2 KORINTRÜ 6 - AMÜSA BAIBEL (BSI)

¹ Tsingrangba te müjang nguchinü, nührü sürünü Tsingrangba achomang khyüchocho, hütsü amükang tükangsoh pü ihrünü kihchire.

² Tsingrangba-nü yore: “Ih nührünü dhsütah shikhela, Ihnü nührü te nyiko; Nührü khümchonung nyümongla, Ihnü nührü troko.” Dhing! Ade akhyüchochehnung shikhe; Dhing! Chünye akhümchonung nyümong!

³ Ihrü nguchi la sü khyangsü amüthsalang müdhingchehsohnyüre, hütsünü süsü mümüthikehsohnung ihrünü müküpre.

⁴ Hütsü mülih, chongcha, bhamüling, ko adhsangthsi hiri rangchochonü lüpcho la ihrü Tsingrangba dikehrü kyo ngusohnung müküpre.

⁵ Ihrü lahcho, rangyohcho, ko becho; alaa nguchisohcho ko müyüpmüsüsoh mahkhang mütsumüyongsohcho.

⁶ Ihrünü Tsingrangba dikehrü roh-i amüsa, lümlong, arangcho, ko achomang, Anbü Amüsa la ihrü yuje amüi,

⁷ yuje choba, ko Tsingrangba zii khu ihrünü ngusohcho. Amüsaba tsü ihrü nengdang tsalang ko fülilang tsungtising thsunohrü lile.

⁸ Ihrü dhichicho ko sehticho; ihrü nyüpmüsehcho ko nengsecho. Ihrü arahkhehrü kangsohcho, ta ihrünü yuje chore;

⁹ mümüdherü roh-i, ta atümungnü ihrü müdhecho; ihrü asücho roh-i thsacho, ta dhing, ihrü akang lile. Khingchinye, ihrü mümüpseh;

¹⁰ wahrü roh-i, ta ihrü lede künyang lile; iilümrü roh-i, ta ihrünü adrong alirü kangsohre; tu mülirü roh-i, ta ihrü lüpcho lile.

¹¹ Korint la Jünirüti! Nührü te ihrünü khohcheh chore; nührü te ihrü lasih müza khangthru lile.

¹² Nührü te ihrü lasih müngurü mah; ta nührü lasih ihrü te khangtire.

¹³ Ade, nührü te I tsurü roh-i chotare: Ihrünü nührü te tsacho kyo nührünüsü ihrü te tsaang. Nührü lasih khangthrung.

Müyudsirünü Nümülanung Amüzahnung

¹⁴ Müyudsirü te tütrümta. Tunüo amüsa e amünyi nyüh tu la phishutachehnung? Atsingse e ama nyüh tu la müjangnung?

¹⁵ Khrista e Motsing nyüh tu la kehtachehnung? Müyudsirü te yudsirü tu nohlüm liro?

¹⁶ Müyudsirünü kyothri te Tsingrangba amübükuh tu la kihtachehnung? Tunüo Ihsa akang Tsingrangba amübükuh lile! Tsingrangba-nü yocho roh-i: “Ih arüh yola linung ko tsehchinung, Ih arüh Tsingrang thsanung, ko arüh I müyurü thsanung!”

¹⁷ Hütsünü Abüdongba-nü yore, “Nührünü arüh pehjüng, ko nührü jangjang arüh tenü zaang. Ko amümüsa tu tüthahchi; khang Ihnü nührü khyüchonung.

¹⁸ Ih nührü Au kangnung, ko nührü I tsurü ko tsularüti kangnung Akohba Abüdongba-nü yore.”