2 ROHTHÜP 19 - AMÜSA BAIBEL (BSI)

Azikehrü Khüdunü Jehoshafat Yübücho

¹ Juda yangthsaba Jehoshafat apu yangthsaba kuh Jerusalem lang khümcho thalicho.

² Azikehrü khüdu Hanani tsurü Jehu-nü wü yangthsaba shiro abi te yocho, “Amütsarü tronung ko Abüdongba thrünyirü khümnung tsü athsalangepü nühnü lümrü mah-o? Nü nguchinü nüpu chah Abüdongba rihlong hiroko.

³ Tanye nü chah atsa khürü lile. Nühnü Ashera tsingranglarü müyurünü mübüyacho kyothri apüm pehjüko ko nühnü Tsingrangba lümcho nguchinung müküpko.”

Jehoshafat-nü Külüpchicho

⁴ Yangthsaba Jehoshafat Jerusalem la linye, abinü Abüdongba, arüh jümürü Tsingrang yanglang nüli ronung nengdang kihjing lahpi Beersheba lanü kihku lahpi azong lih achangka Efraim chii müyurü yola licho.

⁵ Abinü lungnü tbüticho Juda yangditila yukharü khüdu khüdu yohpücho

⁶ ko arüh te hita thülacho: “Yukhade müzahng; nüh nyitsarü tasela nguchirü mah, ta Abüdongba tasela nguchire, ko nühnü yukhaba jüde abi nüte zehle.

⁷ Abüdongba drüng ko müzahmüki nguching, tunüo Abüdongba Ihsa Tsingrang-nü kihyochüba, tsahdhingkudhing ko pohsa khyüba thrünyire.”

⁸ Jerusalem la Abüdongba Yuzeng thsangnyangcho mahkhang yangdila lirü nyitsarü kahla khiyu chürocho hirila trosohnung Jehoshafat-nü Levirü, bebürü ko langnürü khürü yukharü roh-i thro yohpücho.

⁹ Abinü athülaba hiroh-i arüh khyang jücho: “Nührünü nührü nguchi tsü Abüdongba drübala nguching ko nührünü nguchicho lüpchola abi yochonyi nguching.

¹⁰ Khodederü yangdi masü lanü nyitsarü khürü nührü yang shüh khatohcho, yuzeng ko amülaba thsangnyangcho nengdang hironang, Abüdongba nyüm amünyi shitpah mümülangnungthsa, yukhachah khüta bichinung, hütsüri dee müzah thülaang. Nührünü hütsüta müthsakhang, nüh ko nü nyitsarütinü Abüdongba rihlong mütohnung. Ta nührünü nührü nguchi athsalangnü nguchikhang, nührü mümülangnung.

¹¹ Mübüla khiyu apüm nengdang Amungthriba Bebüba Amaria yu tsü achangka ko liyah khiyu apüm nengdang Ishmael tsurü Zebadia, Juda governor yu tsü achangka linung. Yukhacho tsü nguchirü münguchirü hütsü Levirünü dhingyehnung. Müci mülahng ko hiri athülaba nguching ko yuje lahpi Abüdongba zehng.”