2 KORINTRÜ 11 - AMÜSA BAIBEL (BSI)

Paul ko Arahkheh Riwürüti

¹ Ihnü amüsithsa azikyah nguchicho la nührünü rangchosohnyüre. Yanglilüm rangchoung!

² Tsingrangba kyo, Ihnü nührü nahmohre; tunüo nührü tsü amüthsengcheh lazarü khüdu, Ihnü dhrezarü khüdu, Khrista apu khyang müxingjücho kyo lile.

³ Ta mürünü arah khu Eve kihyochücho kyo, Khrista müiba nührü lasih tsü nümüla tsinung lümxüjüre.

⁴ Khürünü nührü te Jisu apa khüdu thsingyukhang, mahkhang nührünü khyücho liba tenü apa anbü khüdu ko apa yuse atsa khüdu thsingyukhang, nührünü mülakhüti nyire!

⁵ “Riwürüti” pü nührünü dsiba hütsüri tenü Ih tu azauba mah pü ihrünü lümre!

⁶ Ih achonung la yuthrungrü mahnye, lümlong lalü hütsü roh-i mah. Bekhyah apüm la ihrünü hi nührü te müdhesohko.

⁷ Ihnü nührü te yuse atsa thsingyude angang tusü müching; nührü disohnung nengdang Ipu jangjang aikyah kangcho. Ihnü hütsü amüthsalang nguchicho do?

⁸ Ih nührü yola nguchide, Ih aparünü angang jücho. Nührü tronung nengdang Ihnü aparü Lithro lanü rohchocho.

⁹ Ko Ih nührü yola lide, I müdsimüku nengdang nührü mülongmüzi; I dhsütah apüm Macedonia lanü rorüh jünirünü lüpcho hirojücho. Atsicho la roh-i aronung lasü Ihnü khodesü nührü mülongmüzinung!

¹⁰ Khrista yuje tsü I chah lichonü Akaia apümlang Ih kükhingba tsü müzahnungepü Ihnü nyengchore.

¹¹ Ihnü nührü mümüichonü hi yorü mah-o? Ihnü nührü müirepü Tsingrangba-nü müdhele!

¹² Aparü riwürüti arüh müthsehba yuziti lanü yatinung ko ihrünü tu nguchiro arühnüsü hütsü du nguchirepü choba lanü yatinung shulüm, Ihnü ade tu nguchiro hütsü mütozah nguchinung.

¹³ Arüh arahkheh azikehrüti, arühnü arüh nguchi nengdang arahkheh yu chore, ko Khrista riwürütiesohnung arühnü tsahthrimülapü nguchire.

¹⁴ Hi tu nyemüyangnung mühle! Satan-nü mii atsingse ninglang riwürü kyo ngusohnung tsahthrimülare.

¹⁵ Hütsünü abi dikehrünü abürü jangjang amüsaba dikehrü kyo tsahthrimülaba tsü tu athsah mah. Achangka la arüh nguchi aichi arühnü ngunung.

Paul Chongcha

¹⁶ Ihnü loli yore: Ih amüsithsaepü sünüsü tülüm. Ta nührünü hütsü roh-i lümnye, Ihsü thridusü kükhingnungthsa, Ih amüsithsa roh-i khyüchoung.

¹⁷ Ihnü yoba hilü Abüdongba-nü yosohchoba mah; hiba kükhingnung khiyu la Ihnü amüsithsa khüdu kyo chore.

¹⁸ Ta adrongnü shutsa khyanglangnü müthsehchonü, Ihnüsü hütsü roh-i nguchinung.

¹⁹ Nührü lümlong lichonü, amüsithsarü te künyangseh rangchore!

²⁰ Nührü ayurü kangsohnye, nyüpmüsehnye, xohsohnye, mükhimüngunye, mahkhang romih chah tangnye, nührünü rangchore.

²¹ Hütsüta nguchinung ihrü dee alü thsachoepü yonung Ih shahre! Ta khürünü lango la müthsehnung lümkhang, amüsithsa khüdu roh-i Ihnü chore. Ihnüsü hütsüta nguchinung kohle.

²² Arüh Ibrirü ang? Ihsü mado. Arüh Israelrü ang? Ihsü mado. Arüh Abraham chahnü ang? Ihsü mado.

²³ Arüh Khrista dikehrüti ang? Ih amükyangrü kyo chore, ta Ih arüh tenü dikehrü atsau! Ihnü alaa khee nguchiko, arangyoh la alaa liko, I chah alaa xüpko, ko adrongpi Ih sümüphohko.

²⁴ Müngapili Jihudarünü sangrepü dükupi I chah xüpcho;

²⁵ Asangpili Romrünü idhsenü I chah xüpcho; ko khüdupi lungnü kengseh kengcho. Kihkuh thsangnyang la asangpili zehcho, ko khüdupi Ih rehtseh mükyüpü müyü kih la dhsang licho.

²⁶ Ih shitseh adrongla kihmülüm, fükhohrü abürü nyitsarü, ko yangpirü dhsürü la licho; yangdila, lipilih la, kih la ko arahkheh shangrüti kheh la dhsürü la licho.

²⁷ Kheseh nguchinü adrongpi müyüpmüsünü; yangseh xosehnü; adrongpi kongseh, atsikehchah müli tbhüdeng licho.

²⁸ Ko apa mahpü, lithroti shulüm nyümong müthe bhamüling tsünü Ih nii licho.

²⁹ Khürü sumüzehkhang, Ih mii sumüzeh kangre; khode khürü amünyi shitpahnang, Ih wahsehre.

³⁰ Ihnü müthsehnungkhang, Ih mükumüru shulüm müthsehnung.

³¹ Ihnü mahpü Tsingrangba, Abüdongba Jisu Aunü, Ih mürahkherepü müdhele. Müchangkapü abi seing!

³² Ih Damaskas la lide, Ih rangnung Yangthsaba Aretas pohki governor tsünü yangdi tbükhüm nyahsohcho.

³³ Ta züdi la akhi khüdu khu loh lanü Ih dhichahchücho ko abi kheh lanü tsichehcho.