2 ROHTHÜP 1 - AMÜSA BAIBEL (BSI)

Solomon-nü Lümlong Chingcho

¹ Yangthsaba David tsurü Solomon-nü Israel yanglih drengdreng yohpücho ko Abüdongba abi Tsingrang-nü abi müwajücho ko abi dee disohcho.

² Yangthsaba Solomon-nü hajar michah ko thsih michah anüchirü, thsazirüti, tsutpula azibarüti ko müyurüti apüm te yuzeng khüdu,

³ Gibeon la mübüba müdüm lang abi yola wünung yuzengjücho. Arühnü wücho tunüo Abüdongba dikehrü Mosa-nü rangmü la külüpba Abüdongba shükuh tsü hütsüla licho.

⁴ (Ta Yuzeng Singdi tsülü Kiriat Jearim lanü singdi tsü hirode David-nü thsaba shükuh Jerusalem la licho.)

⁵ Imüyeng bholu khüi Hur shümtsurü ko Uri tsurü Bezalel-nü külüpcho, hütsüsü Gibeon la Abüdongba shükuh bete licho. Yangthsaba Solomon ko müyurütinü hütsüla mübücho.

⁶ Shükuh bete tsü yangthsabanü imüyeng bholu chah tsü Abüdongba khyang kangmübü jo mübücho; abinü kanglungrü hajar khüdu kyüsehcho ko hütsüchah apüm trüpcho.

⁷ Hütsü romang Tsingrangba-nü Solomon te chüro tsingdhingcho, “Ihnü nü khyang tu jüsohnyüro?”

⁸ Solomon-nü lalingcho, “Nühnü Iu David te amüi amülah ngusohko, ko ade abi mülih Ih yangthsaba kangsohko.

⁹ O Abüdongba Tsingrang, Nühnü Iu te nyengchocho tikehsohng. Nühnü müyurü hitoi michah Ih yangthsaba kangsohko,

¹⁰ hütsüeko arüh michah yangthsanung lümlong ko amüdhe jüng. Hütsüta müthsakhang Ihnü Nü müyurü hitoi michah khüta yangthsanung?”

¹¹ Tsingrangba-nü Solomon te yocho, “Nühnü athsalang throchehko. Nühnü kuthsi, nengse, nü rorüh süsohnung mahkhang kutsüp müching, ta I müyurü michah yangthsanung lümlong ko amüdhe chingko.

¹² Ihnü nü khyang lümlong ko amüdhe jünung. Hütsüchah lahkeh, tu yangthsarünü mülidhingcho ko hikosü mülidhingnung, Ihnü nü khyang kuthsi ko nengsesü jünung.”

Yangthsaba Tase ko Kuthsi

¹³ Hütsüpü Solomon-nü Abüdongba shükuh liba Gibeon la amübü müdüm tsü pehjüpü Jerusalem lang thalicho. Hütsüla abinü Israel michah yangthsacho.

¹⁴ Solomon-nü kuri akhüluba hajar khüdupü thsih müyü, ko khata kuri hajar dhüreanyünü rothsarü mülung külüpcho. Abinü khürü Jerusalem ko khürü apa yangditila yohpücho.

¹⁵ Abi chichah Jerusalem la hon ko taripi tsü lung roh-i ko cedar sing tsü Juda zong jingdümpila papasi sing roh-i thangchi bichicho.

¹⁶ Yangthsaba pohki anguchirünü Musri ko Cilicia lanü kuri,

¹⁷ ko Ijip lanü kuri akhüluba lihcho dhingyehcho. Arühnü Hit-rü ko Syria-rü khyang kuri akhüluba khüdula taripi 600 ko kuri khüdula taripi 150 ngang icho.