2 ROHTHÜP 20 - AMÜSA BAIBEL (BSI)

Edom Nyüm Khata

¹ Azachah lipü khanglang, Moab ko Amon-rü rothsarü, arüh te tsungphung thsarü Meunit-rü zeh, arühnü Juda mahcho.

² Yuhirü khürünü ro yangthsaba Jehoshafat te yocho: “Nüh mahnung Edom lanü khütango Asü Kihdi khüulangnü roko. Arühnü Hazazon Tamar khyopehko.” (Hi Engedi aneng apa lile.)

³ Jehoshafat tsü nehcho ko Abüdongba te atronung nengdang dangkhidangnangcho. Hütsüpü abinü yanglih apümlang kong dangkhidangnangnung yuzengjücho.

⁴ Juda la yangdi mükhu lanü müyurünü Abüdongba te atroba chingnung dhsüdhsa Jerusalem lang wücho,

⁵ ko arüh ko Jerusalemrü tsü amübü kekhüm asi la shibülungcho.

⁶ Yangthsaba Jehoshafat-nü wü arüh bete yapü züde dangkhidangnangcho, “O Abüdongba, ihrü jümürü Tsingrang, limih la yucho apüm michah Nühnü ninglangnü yangthsathsare. Nüh suh azeh ko akohba lile ko sünüsü Nüh münyümcheh.

⁷ Nüh ihrü Tsingrang, Nü müyurü hiba lih yang rode hila lirü nühnü iipehjüpü Nü shangrü Abraham chahnü trahchocho khyang arühtoh arüh yo thsanung jücho.

⁸ Arüh hila licho ko Nüh dhichinung arühnü amübükuh khüdu thsajücho,

⁹ hütsü arüh khingchinung asübanü chihsohkhang, khata rümra mahkhang yangkongdhsükongnü chihkhang, arühnü ro Nüh mübüba amübükuh bete yanung. Arüh chongchade arühnü Nüte kihchinung ko Nühnü arüh te nyijünung ko arüh khümchonung.

¹⁰ “Ade Amon-rü, Moab-rü ko Edomrünü ihrü betiko. Ihrü jümürü Ijip lanü chürode, Nühnü hütsüri lih la müzüdusohcho, hütsünü ihrü jümürünü arüh müri tsicho ko arüh müchangjücho.

¹¹ Nühnü ihrü khyang jüba lih lanü ihrü iipeh hütsü rühyangnyüre.

¹² Nüh ihrü Tsingrang! Arüh khingching, tunüo ihrü mahba rothsarü mülung hitoi bete ihrünü tu nguchinung mükoh. Ihrünü tu nguchinungnang mümüdhe, ta Nü chah du dümpire.”

¹³ Judarü apüm arüh tsurü nitpürü zeh Amübükuh te tsü yacho.

¹⁴ Amülungla yarü yola Levirü khüdu chah Abüdongba nbü rocho. Abi neng Zekaria tsurü Jahaziel licho; abi Asaf hung lanü nyüh khüdu Matania, Jeiel ko Benaia chahnü trahchocho licho.

¹⁵ Jahaziel-nü yocho, “Nüh Adibong, ko nührü Judarü ko Jerusalemrü, rothsarü hitoi te dhsükehnung nührü suh tüzah mahkhang tüdrü pü Abüdongba-nü yore. Khata tsü Abüdongba mücie.

¹⁶ Atu arüh Ziz langla chürode mahng. Nührünü arüh tsü Jeruel shündhün mürong limih lang wüba lang achangkala mütohnung.

¹⁷ Nührünü hiba khata mükhatanung. Nührünü yaji du thsachehpü ying: Abüdongba-nü nührü khyang akoh jücho nührünü ngunung. Judarü ko Jerusalemrü, tütütohnyünyeh ko tüdrü. Chitanung shemüsung ko nührü te Abüdongba zeh linung.”

¹⁸ Hütsüde yangthsaba Jehoshafat-nü alih la aromih hapkeh mükhukehcho ko müyurü apümnü abi te aroh mükhukeh Abüdongba mübücho.

¹⁹ Levirü hung Kohat ko Korarünü shemüsucho ko yuva athsengnü Abüdongba, Israel Tsingrang neng secho.

²⁰ Nyangnyü khüu tsü mütoh müyurütinü Tekoa münyeh mürong lih lang tsü wücho. Arüh yamüsude, Jehoshafat-nü arüh te yu hiri yocho: “Judarü ko Jerusalemrü! Nührünü Abüdongba nührü Tsingrang chah longlangkhang nührünü drengdreng yanung. Abi azikehrünü nührü te yoba tsü yudsing, khang nührünü kohnung.”

²¹ Müyurü te kihtapü, abinü khithsarü te arühnü Amüsa bekhyahla jengki khyüpü rothsarü bete tsü hita khithsa tsehnung yuzengjücho: “Abüdongba seing! Abi amüi achangka mühle!”

²² Arühnü khithsanung dikehde, Abüdongba-nü arüh mahnung rorüh rothsarü tsü nehsohcho.

²³ Amon-rü ko Moabrünü Edomrü mahcho ko arüh sehchi changjücho, hütsüpü arüh-e arührü khatamüsucho.

²⁴ Khode Judarü rothsarünü lipilih la roshengvi tsü chihcho, arühnü belang arorüh chah tsü dhingde, arüh apüm alih la sükhang jocho. Khüdusü mütsicheh.

²⁵ Jehoshafat ko arothsarütinü kohro zangnung züducho ko arühnü kanglungrü, tsuyongba, jengki ko apa thsidi khütang li ngucho. Arühnü nyümong asang khyo kohro tsü zangbülungcho, ta drongrachonü apümlü mükhyüchehcho.

²⁶ Amüyüu nyümong, arühnü Baraka Ngah la shimükhongcho ko Abinü khütoh-i nguchicho hütsü nengdang Abüdongba secho. Hütsünü hütsüba ngah te “Beraka” pü dsicho.

²⁷ Jehoshafat-nü abi rothsarü Jerusalem lang akoh ngu thali nowücho, tunüo Abüdongba-nü arüh rorüh kohjücho.

²⁸ Arühnü yangdi tsü chihde, Amübükuhlang, tbenglah ko rühti meh wücho.

²⁹ Abüdongba-nü Israelrü rorüh kohcho yuchirü yanglih apümnü drümüyangcho,

³⁰ hütsünü Jehoshafat-nü yangtsa la yangthsathsacho ko Tsingrangba-nü apümlang akhümcho jücho.

Jehoshafat Yangthsathsaba Changkacho

³¹ Jehoshafat tsü Juda yangthsaba kangde abi kang sangrepü münga licho ko Jerusalem la kang mükyüpü münga yangthsacho. Atpa tsü Shilhi tsulatpü Azubah licho.

³² Abi bekhu au Asa kyo, abinü Abüdongba nahte atsa nguchicho;

³³ ta müyudsirü mübü müdümlü müthsangnyangjücho. Müyurütinü arüh jümürü Tsingrang mübünung nengdang lasih apümnülü ximüla mürocho.

³⁴ Jehoshafat-nü nguchicho lüpcho, adikehlanü achangka chii, Israel yangthsarü yukheh la changsho ko Hanani tsurü Jehu Yukheh la thrah lile.

³⁵ Shikhe khüdulü, yangthsaba Jehoshafat-nü Israel yangthsaba Ahazia sünü amütsa nguchi khütang nguchicho, abi te langthsa licho.

³⁶ Eziongeber kihbekhümla arühnü kihjüla rachiba kihkuh külüpcho.

³⁷ Ta Maresha lanü Dodavahu tsurü Eliezer-nü Jehoshafat müzahsoh yocho, “Nühnü Ahazia te langthsacho khu, nühnü külüpba tsü Abüdongba-nü thsangnyangjünung.” Ko kihkuh tsü thsangnyangcho ko khodesü mürachicho.