2 ROHTHÜP 21 - AMÜSA BAIBEL (BSI)

¹ Jehoshafat sücho ko David yangdila yangthsarü kong la dhrürangcho ko atsurü Jehoram tsü abi mülih yangthsaba kangcho.

Juda la yangthsaba Jehoram

² Juda yangthsaba Jehoshafat tsurü arüh jünirü dhüroh licho: Azaria, Jehiel, Zekaria, Azariahu, Mikael ko Shefatia.

³ Arüh aunü arüh khyang hon, taripi thsidi kohro jücho ko arüh müipi Juda la lungnü tbüticho yangdi khüdu-khüdula yohpüjücho. Ta Jehoram tsü aziba thsachonü, Jehoshafat-nü abi mülih yangthsaba kangsohcho.

⁴ Khode Jehoram-nü yanglih tsü drengdreng rah yohpücho, abinü anirüti atümung ko Israelrü adirü mii zeh kyüsehcho.

⁵ Jehoram kang sangrepü anyüh thsade yangthsaba kangcho ko abinü Jerusalem la kang keh yangthsacho.

⁶ Abinü yangthsaba Ahab ko Israelrü amütsa yangthsarü khürü kyo amütsa nguchi iithsacho, tunüo abinü Ahab tsularü yola khüdu khyücho.

⁷ Abinü Abüdongba nyüm amünyi shitpahcho, ta Abüdongba-nü David yangthsaba müchangjünyücho, tunüo Abinü David te abi trah lanü lede yangthsarü linung azengchotaba külüp licho.

⁸ Jehoram yangthsaba bekhyah Edom-nü Juda nyüm yacho ko pathsa yanglih kangcho.

⁹ Achotsü Jehoram ko abi nyitsarütinü shemüsu wü Edom mahcho. Hütsüla Edomrü rothsarünü arüh beticho, ta aromang arühnü shungphoh tsicheh tsicho.

¹⁰ Hütsü tinü Edom tsü Judarü chahnü pathsa yanglih kangcho. Hütsü shikhela du tsü, Libna yangdi nüsü nyüm yacho, tunüo Jehoram-nü Abüdongba, abi jümürü Tsingrang thrüchahchüpehcho.

¹¹ Abinü akhang lih Juda la müyudsirü mübüji mii külüpcho ko Judarü ko Jerusalemrü Abüdongba nyüm amünyi shitpahsohcho.

¹² Azikehrü Elija-nü Jehoram yang vathrah khüdu hita thrahcho: Abüdongba, nü jümürü David Tsingrang-nü nüh mülangjüko, tunüo nühnü nüu Jehoshafat mahkhang yangthsaba Asa kyo münguchi.

¹³ Ta nühnü Israel yangthsarüti kyo, Ahab ko abi mülihrünü Israelrü yuje müchosohcho kyo, Judarü ko Jerusalemrü Abüdongba te yuje müchosohcho. Nühnü nütenü atsau nü jünirü mii kyüsehcho.

¹⁴ Hütsü ngang, Abüdongba-nü nü müyurü, nü tsuzarü ko nitpürüti khingchinung ko nü kuthsi changjünung.

¹⁵ Nüpusü nüxüla madhsa chüro anyümong nyümongnü amütsauba kangnung.

¹⁶ Yongkhi bekhüm jüp liba Ethiopiarü shündhün Filistinrü ko Arab-rü khürü licho. Jehoram nyüm khata wünung Abüdongba-nü arüh thsüchicho.

¹⁷ Arühnü Juda mahcho, yangthsaba kuh lanü kohro zangcho ko yangthsaba nitpürüti ko abi tsuzarüti, achangba Ahazia chah khu arüh apüm arangyohrü kang kümtsicho.

¹⁸ Hiri apüm khanglang Abüdongba-nü yangthsaba chah abi xüla madhsa chürosohcho.

¹⁹ Kang anyü-oshi hütsü khai khainü amütsau kangcho ko achangkathsa abi tohdhsa sücho. Abi müyurütinü abi jümürü nengdang roh-i müthsapü abi meshüde mih müphungcho.

²⁰ Jehoram kang sangrepü anyüh thsade, abi yangthsaba kangcho ko abinü Jerusalem la kang keh yangthsacho. Abi süde sünüsü longri mülümcho. Arühnü abi David yangdila dhrürangcho, ta yangthsarü kong la müdhrürangcho.