2 KORINTRÜ 13 - AMÜSA BAIBEL (BSI)

Achangka Amüzahnung ko Aza Yu

¹ Ade hinü asangpiu nührü xodhingnung Ih rore. Amüsa yunü yocho kyo, “Khiyu masü khüdu khanung yuzi anyüh mahkhang asang adhsütah.”

² Akhulang amünyi shitpahrü ko aparü atümung te Ihnü yonyüre; Ihnü akhulang nührü anyüpiu xodhingdesü yoko, ta nührü tenü za lidesü yore: Ih hiko rodelü süsü müchomangnung.

³ Khrista-nü Ih khu nguchirepü nührünü khyünyüba yuzi apüm ngunung. Abinü nührü te chotade, abi sumüzeh mah; ta, abinü nührü yola abi zii ngusohre.

⁴ Tunüo sumüzehbala abi hamkehnye, abi Tsingrangba zii khu akang lile. Abi chah ihrüsü sumüzeh; ta nührü te Tsingrangba zii khu abi akang changtanung.

⁵ Nührü yudsi la lirü a mahnang müdhenung nührü jangjang thsadsüdhing. Nührü müshohjopü likhang, Jisu Khrista nührü chah lilepü nührünü longi tsüple.

⁶ Ihrü amükoh ngurü mah pü nührünü müdhenung Ihnü longdire.

⁷ Nührünü amüthsalang münguchisohnung, ihrünü Tsingrangba te dangkhidangnangjüre, hütsü ihrü akoh ngucho ngunungba mah, ta ihrü amükoh ngunye, nührülü athsalang nguchisohnung nengdang lile.

⁸ Tunüo ihrünü yuje chah khu hütsü nyüm tusü nguchinung mükoh.

⁹ Ihrü sumüzehnye nührü re zehchonü ihrü künyangre. Ko nührü dekhing kangnung nengdang ihrünü dangkhidangnangre.

¹⁰ Ih khode nührü yang ronang, nührü thsangnyangjünung nengdang mah, ta külüpkehjünung Abüdongba-nü tase jüba tsünü nührü zi mükhatanung nengdang Ih nührü tenü za lidenü hi nührü te thrahre.

¹¹ Achangkala, jünirüti, Salüm na. Adekheng kangnung müküpm; Ihnü thsüchicho nyieng; kehta lieng; ko atbachi la lieng. Amüi ko atbachi Tsingrang nührü te lieng.

¹² Khüdunü khüdu te amüi salüm jütaang.

¹³ Amüsarü atümungnü nührü te salüm müdhesohre.

¹⁴ Abüdongba Jisu Khrista achomang, Tsingrangba amüi ko Anbü Amüsa azehba nührü atümung te lieng.