2 ROHTHÜP 11 - AMÜSA BAIBEL (BSI)

Shemaia-nü Choyohcho

¹ Khode yangthsaba Rehoboam ro Jerusalem chihcho, abinü Benjamin ko Juda yuchoti lanü athrungrü rothsarü nyüh lakh khüdupü hajar qure dsibülungcho. Abinü wü khatapü kihku lahpi Israel yuchoti thali khyo abi pohki yohpünyücho.

² Ta Abüdongba-nü yusi hi azikehrü Shemaia te

³ hiwü yangthsaba Rehoboam ko Juda e Benjaminrü te yonung yocho:

⁴ “Nührü jünirü Israelrü tümah. Nührü apüm kulang thalieng. Tu tikehcho hütsü Ihnü lümcho lile.” Arühnü Abüdongba yochonyi Jeroboam te khatanung müwücho.

Rehoboam-nü Yangditi Tbüticho

⁵ Rehoboam-nü Jerusalem la licho ko Juda e Benjamin la yangdi hiri tbüticho:

⁶ Bethlehem, Etam, Tekoa,

⁷ Bethzur, Soko, Adullam,

⁸ Gath, Maresha, Zif,

⁹ Adoraim, Lakish, Azeka,

¹⁰ Zora, Aijalon, ko Hebron.

¹¹ Abinü hütsüri tsü drengdreng tbüticho ko hütsüri müipi anyahrü khüdu-khüdu yohpücho ko hütsüri apüm la tsuyongba, tuji ko yongkha kükyo chixicho,

¹² ko thsunohrü yohpücho. Hütsüta nguchi abinü Juda ko Benjamin abi pohki yohpücho.

Bebürü ko Levirü Juda lang Rocho

¹³ Israel lih apümlangnü bebürü ko Levirü kihjing lahpi Juda lang rocho.

¹⁴ Levirünü arüh zanulih ko apa lih pehjüpü Juda ko Jerusalem yang shehmüicho, tunüo yangthsaba Jeroboam ko abi mülihrütinü arüh tsü Abüdongba bebürü müthsasohcho.

¹⁵ Jeroboam-nü müyudsirü mübü müdümla dikehnung ko abinü misüpung kyo külüpcho kyothri mübünung nengdang apu yo bebürü throchehcho.

¹⁶ Israel yucho apüm lanü sürünü Abüdongba Israel Tsingrang mücijo mübünyücho, arühnü arüh jümürü Tsingrang, Abüdongba khyang kangmübü mübünung nengdang Levirü khanglang Jerusalem lang wücho.

¹⁷ Hinü Juda yanglih drengdrengsohcho ko kang asang arühnü Solomon tsurü Rehoboam rükucho ko yangthsaba David ko yangthsaba Solomon pohki roh-i du licho.

Rehoboam Kukhi

¹⁸ Rehoboam-nü Mahalat khyücho, au tsü David tsurü Jerimoth ko atpa tsü Jesse shümtsurü Eliab tsulatpü Abihail licho.

¹⁹ Arüh tsurü adhrerü asang licho: Jeush, Shemaria ko Zaham.

²⁰ Akhanglang abinü Absalom tsulatpü Maka khyücho ko arüh tsurü müyü licho: Abija, Attai, Ziza ko Shelomit.

²¹ Atümung yohrüta, Rehoboam anitpü dhürekeh ko ashamlarü rohre licho ko abi tsurü adhrerü mükyüpü keh ko atsularü rohre licho. Anitpü ko ashamlarü apüm yola abinü Maka alaa müicho,

²² ko atsurü apüm yola abükyü tsurü Abija alaa thucho ko abi mülih abi yangthsaba kangsohnung throchehcho.

²³ Rehoboam-nü dee lümzeh atsurüti khyang nguchi changnahjücho, ko Juda e Benjamin atbüticho yangditila arüh lisohcho. Abinü arüh khyang tsuyongnung changnah jücho ko khingkurüsü khyüjücho.