2 ROHTHÜP 13 - AMÜSA BAIBEL (BSI)

Abija-nü Jeroboam te Khatacho

¹ Israel la yangthsaba Jeroboam yangthsacho kang dhürekeula, Juda la Abija yangthsaba kangcho,

² ko abinü Jerusalem la kang asang yangthsacho. Atpa tsü Gibea yangdi lanü Uriel tsulatpü Mikaia licho. Abija e Jeroboam nyüh kahla khata suwücho.

³ Abija-nü rothsarü nyüh lakh müyü rungnümcho ko Jeroboam-nü rothsarü lakh keh nüpü abi nyüm yacho.

⁴ Rothsarü tsü azong lih Efraim la dhsükehtacho. Yangthsaba Abija-nü Zemaraim khang chah küdupü Jeroboam ko Israelrü te hita züdecho: Abinü yocho, “Iyu nyieng!”

⁵ “Abüdongba, Israel Tsingrang-nü David te lede nengdang Israel la abi ko abi trah khyang yangthsathsanung jo amüthsangnyangba azengtacho külüpcho nührünü mümüdheo?

⁶ Nebat tsurü Jeroboam-nü apu yangthsaba Solomon nyüm yacho.

⁷ Akhanglang abinü tulamüyohrüti mülungo nübülungpü Solomon tsurü azarü ko tu mümüdheba Rehoboam nyüm yacho.

⁸ Ade nührünü Abüdongba-nü David trah khyang jüba yujeba tase nyüm khatanung yare. Nührü rothsarü khütango ko Jeroboam-nü nührü tsingrang thsanung hon-nü külüpcho misüpung nührü te licho.

⁹ Nührünü Abüdongba bebürü Aron trah ko Levirü iipehcho. Hütsüri mülih nührünü yucho parü kyo bebürü throchehcho. Ko khürünü misüpung khüdu mahkhang san dhünyeh bipü rokhang, nührü tsingrangepü dsiba bebürü thsanung müsachehre.

¹⁰ “Ta ihrünü ade yingcheh Abüdongba Ihsa Tsingrang du dikehre ko Abi müthrüchahchüpeh. Aron chahnü trahchocho bebürütinü arüh nguchi nguchire ko Levirünü arüh trore.

¹¹ Nyangnyü romang mükhu arühnü müchiji ko kanglungrü kangmübü üpümshünü trüp mübüre. Arühnü ayahnü müsachehpü liba tsingthsang chah tsü hümdhsenü mübüre ko romang mükhu hon dsimüdongsing chah tsü arühnü dsi tahkeh yohpüre. Ihrünü Abüdongba-nü mülacho nguchire, ta nührünü Abi thrüchahchüpehko.

¹² Tsingrangba Apu tsü ihrü anüchiba ko Abi bebürünü hila rühti bipü nührü nyüm khata suwünung rungnüm lile. Israelrü, Abüdongba, nührü jümürü Tsingrang nyüm tükhata! Nührünü mükohnung!”

¹³ Hütsütade tsü Jeroboam-nü akhanglangnü Judarü rothsarü thsehnung rothsarü khürü müthehcho ko changshonü belangnü arüh te dhsükehnung rocho.

¹⁴ Judarünü dhingmükangde arüh betiko pü ngucho. Arühnü Abüdongba te troungpü züdecho ko bebürünü rühti tsü mehcho.

¹⁵ Judarünü khütang khong züdecho, ko Abija-nü nüpü arühnü dse-iiwücho; Tsingrangba-nü Jeroboam ko Israelrü rothsarü michah kohchehcho.

¹⁶ Israelrünü drü tsicho ko Tsingrangba-nü Judarü khyang kohsohcho.

¹⁷ Abija ko abi rothsarünü Israelrü sehchi kohcho, Israelrü rothsarü lakh münga kyüsehcho.

¹⁸ Hütsüta Israelrü michah Judarü akoh amülah ngucho, tunüo arühnü Abüdongba, arüh jümürü Tsingrang chah dümpicho.

¹⁹ Abija-nü Jeroboam rothsarü iiwücho ko abi yangdi khürü khyücho: Bethel, Jeshana ko Efron ko hiri yangditi shündhün liba yangdongtisü khyücho.

²⁰ Abija yangthsathsa ayung Jeroboam thali müsurochehcho. Achangkathsa, Abüdongba-nü abi chah xüpcho ko abi sücho.

²¹ Ta Abija re azeh-u kangcho. Anitpü dhüremüyü khyücho ko atsurü adhrerü mükyüpü anyüh ko khingkurü dhüredhüroh licho.

²² Anyingcho Abija yukheh, abinü tu chocho ko nguchicho, hütsü Azikehrü Iddo yukheh la thrah lile.