2 KORINTRÜ 10 - AMÜSA BAIBEL (BSI)

Paul-nü Apu Alanglang Yore

¹ Ih, Paul-nü nührü te Ipu nengdang kihchire. Ih nührü yola lide alonglüm ko aküna, ta nührü tenü za lide akako. Khrista alonglüm ko aküna ko amüi khu Ih nührü yanglang rode zii müchürosohnung kihchire;

² tunüo ihrünü shutsa lahpinü nguchirepü yoba nyitsarüti telü Ihnü zichüro chotanungthsa kangnung.

³ Ihrü limih la linye, ihrünü limih nahdhingkeh lahpinü mükhatare.

⁴ Ihrünü khatade bichiba thsunohrü tsü alimih yo mah, ta roshengvi thsangnyangjüba Tsingrangba thsunohrü lile.

⁵ Ihrünü arahkheh yurehta thsangnyangjüre; ko Tsingrangba lümlong yatiba ihrünü khülusohre; Ihrünü alümcho apüm rahseh Khrista yocho nyisohre.

⁶ Nührü ajeng yochonyiba yuzi ngupü khanglang, yocho mühnyiba atümung khingchinung rungnüm lile.

⁷ Nührünü amichah atsah dhingre. Khürünü abi Khrista monoepü lümkhang, ihrü roh-i abisü Khrista mono pü ajangjang lümchehsohng.

⁸ Tunüo Abüdongba-nü jüba tase, khüiba tasenü nührü changjünung mah, ta külüpkehjünung liro, hütsü nengdang Ihnü thri alaa müthsehpü linye, Ihnü tu müshahre.

⁹ I vathrah tsü nührü drüsohnung thrahrepü mülümsohnyüre.

¹⁰ “Paul vathrah hi dee amüling ko rezeh lile, ta khode abi Ihsa yola zehnang, sumüzeh, ko abi yu tsü mah pü khürünü chonung!”

¹¹ Za lide vathrah la thrahcho roh-i, nührü yola lidesü ihrünü nguchirepü hitari nyitsarünü nyichehng.

¹² Sürünü arühbürü jangjang dee thseng lümro, arüh te ihrünü mütohtare mahkhang mükitare. Arühbürü kidhingnung arühbürünü külüpre, ko arühbürü jingkihnü arühbürü yukhare.

¹³ Ta ihrü nengdanglü, alaa mükükhingnung; Tsingrangba-nü ihrü khyang nührü yola nguchinung re kihsah yohpüjüle.

¹⁴ Ko nührüsü hütsüba akihsahcho la tsü zehchonü, nührü yang ihrünü Khrista Yuse Atsa hirode, hütsü chah alaa mükhutsicho.

¹⁵ Hütsünü, Tsingrangba-nü ihrü khyang kihsahjücho khu aparünü nguchicho nengdang ihrünü mümüthseh. Ta, nührü yudsi ziinü, Tsingrangba-nü kihsahjücho la tsü, nührübürü yola alaa adiu nguchinung ihrünü longdire.

¹⁶ Hütsükhang, ihrünü nührü khu aparü lüm la yuse atsa thsingyunung ko aparü luh la nguchicho nengdang mümüthsehnung.

¹⁷ “Sünü müthsehro abinü Abüdongba-nü tu nguchicho hütsü nengdang müthsehng.”

¹⁸ Tunüo abürü jangjang tsalepü sechonü khyüchorü mah, ta Tsingrangba-nü tsalepü sechonü khyüchore.