2 KORINTRÜ 9 - AMÜSA BAIBEL (BSI)

Khristan Jünirü Shulüm Arüku

¹ Judea la yudsirü shulüm amübü mühehcho nengdang nührü te thrahnung tu dhsütah mühle.

² Nührünü künyangseh tronungepü Ihnü müdhele, ko Macedoniarü te Ihnü nührü nengdang müthseh choko. “Akaia la jünirütinü atsiba kangnü tronyü du lile” pü Ihnü yoko. Arüh adrong nührü alongphibanü thsümüsuko.

³ Ade jünirüti hiri rosohba hi, Ihnü nührü nengdang tu müthseh choko, hütsü adeng mükangsoh pü Ihnü yocho kyo nührü arüku tsü rungnüm ying.

⁴ Ta, I yola Macedoniarü khürü rokhang, ko tu rungnüm müngukhang nührü nengdang hütsütoi longlang choba tsü, nührü tsülü pehjüng, ta ihrü ashah khütoh-i thsanung!

⁵ Hütsünü hiri jünirüti tsehleh ronü nührünü nyengchoba amübü tsü rungnüm yasohnung adhsütah-epü Ihnü lümcho. Hütsütakhang, Ih rode hütsü rungnüm linung, hütsü khunü nührünü jünung lichonü jücho mah, ta jünyo jücho yuzi ngusohnung.

⁶ Sünü mütsi shunang abinü mütsi xanung; ko sünü bholo shunang abinü bholo xanung.

⁷ Nyitsarü müipinü susünü mah, khingnü mah, ta palunü lümchehcho roh-i jüng; tunüo künyangseh jücho Tsingrangba-nü müire.

⁸ Lede nührü dhsütah apüm kükyo linung, ko nguchi atsa apüm nengdang alaa linung shulüm, Tsingrangba-nü nührü dhsütah tenü alaa jünung kohle.

⁹ Amüsa yunü yocho kyo: “Abinü ailümrü khyang jüre, abi amüi li du lire.”

¹⁰ Tsingrangba sünü mashurü khyang majüh jüro, ko atsunung hümdhse jüro, abinü nührü dhsütah majüh apüm jünung, ko zisohnung ko nührü amüküp jüba khu khütang xasohnung.

¹¹ Nührünü lede amüi nguchi nguchichehnung nührü alirü kangsohnung, hütsünü nührü amübü khüi ihrü chahnü khyüchoro, hütsü nengdang adrongnü Tsingrangba senung.

¹² Hi nguchinü yudsirü dhsütah du desahrü mah, ta Tsingrangba khyang anengse jüba bholosohre.

¹³ Ko nührü nguchi yuzinü Khrista yuse nengdang yochonyiba, arüh ko aparü atümung te nührü amüküp changtacho khu adrongnü Tsingrangba khyang anengse jünung.

¹⁴ Tsingrangba-nü nührü te pathsa achomang ngucho nengdang arühnü amüila nührü shulüm dangkhidangnangjünung.

¹⁵ Benü müyochehba jiyü nengdang Tsingrangba neng seing!