2 JOHAN 1 - AMÜSA BAIBEL (BSI)

¹ Aziba chahnü— Amüiba sangpi ko atsurüti, Ihnü dee müthsümbarü yang. Ko I mülengnü mah, ta sürünü yuje müdhero arüh atümungnü nüh müire,

² tunüo yuje tsü Ihsa chah lile ko Ihsa chah lede linung.

³ Au Tsingrang ko Jisu Khrista chahnü achomang, yanglilüm ko atbachi tsü yuje ko amüila Ihsa te lisohng.

Yuje ko Amüi

⁴ Aunü Ihsa khyang yuzi jücho roh-i, nü tsurü khürü yuje la licho ngu Ih dee künyangre.

⁵ Hütsüeko Ihnü nüte tsingdhingre, amüi sangpi: Ihsa atümung khüdunü khüdu te müitanung. Ihnü nü yanglang yuzeng asi thrahrü mah; ta hiba hi adikeh lanü licho yuzeng khüdu due.

⁶ Ihnü choba amüi tsü Tsingrangba yuzeng te ayocho nyi linung nengdang lile. Ko nührünü adikeh lanü yuchiba yuzeng tsü hi: Nührü atümung müita lieng.

⁷ Jisu Khrista tsü shutsa la müro pü yorü limih la khütango chüroko. Hitari nyitsarü tsü kihyochüjürü ko Khrista arorüh lile.

⁸ Nührü nengdang ihrünü tu nguchicho hütsü müchangnung, ta nührü ajingcho ngunung nengdang, nührünü müzahmükieng.

⁹ Sünü Khrista adobala mülipü alaa tsiro, abi chah Tsingrangba mühle; sü adoba la liro, abi chah Au ko Atsudhre anyüding lile.

¹⁰ Hütsüeko, khürü nü yanglang hiba adoba mülipü rokhang, nührü kuh la abi tünüyoh, “Salüm” mii tüthsa.

¹¹ Sünü abi te salüm thsaro abisü amünyi nguchi la nohlüm khyüre.

Achangka Yu

¹² Nüte ayonung yu adrong lile, ta Ihnü thrahva ko ngakinü müthrahnung, hütsümüli nü yanglang ro Ihjübünyü shirüta chotanung Ihnü longdire, hütsüpü du Ihsa akünyang kükyünung.

¹³ Nühnü müiba jünilarü tsurütinü salüm müdhesohre.