2 KORINTRÜ 8 - AMÜSA BAIBEL (BSI)

Khristan Ajühba

¹ Jünirüti, Macedonia lithroti la Tsingrangba achomangnü tu nguchicho, hütsü nührü khyang müdhesohnyüre.

² Arühnü mütohba chongcha tsünü arüh khee thsadsüko; arüh khura iilümnye, arüh akünyang tsü dirachonü amüküp khütang jücho.

³ Arühnü arüh kohcho chah alasü jüchoepü Ihnü yuzi jüre.

⁴ Judea la yudsirü tronungba arühbürü lümyunü ihrü te kihchicho.

⁵ Hütsü ihrünü longdicho chah alaa thsacho! Abüdongba khyang arühbürü akhu jücho; hütsüpü, Tsingrangba-nü lümchonü arühbürü ihrü khyangsü jücho.

⁶ Hütsünü hiba nguchi dikehba amüi nguchi hi thüm nguchinung Titas te ihrünü kihchicho.

⁷ Apüm la nührü dee alirüe: yudsi la, choba la, lümlong la, tronyüba la ko ihrü müinung la. Hütsünü hiba amüi nguchila mii müxükehpü trosohnyüre.

⁸ Ihnü yuzeng khüdu roh-i müjüre. Ta aparünü tronyücho kyo, nührü amüi tsü tu roh-inang müdhenyüre.

⁹ Nührünü Ihsa Abüdongba Jisu Khrista achomang müdhele; abi alirü thsanye abi iilümcho khu, nührü alirü kangsohnung khyanglangnü abi ailümrü kangcho.

¹⁰ Nührünü atsiba kang dikehba nguchi tsü adelü thümpehnung atsaubaepü lümre. Nguchinung du mah, ta nguchinyünung mii nührü akhu thsacho.

¹¹ Hütsüeko nguchi hütsü thümpehnung, ko nührünü dhrongcho roh-i nührü lichonü, hütsü thümnung müküpm.

¹² Nührünü jünyo lümkhang, nührü mülicho mah, ta nührünü jünyücho aichi Tsingrangba-nü khyüchonung.

¹³ Aparü tronung Ihnü nührü khyang bhamüling jürü mah;

¹⁴ ta nührü thangchi lichonü, sürü dhsa liro arüh tronung athsalang. Hütsükhang, nührü dhsa lide arüh thangchi likhang, arühnü nührü tronung. Hütsüta anyüding phülari bichieng.

¹⁵ Amüsa yunü yocho kyo, “Sünü khütang khyübülungcho abi alaa mühle, ko sünü aikyah du khyübülungcho abi mükükyü mühle.”

Titas ko Amüyangrü

¹⁶ Titas mii ihrü kyo nührü tronyü kangsohcho shulüm ihrünü Tsingrangba sere!

¹⁷ Abinü ihrü kihchicho khyüchocho du mah, ta khütang tronyü apu lümyunü nührü yang noronung dhrongchehcho.

¹⁸ Abi yola jünirü, sü abi yuse atsa thsingyuba la lithroti apüm la adangchi liro abi rosohre.

¹⁹ Hütsü du mah, ihrünü tronyücho ngusohnung, ko Abüdongba ahechi khyanglangnü ihrünü hiba amüi nguchi nguchide ihrü yola shitsehsohnung lithrotinü mii abi throchehcho.

²⁰ Ihrünü amüküp mübü hi khehthsithsade sünüsü ihrü mümülangjünung nengdang dee müzahre.

²¹ Abüdongba jingte du mah, ta nyitsarü jingtesü yuje du nguchinung ihrü nahdhingkeh.

²² Hütsünü Ihsa jünirü arüh yola rosohre; Ihrünü adrongpi abi thsadsüdhingko, ko abi atrotarü atsae. Ko ade abinü nührü chah khütang longlangchonü, abinü alaa du nührü tronyüre.

²³ Titas tsü, abi nührü tronung nguchi la Ite müjang nguchirü ko abi yola rorüh jünirüti tsü, lithroti nengla rore, ko Khrista khyang ahechi hirore.

²⁴ Ihrünü nührü nengla müthsehba tsü lithroti apümnü yudsisohnung, nührünü arüh te amüi ngung.