2 ROHTHÜP 14 - AMÜSA BAIBEL (BSI)

Yangthsaba Asa-nü Ethiopiarü Kohcho

¹ Yangthsaba Abija sücho ko David yangdila yangthsarü kong la dhrürangcho. Atsurü Asa tsü abi mülih yangthsaba kangcho ko Asa pohki yanglih tsü kang dhüre tbachi licho.

² Asa-nü tu atsa ko athsalang hütsü nguchi Abüdongba, abi Tsingrang künyangsohcho.

³ Abinü shuparü bholu ko müyudsirü mübü müdüm lohpehjücho, amüsa lung-dongdi müpnahjücho ko tsingranglarü Ashera kyothri müpnah pehjücho.

⁴ Abinü Abüdongba arüh jümürü Tsingrang lümcho nguchinung ko Abi adoba ko amülaba bichinung Judarü khyang yuzengjücho.

⁵ Abinü müyudsirü mübüji, ko Juda yangditi apüm lanü müchiji tahji bholu apüm pehjüchonü, abi pohki yanglih tsü tbachi licho.

⁶ Abi chichah Juda yangditi lungnü tbüticho ko kang adrong hütsüla khata mülicho, tunüo Abüdongba-nü abi khyang yangtsa jücho.

⁷ Abinü Judarü te yocho, “Ihsanü yangditi tsü züdi yoh ko roshengvi thsa ko tbükhüm azihsing yoh külüpnung. Ihsanü alih apüm Ihsa pohki yohpüko, tunüo Ihsanü Abüdongba Ihsa Tsingrang lümcho nguchiko. Abinü Ihsa tsungtiko ko apümlangnü Ihsa khümchoko.” Hütsüta arühnü yanglih külüp künyang licho.

⁸ Yangthsaba Asa Juda lanü rothsarü lakh asang tsung ko thsuh bipü, ko Benjamin lanü tsung ko singthsalu bipü rothsarü lakh anyüpü hajar qure licho. Arüh apüm akurahrü ko axangcheh du thsacho.

⁹ Ethiopiarü nyüh khüdu anengnü Zera-nü nyüh lakh dhüre kuri akhüluba thsih asang nüpü Juda mahcho ko Maresha chii khyücho.

¹⁰ Asa-nü abi te khatanung wücho ko anyüdinglangrünü Maresha shündhün Zefatha Ngah la jüm pümcho.

¹¹ Asa-nü Abüdongba abi Tsingrang te dangkhidangnangcho, “O Abüdongba, Nühnü re müzehba rothsarü rezehsoh tronung kohle. Ade ihrü troung, O Abüdongba ihrü Tsingrang, tunüo ihrü Nü chah dümpire ko Nü nengla ihrünü rothsarü mülung hitoi te khatanung ro lile; Abüdongba, Nüh ihrü Tsingrang lile; Nüh kohnunglü sünüsü mülongdire.”

¹² Asa ko Judarünü Ethiopiarü mah-iiwüde, Abüdongba-nü arüh tro kohsohcho.

¹³ Arühnü drü tsicho ko Asa rothsarütinü Gerar chii iijowücho. Ethiopiarü tsü drongra kingthrümchonü arühnü thali khatanung mütringbülungcho. Arüh tsü Abüdongba ko Abi rothsarütinü kohcho ko arühnü kohro khütang zang khyücho.

¹⁴ Hütsüpü arühnü Gerar mükang yangditi mahnung kohcho, tunüo hütsüla lirü nyitsarünü Abüdongba drümüyangpehcho. Rothsarü tsünü yangditi tsü sehchi mahcho ko kuthsi khütang zang khyücho.

¹⁵ Arühnü san-nyahrü lichahsü khürü mahcho ko san ko ut adrong khyücho. Hütsüpü arühnü Jerusalem lang thalicho.