2 KORINTRÜ 3 - AMÜSA BAIBEL (BSI)

Azengtacho Asi Dikehrü

¹ Hinü ihrü anyüpiu ihrübürü nengdang mülahcho ngusohrü mah-o? Mahkhang aparü khürü roh-i nührü yanglang mahkhang nührü chahnü yuzi vathrah dhsütahrü mah-o?

² Atümungnü müdhenung ko khinungba, nührübürü tsü ihrü lasiking la yuzi vathrah lile.

³ Hiba vathrah tsü Khrista apunü thrahcho ko ihrünü müthehcho. Hütsü ngakinü mah, ta akang liba Tsingrangba Nbünü thrahcho, lungtpah la mah nyitsarü lasih la thrahcho.

⁴ Ihrünü hi Khrista khu Tsingrangba chah longlangchonü yore.

⁵ Hi nguchinung ihrübürü chah suhre tu mühle; ihrü suhre tsü Tsingrangba chahnü lile;

⁶ Thrahnü liba asi azengtacho dikehrü kangnung abinü ihrü kükyüsohko. Thrah licho yuzengnü asü hirore, ta anbünü akang jüre.

⁷ Yuzeng tsü lungtpah chah threhkeh thrahcho, ko hütsü jüde Tsingrangba ahechi chürocho. Mosa romih chah atsingse tsü chang tsinye, hütsü zirachonü Israelrünü abi chah mükoh dhingkehcho. Asü hiroba yuzeng jüde mii hütsütoh-i hechichokhang,

⁸ Anbü nguchilü khütoh-i alaa adiu thsanung!

⁹ Mülangjüba hirode mii hechichokhang; akangcheh hirodelü khütoh-i alaa hechinung!

¹⁰ Ihsanü yonungnü ade alaa ahechi lichonü atsiba ahechi tsü khukopü yonung.

¹¹ Tunüo azachah du liba mii hechikhang, müchangkaba la tsü khütoh-i alaa hechinung!

¹² Alongdi hi lichonü, ihrü müci dee mülahre.

¹³ Israelrünü achangka ahechi chah müdhingsohnung khüta Mosa-nü apu romih müshüticho hütsü roh-i ihrü mah.

¹⁴ Ajüje, arüh lümlong müshütiko; ko chünye yingcheh arühnü ahi azengtacho khide hütsüba tsünü arüh lümlong müshütire. Hütsüba amüshütising tsü mükhyopehpü lile, tunüo Khrista khu dunü hütsü khyopehnung.

¹⁵ Chünye yingcheh arühnü Mosa yuzeng khide arüh lümlong müshütire.

¹⁶ Ta khode nyüh khüdunü Abüdongba yang ximülanang, hütsüde hütsüba amüshütising tsü khyükhure.

¹⁷ Ade hila “Abüdongba tsü” Anbü lile; ko khüde Abüdongba Anbü liro, hütsüla nyüje lile.

¹⁸ Hütsünü, Ihsa atümung romih mümüshütipü Abüdongba ahechi tehkehre; ko Abüdongba, sü Anbü liro abi chahnü hütsüba ahechi ronü müchangkaba ahechi adiuba khüdunü Ihsa abi kyocho la mülichijüre.