2 ROHTHÜP 27 - AMÜSA BAIBEL (BSI)Juda Yangthsaba Jotham (2 Yangthsarü 15.32-38) 1 Jotham tsü kang mükyüpü münga thsade yangthsaba kangcho ko abinü Jerusalem la kang dhüredhüroh yangthsacho. Atpa tsü Zadok tsulatpü Jerusha licho. 2 Abinü au kyo Abüdongba-nü künyangnungthsa nguchicho; ta au kyo amübükuh la müchiji trüp amünyi müshitpahcho. Ta müyurünülü amünyi shitpahcho. 3 Jotham-nü Amübükuh kihku lahpi Tbükhüm tsü thsacho ko Ofil dsiba Jerusalem mükyah yangdi tbü tsü amülah külüpchicho. 4 Juda zong la Abinü yangditi külüpcho ko rangmü la roshengvi ko mükehmükong kuh thsacho. 5 Yangthsaba Amon ko arothsarü te khatacho ko arüh kohcho. Abinü Amon-rü te kang müipi taripi süreh hajar asang thsih müyü, litoh metric ton hajar khüdu ko lüdi metric ton hajar khüdu abi khyang kang asang akhüm tüpnung khangcho. 6 Jotham-nü abi Tsingrang Abüdongba te yochonyicho ko hütsü khu abi rezeh kangcho. 7 Jotham yangthsade tikehcho, khatacho ko abi lümchung apüm Israel ko Juda yangthsarü Yukheh la thrahyoh lile. 8 Jotham kang mükyüpü münga thsade yangthsaba kangcho ko abinü Jerusalem la kang dhüredhüroh yangthsacho. 9 Abi sücho ko David yangdila dhrürangcho ko atsurü Ahaz tsü abi mülih yangthsaba kangcho. |
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
Bible Society of India