthsaba Ahaz

¹ Ahaz tsü kang mükyü thsade yangthsaba kangcho ko Jerusalem la abinü kang dhüredhüroh yangthsacho. Abinü abi jümürü yangthsaba David adüzü atsa mü-iithsacho; ta Abüdongba mükünyangnungthsa abinü nguchicho,

² ko Israel yangthsarüti kyo nguchicho. Abinü idhsenü Baal kyothri külüpcho.

³ Hinnom Ngah la müchiji trüpcho ko Israelrü rode Abüdongba-nü iipehjüba nyitsarü iithsa abinü kyothri khyang atsurü mii trüp kangmübü jücho.

⁴ Akhangchah ko sing dhülüm pohki müipi müyudsirü mübüba müdümtila Ahaz-nü kangmübü jücho ko müchiji trüpcho.

Syria ko Israel te Mongchii

⁵ Yangthsaba Ahaz-nü amünyi shitpahchonü, Abüdongba abi Tsingrang-nü Syria yangthsaba khyang abi kohsohcho ko Judarü khütang Damaskas lang kümtsicho.

⁶ Abüdongba-nü Israel yangthsaba, Remalia tsurü Peka khyang Ahaz kohsohcho ko nyümong khüdunü Judarü athrungrü rothsarü lakh khüdu hajar mükyü kyüsehsohcho. Abüdongba arüh jümürü Tsingrang-nü hi tikehsohcho, tunüo Judarünü abi pehjücho.

⁷ Israel rothsarü khüdu anengnü Zikri-nü yangthsaba chitung Elkana ko yangthsaba kuh la müshorü Azrikam ko yangthsaba Ahaz tsurü Maaseia kyüsehcho.

⁸ Judarü tsü arüh jünirü thsanye, Israel rothsarünü khingkurü azarü lakh anyüh rangpü Samaria lang kümtsicho ko kohro khütang arühnü zang hitsicho.

Azikehba Oded

⁹ Abüdongba azikehrü khüdu anengnü Oded, Samaria yangdila licho. Israel rothsarüti Judarü arangyohrü kümpü yangdila züro chihnung thsade abinü arüh shiro yocho, “Nührü jümürü Abüdongba Tsingrang-nü Judarü te rihlong chüro nü khyang akoh ngusohko, ta nührünü rihlong alaa chüro arüh kingthrümcho abinü yuchiko.

¹⁰ Ade nührünü Juda ko Jerusalem nyitsarü adhrerü ko khingkurü nührü yuhrü kangsohnung lümre. Nührü Tsingrang Abüdongba nyüm nührünüsü amünyi shitpahcho nührünü mümüdherü do?

¹¹ Iyu nyieng! Hiri arangyohrü tsü nührü jünirü ko jünilarü lile. Arüh müthehchüng, mahkhang Abüdongba-nü Abi rihlong chüro nührü khingchinung.”

¹² Kihku lahpi yangdi lanü langnürü müyü, Jehohanan tsurü Azaria, Meshilemot tsurü Berekia, Shalum tsurü Jehizkia ko Haldai tsurü Amasa-rü rothsarütinü nguchiba tsü nyümcho.

¹³ Arühnü yocho, “Arangyohrüti hila tünoro! Ihsanü Abüdongba nyüm Abi rihlong chüro Ihsa khingchinungthsa amünyi kükyo shitpahko. Adesü Ihsa münyi alaa kangnung nührünü nguchinyüre.”

¹⁴ Achotsü rothsarütinü arangyohrü ko akengchocho kohro tsü müyurü ko arüh langnürü khyang jücho,

¹⁵ ko nyüh müyü tsü arangyohrü khyang arohchocho lanü jengki chang jünung throchehcho. Arühnü arüh khyang jengki ko jingkhüm, atsunung ko ayongnung ko arüh madhsa nengdang olive tuji kükyo jücho. Lang mükoh tsehrüti gadu chah pümsohcho ko arangyohrü apüm sedong yangdi Juda lih la Jeriko chii nowücho. Hütsüpü Israelrü Samaria lang thalicho.

Ahaz-nü Assyria te Arüku Chingcho

^16-17 Edomrünü thali Juda mahcho ko nyitsarü adrong rangcho, achotsü Assyria yangthsaba Tiglath Pileser te yangthsaba Ahaz-nü arüku chingcho.

¹⁸ Hütsü shikhe Filistinrünü Juda kihjinglang ko nyüzüdulang lahpi azong jingdümpila lirü yangdongti mahcho. Arühnü Beth Shemesh, Aijalon, Gederot ko Soko yangditi, Timna ko Gimzo yangditi ko arüh yangdongti zeh mahcho ko hütsüla arühtoh lipehcho.

¹⁹ Juda yangthsaba Ahaz-nü müyurü nyüm amütsa nguchicho ko Abüdongba münyijüchonü Abüdongba-nü Juda michah adhsangthsi jücho.

²⁰ Assyria yangthsabanü Ahaz tronung mülih abi khyang chongcha jücho.

²¹ Achotsü Ahaz-nü Amübükuh lanü, yangthsaba kuh lanü, müyurüti langnürüti kuh lanü, hon khyücho ko yangthsaba khyang jücho, ta hütsü nüsü mütsacho.

Ahaz Münyi

²² Abi chongcha amütsauba kangde, Ahaz-nü Abüdongba nyüm amünyi alaa du shitpahcho.

²³ Abi kohrü Syria-rü tsingrangti khyang abinü kangmübü jücho. Abinü yocho, “Syria tsingrangtinü Syria yangthsaba troko; Ihnü arüh khyang kangmübü jükhang arühnü Ih tronung.” Hinü abi ko abi yanglih michah achangba hirocho.

²⁴ Hütsüchah lahkeh abinü Amübükuh kohro apüm khyo kengnahcho. Abinü Amübükuh khangtipehcho ko Jerusalem jongnah apümlang bholu külüpcho.

²⁵ Juda yangdi ko yangdong apüm la, abinü müyudsirü mübüji külüpcho ko shuparü tsingrang khyang müchiji trüpcho. Hütsüta abi jümürü Tsingrang, Abüdongba rihlong apu chah hirocho.

²⁶ Abi yangthsade tikehcho apüm adikehnü achangka chii Juda ko Israel yangthsarü Yukheh la thrahyoh lile.

²⁷ Yangthsaba Ahaz sücho ko Jerusalem la dhrürangcho ta yangthsarü kong la müdhrürangcho. Abi tsurü Hezekia abi mülih yangthsaba kangcho.