2 KORINTRÜ 5 - AMÜSA BAIBEL (BSI)

¹ Tunüo limih la ihrü lichah shükuh hi thsangnyangnye, Tsingrangba chahnü khehnü müthsacho lede nengdang ninglanglih la kuh khüdu lilepü ihrünü müdhele.

² Ade ninglanglih kuh tsü ihrünü müpinung nahmürahre;

³ hütsü müpikhang ihrü tbhüdeng müngunung.

⁴ Hiba limih shükuh la lidelü ihrü lümtohchonü chüpseh rühchire; hütsü ihrünü limih shutsa lanü zanyürü mah; ta asüba tsü akangnü mülihnung nengdang ninglangrü shü tsü ihrünü müpinyüre.

⁵ Hütsü mülichinung tsü Tsingrangba-nü rungnümjüre, ko abinü abi Anbü hiri apüm nengdang yuzithsajücho.

⁶ Hütsünü ihrü lede rezeh lile. Ihrü afü kuh la li yingcheh ihrü Abüdongba kuh tenü za lilepü ihrünü müdhele.

⁷ Tunüo ihrünü anguchonü mah, ta yudsinü tsehre.

⁸ Ihrünü afü kuh lanü za Abüdongba te kuh la linung ihrü dee rezeh lile.

⁹ Hütsünü ihrü kuh la linye, mahkhang tsinye, abi künyangsohnung tsü ihrü nahdhingkeh lile.

¹⁰ Tunüo Ihsa atümung Khrista yukhaba bete yanung. Nyitsarü müipi afü la lide nguchi aichi, atsanye amütsanye, aleng ngunung.

Khrista khu Tsingrangba te Shangrüthsa

¹¹ Abüdongba drünung tsü tunang ihrünü müdhechonü, ihrünü aparü kihchonung müküpre. Tsingrangba-nü ihrü longi müdhele, ko nührü lasih la Ihsü müdhenung longdire.

¹² Nührü te anyüpili ihrübürü yuzi jünung müküprü mah; ta sürünü lasih müdhingpü atsah dhing mülahro, arüh te nührünü lalingchehnungthsa ihrünü yuzi atsa jünung müküpre.

¹³ Ihrü mükyangkhang hütsü Tsingrangba khyanglangnü; ihrü lümlong nyüje likhang, hütsü nührü nengdang.

¹⁴ Khrista amüinü ihrü rahre, tunüo atümung nengdang nyüh khüdu süchoepü ihrünü khyüchore, adüzü nührü atümung abi te sücho.

¹⁵ Sürü akang liro arühbürü nengdang akang mülire, ta arüh nengdang süpü kangliba nengdang akang lire, tunüo atümung shulüm abi sücho.

¹⁶ Hütsüeko, adelü Ihsanü süsü shutsa lahpinü yu mükhare; khüdupi Ihsanü shutsa lahpinü Khrista yukhanye, adelü hütsüta münguchire.

¹⁷ Hütsünü, khode nyüh khüdu Khrista la linang abi akang asi khüdu; ahiba akang tsü khuko, akang asi dikehko.

¹⁸ Hiri apüm Tsingrangba-nü nguchicho, tunüo Ihsa arorüh licho, ta Khrista khu abi shangrü kangsohcho, ko aparüsü abi shangrü kangsohnung Ihsa khyang nyümkehjücho.

¹⁹ Tsingrangba-nü Khrista khu amüi tsurü apüm abi shangrü kangsohba tsü ihrü yusi lile. Tsingrangba-nü arüh münyiti mükhichi ko abinü khüta arüh tsü abi shangrü kangsohcho, hütsü yoba yusi tsü ihrü khyang jücho.

²⁰ Hütsünü, Tsingrangba-nü abi akihchiba ihrü khu müthehcho kyo, ihrü Khrista nengdang langbürü lile. Ihrünü Khrista nengla kihchire, Tsingrangba te kehta lieng.

²¹ Khrista la ihrü Tsingrangba amüsaba tsü kangnung nengdang, sünü amünyi mümüdhecho, abi ihrü nengdang amünyi kangsohcho.