1 YANGTHSARÜTI 9 - AMÜSA BAIBEL (BSI)

Tsingrangba-nü Solomon te Thali Shirücho

¹ Yangthsaba Solomon-nü Amübükuh ko yangthsaba kuh ko abinü thsanyücho apüm thümpü,

² Gibeon la kyo Abüdongba-nü Solomon te anyüpiu chüro shirücho.

³ Abüdongba-nü abi te yocho, “Ihnü nü dangkhidangnang yuchiko. Ko lede Ih mübünung nengdang nühnü thsaba Amübükuh tsü Ihnü müsachehjüko. Ihnü hütsü lede dhingyehnung ko tsungtinung.

⁴ Nüu David kyo nühnü yuje cho Ih dikehkhang ko nühnü I yuzeng ko amülaba apüm bichikhang,

⁵ Ihnü nüu David te abi trahnü lede Israel la yangthsanungepü nyengchoba tsü Ihnü yohpünung.

⁶ Ta nüh ko nü trahnü I khanglang mürokhang, nührünü I yuzeng ko amülaba mübichikhang ko aparü tsingrang mübükhang,

⁷ Ihnü jüba lih la tsünü Ihnü I müyurü Israelrü khyümüipehnung. Ko I mübüji thsanung Ihnü müsachehba Amübükuh hi mii Ihnü pehjünung. Limihrünü Israelrü mülangjü chonung ko mütsa bichinung.

⁸ Hiba Amübükuh hi trümnah khülunung ko alahkhurü atümung nehnü nyeka yonung, ‘Tuepü Abüdongba-nü hiba lih ko hiba Amübükuh chah hita nguchicho?’

⁹ Hütsüde nyitsarütinü lalingnung, ‘Ijip lanü nüchehba arüh jümürü Tsingrang Abüdongba, arühnü thrüchahchüpehchonü hita tikehko. Arühnü apa tsingrangti mübücho, hütsü khu Abüdongba-nü arüh michah hiba achangba hirojücho.’”

Hiram te Solomon Anyengchotacho

¹⁰ Solomon-nü Amübükuh ko yangthsaba kuh thsanung kang mükyü khyücho.

¹¹ Tyre la yangthsaba Hiram-nü cedar sing, kee sing ko hon apüm chixicho. Hütsü rungnümpü, Solomon-nü Galil mükyah lanü Hiram khyang yangdi mükyü jücho.

¹² Hiram-nü hütsüri dhingnung wücho ta abinü hütsüri mükhyünyücho.

¹³ Achotsü abinü Solomon te yocho, “Anirü, nühnü I khyang jüba yangditi tsü hiri mah-o?” Hütsünü, hütsüba mükyahte “Kebal” dsicho, adüzü, amii müliba lih.

¹⁴ Hiram-nü Solomon khyang hon süreh hajar müyü chah alaa mühehcho.

Solomon-nü Nguchichehcho Apa

¹⁵ Yangthsaba Solomon-nü Amübükuh, yangthsaba kuh, yangdi nyüchürolang alih sühnung ko yangdi tbü külüpnungla hehnehthsarü khyücho. Abinü Hazor, Megido ko Gezer yangditi külüpnung nyükheh tsü bichicho.

¹⁶ (Ijip yangthsabanü Gezer yangdi tsü mahnü hütsüla lirüti kyüsehcho ko kuh tahjo yangdi tsü mahchehcho. Hütsüpü atsulatpü Solomon te kukangde hütsü atsulatpü khyang jiyüthsa jücho,

¹⁷ ko hütsü Solomon-nü thsachicho.) Abi müyurü nyükheh bichi, Solomon-nü Ajinglangba Beth Horon,

¹⁸ Balath ko Juda akungaselih liba Tamar,

¹⁹ abi tsuyongba khyübülungji yangditi, kuri ko kuri akhüluba yangditi ko Jerusalem, Lebanon ko abi yanglih masüla abi thsanyücho apüm la thsacho.

^20-21 Abi pohki hehnehthsarüti, Israelrünü arüh lih mahchehde mükyüsehba Kanan-rü hung bichicho. Arüh tsü: Amor-rü, Hit-rü, Periz-rü, Hiv-rü ko Jebus-rü, hiri tsü ade yingcheh arüh yurü kang bichire.

²² Solomon-nü Israelrülü ayurü mükangsoh; arüh tsü rothsarü, adirü, anüchirü, kuri akhüluba anürü ko kuri nüchinung la bichicho.

²³ Solomon kuthsaba papa la hehnehthsarüti dhingyehrü adirü 550 licho.

²⁴ Solomon-nü yangdi nyüchürolang alih tsü, anitpü, Ijip yangthsaba tsulatpü tsü David yangdilanü Solomon-nü abükyü nengdang thsajüba kuh la tsü züdupü khanglang du sühnung dikehcho.

²⁵ Solomon-nü Abüdongba khyang külüpjüba bholu chah tsü kang la asangpi trüp mübü ko akehta mübü mübücho. Abinü Abüdongba khyang müchijisü trüpcho. Hütsüta abinü Amübükuh tsü rungnümcho.

²⁶ Yangthsaba Solomon-nü Edom lih la, Amohkih bekhümla, Elath münyeh Eziongeber la khata kihkuh külüpcho.

²⁷ Yangthsaba Hiram-nü Solomon nyitsarü trosohnung abi kihkuh la axangchehrü khürü müthehcho.

²⁸ Arühnü Ofir lih lang kih lanü wücho ko Solomon khyang hon süreh hajar dhüremüyü chah keh hirojücho.