2 ROHTHÜP 15 - AMÜSA BAIBEL (BSI)

Asa-nü Külüpchicho

¹ Tsingrangba Anbü Oded tsurü Azaria chah rocho,

² ko abinü yangthsaba Asa shirünung wücho. Abinü yocho, “Iyu nyieng, yangthsaba Asa ko nührü Judarü ko Benjaminrü atümung! Nührünü Abi te litashi Abüdongba nührü te linung. Nührünü Abi yangchikhang, Abinü nührü khyang Abi shirüsohnung, ta nührünü ximüla tsikhang, Abinü nührü pehjünung.

³ Bekhyah asheng Israelrü yuje Tsingrang mülipü, arüh te donung bebürü mülipü ko Yuzeng mülipü licho.

⁴ Ta khode chongcha mütohcho, arühnü Abüdongba Israel Tsingrang yanglang ximülacho. Arühnü Abi yangchicho ko Abi shirücho.

⁵ Hütsü shikhe süsü tbachi wüli-roli müthsachehcho, tunüo apümlang chongcha roto licho.

⁶ Yucho khüdunü yucho khüdu sehchicho, yangdi khüdunü yangdi khüdu sehchicho, tunüo Tsingrangba-nü arüh chah chongcha ko awah hirojücho.

⁷ Ta nührünü müci mülahng ko suzah tüli. Nührünü nguchiba tsü amii ngunung.”

⁸ Khode Oded tsurü Azaria-nü choyohba yu tsü Asa-nü yuchicho, abi rezehchi kangcho. Abinü Juda ko Benjamin lih la ko abinü kohchehcho Efraim yangditila kyothriti apüm pehsohcho. Abinü Amübü kekhüm la liba bholu tsüsü külüpchicho.

⁹ Efraim, Manase ko Simeon lanü nyitsarü khütang Asa yanglang rocho ko abi yanglih la licho, tunüo abi te Abüdongba licho arühnü müdhecho. Asa-nü arüh atümung ko Judarü ko Benjaminrü dsicho.

¹⁰ Arühnü Asa yangthsacho kang dhüremüngau ko choo asangula Jerusalem la shimükhongcho.

¹¹ Hütsü nyümong arühnü küm rocho kuthsi lanü Abüdongba khyang kangmübü jücho: misü thsih dhünyeh ko san hajar dhünyeh.

¹² Arühnü arüh lasih ko anbü apümnü Abüdongba, arüh jümürü Tsingrang mübünungepü azengchotaba khüdu külüpcho.

¹³ Azarü, azirü, khingkurü ko adhrerünye, sünü Abi mümübonang, abilü süsohnung.

¹⁴ Arühnü azengtacho bichinungepü Abüdongba nengla züde yuchümcho, hütsüpü arühnü züdecho ko rühti mehcho.

¹⁵ Judarü apüm künyangcho, tunüo arühnü hiba azengchotaba hi arüh lasih apümnü külüpcho. Arühnü Abüdongba mübüchola akünyang ngucho, ko Abinü arüh khyüchocho ko apümlang arüh khyang atbachi jücho.

¹⁶ Yangthsaba Asa-nü ajü Maka tsü yangthsalatpü atpa pü dsiba jingdrang lanü khyümüicho, tunüo abükyünü zehzangba Ashera tsingranglarü kyothri külüp yohpücho. Asa-nü kyothri tsü kyütsucho, thsüpnahcho ko Kidron ngah la trüp-pehcho.

¹⁷ Asa-nü yanglih la müyudsirü mübüba müdüm apüm müpehnye, abinü abi akang ayung Abüdongba jingte yuje cho licho.

¹⁸ Abinü amübükuh la tsü au Abija-nü Tsingrangba khyang müsachehcho kohro apüm ko apunü müsachehcho hon ko taripi kohro apüm yohpücho.

¹⁹ Abi yangthsathsaba kang sangrepü münga tizah hütsüla rothsa mülicho.