2 KORINTRÜ 2 - AMÜSA BAIBEL (BSI)

¹ Hütsünü Ih nührü yang anyüpiu ronü nührü müwahsohnung dhrongchehcho.

² Tunüo nührü wahsohkhang Ih künyangsohnungthsa nührü chah khu sü liro?

³ Hütsünü Ih künyangsohrü müwahsohnungpü lümchonü Ih nührü yang mürochoepü thrahcho. Tunüo khode Ih künyang linang nührüsü künyangrepü Ihnü müdhecho.

⁴ Tunüo I lüm tohseh ko lasih dhsanü nahshükih khütang threh nührü yang thrahcho; hütsü nührü wahsohnung mah, ta Ihnü nührü khütoh-i müiro, hütsü nührünü lümchehsohnung nengdang lile.

Thsamehrü Khyang Mülang Pehjücho.

⁵ Khürünü khürü wahsohkhang, hütsü Ih wahsohrü mah, ta lango la nührü apüm wahsohre. (Ihnü khiyu tsü alaa mümülingsohnyüre.)

⁶ Hütsüba nyitsarü tsü nührü adrongunü hütsüta khingchiba tsü akükyüe.

⁷ Ta abi wahseh müshehlinungthsa, nührünü abi mülang pehjüng, ko thsüching.

⁸ Hütsüeko nührü atümungnü abi müicho müdhesohngpü Ihnü nührü te kihchire.

⁹ Tunüo nührünü lüpchola ayocho nyirü a mahnang müdhenung Ihnü nührü yang thrahcho.

¹⁰ Nührünü nyüh khüdu mülang pehjüde, Ihnüsü abi mülang pehjüre. Khode Ihnü pehjüro, Ihnü pehjüba tsü Khrista jingte nührü khyanglangnü,

¹¹ Satan-nü Ihsa michah tulasü mükohnung nengdang pehjüre; tunüo abi rah Ihsanü müdhele.

Troas la Paul Lümtohcho

¹² Khrista Yuse Atsa thsingyunung Ih Troas chihde, hütsüla nguchi nengdang Abüdongba-nü lang khangthru licho Ihnü ngucho.

¹³ Ta hütsüla anirü Titas müshirüchonü Ih dee lümtohcho. Achotsü Ihnü hütsüla lirü te cho-nahee pü Macedonia lang wücho.

Khrista khu Akohba

¹⁴ Ta Tsingrangba seing! Tunüo Khrista la Tsingrangba-nü lede ihrü akohba lang nüre, ko abi müdheba axümlichi tsü ihrü khu apümlang sobhore.

¹⁵ Tunüo khümcho lirü ko sürü chang tsirü arüh yola ihrü tsü Tsingrangba khyang Khrista-nü axümlichi mübücho kyole.

¹⁶ Achang tsirü nengdang hütsü asüba axümlichi, ta khümcho lirü nengdang hütsü akang jüba axümlichi lile. Hiri nguchichehnung sü liro?

¹⁷ Aparü adrong, sürünü Tsingrangba yu shiyüpthsa ichiro, arüh roh-i tsü ihrü mah; ta Tsingrangba-nü müthehchonü ihrünü abi jingte Khrista dikehrü roh-i yuje chore.