2 ROHTHÜP 22 - AMÜSA BAIBEL (BSI)

Juda la Yangthsaba Ahazia

¹ Arab-rü khürünü arüh mahcho ko yangthsaba Jehoram tsurü achangba Ahazia chah khu aparü apüm kyüsehcho. Hütsünü Jerusalemrünü Ahazia tsü au mülih yangthsaba kangsohcho.

² Ahazia kang mükyüpü anyüh thsade yangthsaba kangcho ko abinü Jerusalem la kang khüdu yangthsacho.

³ Ahazia nüsü yangthsaba Ahab-rü kukhi iithsacho, tunüo atpa Athalia tsü Ahab tsulatpü, Israelrü Omri shümtsularü, anyünü thülacho khu abi münyi shitpahsohcho.

⁴ Abinü Abüdongba nyüm amünyi shitpahcho, tunüo au süpü khanglang, yangthsaba Ahab kukhirü tsü abi athülarü kangcho ko arühnü abi khülusohcho.

⁵ Arühnü thülacho nyi, abinü Syria yangthsaba Hazael nyüm khatanung Israel yangthsaba Joram yola zehcho. Rothsarü tsü Gilead lih Ramoth la khatacho ko khatala tsü Joram lerohpehcho.

⁶ Abinü Jezrel yangdi lang abi madhsa kyangsohnung thalicho ko Ahazia-nü hütsüla abi xodhingnung wücho.

⁷ Ahazia-nü Joram xodhingba hi khu Tsingrangba-nü abi khülusohcho. Ahazia hütsüla lide, Ahab yanglih thsangnyangsohnung Abüdongba-nü throchehba Nimshi tsurü Jehu-nü ro anyüh te khatacho.

⁸ Yanglih la tsü Jehu-nü Tsingrangba-nü yocho nguchide, Judarü langnürü ko Ahazia aphüli ko abi yola nororü mülung khüdu abinü mütohcho. Ko Jehu-nü arüh kyüsehcho.

⁹ Ahazia yangchicho ko abi Samaria la rang pümcho. Arühnü abi Jehu yanglang norocho ko abi süsohcho. Ta arühnü abi amü yangthsaba Jehoshafat, sünü akohchonü Abüdongba dikehcho, abi nenglanü abi me dhrürangcho. Yanglih la yangthsathsanung thsa Ahazia kukhi lanü süsü nying mülicho.

Juda la Yangthsalatpü Athalia

¹⁰ Yangthsaba Ahazia atpa Athalia-nü atsudhre kyüsehcho yuva tsü yuchiyeng, Juda la yangthsaba kukhi la lirü apüm kyüsehnung abükyünü yuzengjücho.

¹¹ Ahazia ani khingkurü khüdu Jehosheba licho, abükyü tsü bebürü khüdu Jehoiada te kukangpü licho. Abükyünü rangnü Ahazia tsurü khüdu Joash, abi tsü aparü yangthsaba tsurüti yolanü nükhu rangcho ko Amübükuh la yüpji chongsah khüdula abi rükucho. Hütsüta abükyünü Athalia kheh la asünunglanü abi rangpo khümchocho.

¹² Kang dhüroh Athalia tsü yangthsalatpü litashi abi hütsüla licho.