2 ROHTHÜP 12 - AMÜSA BAIBEL (BSI)

Ijiprü Khüdunü Juda Mahcho

¹ Rehoboam yangthsaba kang tase nguyengnü, abi ko abi müyurü apümnü Abüdongba Yuzeng thrüchahchüpehcho.

² Rehoboam yangthsacho kang amüngaula Abüdongba yocho münyicho ngang khingchicho.

³ Ijip yangthsaba Shishak-nü rothsarü kuri akhüluba hajar khüdupü thsih anyüh, kuri rothsarü hajar rohre ko Libya, Sukot-rü ko Ethiopiarü rothsarü zeh mükhilong nüpü Jerusalem mahcho.

⁴ Abinü Juda la atbüticho yangditi mahchehcho ko Jerusalem chii iiwücho.

⁵ Azikehrü Shemaia-nü Jerusalem la Shishak tenü rang tsinung shibülung liba Rehoboam ko Judarü langnürüti yanglang wücho. Abinü arüh te yocho, “Abüdongba-nü hita yore, ‘Nührünü Ih thrüchahchüpehko, hütsüeko ade Ihnü nührü Shishak kheh la thrüchahchüpehre.’”

⁶ Yangthsaba ko langnürütinü yuje arühnü münyi shitpahko pü nyengchocho ko arühnü yocho, “Abüdongba-nü tu nguchiro hütsü athsalang nguchire.”

⁷ Abüdongba-nü hütsü ngude, abinü Shemaia te thali chotacho ko abi te yocho, “Arühnü arüh münyi nyengchocho khu, Ihnü arüh müchangsohnung. Ta khode Shishak-nü arüh mahnang, arüh khürülü nyingnung. Jerusalem chah I rihlong apümlü müchüronung,

⁸ ta Shishak-nü arüh kohnung ko hütsüde arühnü I dikehcho ko limih yangthsarü dikehcho adukah müdhenung.”

⁹ Yangthsaba Shishak Jerusalem lang rocho ko Amübükuh ko yangthsaba kuh lanü kuthsi zang khyücho. Arühnü yangthsaba Solomon-nü külüpba hon tsung mii zeh lüpcho khyücho.

¹⁰ Hütsüri mülih, Rehoboam-nü imüyengnü tsung külüp-pü yangthsaba kuh trahtri nyahrü khyang dhingyehnung pehjücho.

¹¹ Yangthsaba amübükuhlang wü müipi, anyahrünü tsung tsü bipü iiwücho ko thali azahkehjila yohpücho.

¹² Abinü Abüdongba te mülang nyengchochonü, Abüdongba rihlongnü abi riri müchangjücho ko Juda tsa liwücho.

Rehoboam Yangthsacho Akhikyahnü

¹³ Rehoboam-nü Jerusalem la yangthsacho ko abi yangthsaba tase alaa kangcho. Abi yangthsaba kangde kang yürepü kheh licho ko Israel apüm lanü abi mübüsohnung throchehba Jerusalem la kang dhüredhünyeh yangthsacho. Rehoboam atpa tsü Amon lanü Nama licho.

¹⁴ Abinü amünyi shitpahcho, tunüo abinü Abüdongba lümcho müdhenung mümüküpcho.

¹⁵ Rehoboam nguchi adikehlanü achangka chii ko abi kukhi Yukheh tsü Azikehrü Shemaia yukheh ko azikehrü Iddo Yukheh la ngunung. Rehoboam e Jeroboam nyüh tsü lede mongchii du licho.

¹⁶ Rehoboam sücho ko David yangdila yangthsarü kong la dhrürangcho ko atsurü Abija tsü abi mülih yangthsaba kangcho.