2 PETER 3 - AMÜSA BAIBEL (BSI)

Abüdongba Ronung Anyengchoba

¹ Amüi jünirüti, Ihnü nührü yang vathrah hinü anyüu thrahre. Vathrah anyüdingla yu hiri nengdang lümkehsohnü nührü lümlong amüsa thsümüsunung Ihnü müküpre.

² Ihnü nührü khyang papade amüsa azikehrütinü chocho yu, ko nührü riwürüti khu jüba Kangchehjüba Abüdongba yuzeng lümchehsohnyüre.

³ Achangka nyümongla mükhyahmürahnü jeng liba nyitsarü khürü chüronungepü nührünü akhu nyichehng. Arühnü nührü müthsamünyüjü

⁴ tsingdhingnung, “Abinü abi ronung nyengchocho mahrü do? Abi khülo? Ihsa jümürüti sükhangko, ta limih thridinü ade yingcheh lüpcho asusuh due!”

⁵ Papade Tsingrangba-nü yuzengjo ning ko alimih thricho müdhenü ahsanü yujeba tsü nyümre. Limih tsü kih lanü ko kih khunü thricho,

⁶ ko limih ahiba tsü kihmülüm kihnü thsangnyangjücho.

⁷ Ta ade liba ningti ko limih hisü michangnü changjünung nengdang Tsingrangba apu yuzeng khu khümcho yohpüre. Arüh tsü müyudsirü yukhaba ko changjüba nyümong nengdang yohpülire.

⁸ Ta amüi jünirüti, lang khüdu tünbüchü! Abüdongba jingte nyümong khüdu tsü kang hajar khüdu roh-i, ko kang hajar khüdu tsü nyümong khüdu roh-i du lile.

⁹ Khürünü münurü roh-i lümre, ta Abüdongba-nü apu anyengchocho nguchinung mümünure. Hütsü mahpü abinü-uthring nührü te rangchore, tunüo abinü süsü müchangsohnyüre, ta atümung lasih thsamüla rosohnyüre.

¹⁰ Ta Abüdongba Nyümong tsü aführü khüdu roh-i ronung. Hütsü Nyümong la ningtinü zii khong changpehnung, ko ningchah kehbati trüp-pehnung ko changpehnung, limih ko hütsüla liba lüpcho changpehnung.

¹¹ Hütsü roh-i hiri atümung changpehnung tsü, nüh tu kyorü nyitsarü thsanung? Nührünü Tsingrangba Nyümong yingde ko hütsü zah rosohnung atsauba nguchi,

¹² Nyümong khüi la ningti trüp-pehnung ko changpehnung ko ningchah kehbati adhsanü shenahnung, hiba nyümong nengdang yingde, nührü akang tsü müsa ko khakhuchüjo lieng.

¹³ Ta abinü nyengchocho roh-i: Ihsanü ning asi ko limih asi khüila amüsaba liro, hütsü nengdang yingre.

¹⁴ Hütsüeko jünirüti, nührünü hütsüba Nyümong nengdang yingde, Tsingrangba jingte amüsa ko achomükeh ko abi te atbachila ngunungthsa atsauba nguching.

¹⁵ Ihsa jünirü Paul-nü abi khyang jücho lümlong bichi nührü yanglang thrahcho roh-i, Abüdongba-nü nührü khümchosohnung shikhe atsa rangchonü jücho tsü dhing.

¹⁶ Khode abinü hiba yunah nengdang thrahcho, abinü abi vathrah atümung la hi nengdang yore. Abi vathrah la athsah khürü zehle, khüi amümüdherü ko lüm müjingrünü amüsa yuyung pa thsameh yocho kyo hütsürisü arahkheh changnah yore. Hütsüde arühbürü changnungthsa hirore.

¹⁷ Ta jünirüti, nührülü hi müdhepehko. Hütsünü, yuzeng müdrürü athsamehrü nyitsarütinü nührü jingdrang atsa lanü nümüla münotsisohnung nengdang müzahmüki lieng.

¹⁸ Ta Ihsa Abüdongba, Kangchehjüba Jisu Khrista müdheba ko abi achomang la mütozah zieng. Abi te ade ko lede ahechi thsaang! Amen.