1 YANGTHSARÜTI 8 - AMÜSA BAIBEL (BSI)

Amübükuh la Yuzeng Singdi Hirocho

¹ Hütsüpü yangthsaba Solomon-nü David yangdi Zion lanü Amübükuhlang Yuzeng Singdi hiwünung Israelrü tsutpu ko ahung ko yucho la langnürüti apüm Jerusalem la shimükhongsohcho.

² Arüh atümung choo dhünyeh-uba Ethanim choo, Mütpahvi Thsütila shimükhongcho.

³ Khode langnürüti atümung shimükhongcho,

⁴ bebürütinü Yuzeng Singdi tsü dhicho ko Amübükuh yang hiwücho. Levirü ko bebürütinü Abüdongba shükuh ko hütsüla zehba kohro apüm Amübükuhlang tsü hiwücho.

⁵ Yangthsaba Solomon ko Israelrü apümnü Yuzeng Singdi bete tsü shimükhongcho, san ko misü mükhilong kangmübü mübücho.

⁶ Hütsüpü bebürütinü Yuzeng Singdi tsü dhizüdu Amübükuh la Cherufim aqo kehba kanglungrü pohki Amüsauba chongsahla tsü yohpücho.

⁷ Cherufim aqo tsünü Singdi ko hütsü akhau tsü kiticho.

⁸ Amüsauba chongsah bete yapü dhingde du, akhau achangka anyüh tsü ngunung kohcho. (Chünye yingcheh hiba akhau tsü lile)

⁹ Yuzeng Singdi la tsü Israelrü Ijip lanü rode, Abüdongba-nü azengtacho külüpde Mosa khyang Sinai zong la jüba lungtpah anyüh du tsü zehcho.

¹⁰ Bebürüti tsü Amübükuh lanü tsiyade,

¹¹ hütsü Abüdongba ahechinü dhrongyengnü jengcho ko arühnü arüh nguchi nengdang thali züdunung mükohcho.

¹² Hütsüde Solomon-nü dangkhidangnangcho: “Nüh, Abüdongba-nü ningchah nyü chürosohcho, ta Nühnü nyükhi ko amarürah la du linung throchehcho.

¹³ Ade Ihnü Nü khyang Amübükuh khüdu thsajüko, achangka mülipü Nüh lisohnung.”

Solomon-nü Müyurü te Chocho

¹⁴ Nyitsarüti hütsüla yade, yangthsaba Solomon-nü arüh yang ximülacho ko abinü Tsingrangba amüwa chingjücho.

¹⁵ Abinü yocho, “Israel Tsingrang, Abüdongba neng seing! Abinü Iu David te hita nyengcho yohpücho,

¹⁶ ‘Ihnü Ijip lanü I müyurü nücheh nyümong lanü Israel la Ih mübüsohnung Amübükuh khüdu thsanung tu yangdi müthrocheh. Ta I müyurü michah yangthsasohnung, Ihnü, nüh David, throchehcho.’”

¹⁷ Solomon-nü mütozah yocho, “Iu David-nü Israel Tsingrang, Abüdongba mübüsohnung Amübükuh khüdu thsanyücho,

¹⁸ ta Abüdongba-nü abi te yocho, ‘I khyang amübükuh thsajünyüba tsü nüh athsalang lile,

¹⁹ ta nühnü khodesü hütsü müthsanung.’

²⁰ “Ko ade Abüdongba-nü Apu anyengchocho yohpüko. Iu mülih Ih Israel yangthsaba kangcho ko Israel Tsingrang, Abüdongba mübünung Amübükuh tsü thsako.

²¹ Ihnü Amübükuh la tsü Ihsa jümürü Ijip lanü Abüdongba-nü nücheh rode azengchotaba lungtpah zehba Yuzeng Singdi yohpünungsü rungnümjüko.”

Solomon Dangkhidangnang

²² Hütsüpü Solomon-nü müyurü betenü wü bholu te yapü

²³ akheh dhimüsu dangkhidangnangcho, “Abüdongba, Israel Tsingrang, ning michah ko alih yonglang Nüh kyo tu tsingrang mühle! Nü müyurü te Nühnü Nü azengchotaba yohpüre ko arühnü Nüte lasih apümnü yochonyi lide Nü amüi arüh te ngusohre.

²⁴ Nühnü Iu David te nyengchocho yohpüko; chünye yutse apüm tikehko.

²⁵ Ko ade, Abüdongba, Israel Tsingrang, abi kyo arühnü Nüyu bichikhang, lede abi trah lanü Israel la yangthsarü chürosohnungepü yoba apa anyengchochotisü tikehsohng.

²⁶ Hütsüeko ade, O Israel Tsingrang, Nü dikehrü, Iu David te nyengchocho lüpcho tikehsohng.

²⁷ “O Tsingrang, ta Nühnü yuje alih la lichehnung do? Ning apümnü mii Nüh müzuhre, khang Ihnü thsaba Amübükuh hila Nüh zuhnungo?

²⁸ Abüdongba I Tsingrang, Ih Nü dikehrü lile. Ihnü kihchicho nyijüng ko chünye Ihnü dangkhidangnangcho lalingjüng.

²⁹ Hiba Amübükuh Nüh mübünung throchehba müdüm hi ama atsingse dhingyehjüng. Ihnü hiba Amübükuh lahpi pipü dangkhidangnangde nyijüng.

³⁰ Hiba lahpi pipü Ih ko Nü müyurütinü kihchide nyijüng. Ninglang Nü kuh lanü ihrü te nyieng ko ihrü mülang pehjüng.

³¹ “Nyüh khüdu thsamehkopü mülangjü hiba amübükuh bholu yang yuchümnung norode,

³² O Abüdongba, ninglangnü nyijüng ko Nü dikehrü yukhajüng. Mülangba tsü abi aleng khingching, ko achomükeh tsü langjüng.

³³ “Nü müyurü Israelrünü Nüh nyüm amünyi shitpahcho ngang, arorühnü arüh kohde ko arühnü lasih thsamüla Nüh yang hiba Amübükuh yang mülangching rode,

³⁴ ninglangnü arüh te nyijüng. Arüh mülang pehjüng ko Nühnü arüh jümürü khyang jüba lih lang arüh thali norung.

³⁵ “Nü müyurünü Nüh nyüm amünyi shitpahcho ngang Nühnü tsing ranglipehde,

³⁶ ninglangnü arüh te nyijüng. Yangthsaba ko Israelrü münyi mülang pehjüng. Arüh te athsalang nguchinung doung. Hütsüpü, O Abüdongba, Nühnü Nü müyurü khyang arühtoh jüba lih hila tsing rosohng.

³⁷ “Alih la yangkong mahkhang rümra mahkhang nyübongnü mahkhang khengqutinü tsahma thsangnyangjüde, mahkhang arorühnü Nü müyurüti kohde, mahkhang arüh yola dhsara mahkhang füdhsa lide,

³⁸ arüh dangkhidangnang lalingjüng. Nü müyurü Israelrü lasih thsangnyangnü hiba amübükuh lahpi pipü kheh dhimüsu kihchide,

³⁹ arüh te nyijüng. Ninglangnü arüh te nyijüng, arüh mülang pehjüng ko arüh troung. Amüi tsurü lasih la lümba tsü Nühnü du müdhele.

⁴⁰ Nühnü ihrü jümürü khyang jüba lih la li ayung Nü yochonyi linungthsa, nyitsarü müipi te abi aphishunü chotaang.

^41-42 “Ashula liba shuparünü Nü neng ko Nühnü müyurü te nguchicho yuchi, Nüh mübünung ko Nüte kihchinung hiba amübükuhlang rode,

⁴³ arüh te nyijüng. Ninglang Nü kuh lanü, Nü müyurü Israelrünü kyo liküprünü Nüh mübünung nengdang arühnü kihchicho nguchijüng. Hütsüde, Nüh mübünung müdüm tsü Ihnü thsaba Amübükuh hiepü arühnü müdhenung.

⁴⁴ “Khode Nühnü arüh khyang khata wünung yuzeng jonang ko khode arühnü arüh licholanü Ihnü thsaba amübükuh liba Nühnü throchehcho yangdi lahpi pipü kihchinang,

⁴⁵ arüh te nyijüng. Ninglangnü arüh te laling ko arüh khyang akoh jüng.

⁴⁶ “Khode Nü müyurünü Nüh nyüm amünyi shitpahnang, tunüo amünyi müshitpahrü süsü mülinung, ko Nühnü Nü rihlongchüro arüh rorüh kheh la arüh jo, arüh ashula kümtsisohnang,

⁴⁷ Nü müyurünü kihchicho nyijüng. Arorüh lih la linye, arühnü arüh münyi ko mütsa müdhe lasih thsamüla Nüte kihchikhang, arühnü kihchicho lalingjüng, O Abüdongba.

⁴⁸ Hütsüba lihlanünye arühnü yuje lasih thsamüla, Nühnü ihrü jümürü khyang jüba lih, Nühnü throchehcho yangdi ko Ihnü thsaba Amübükuh liba yangdi lahpi pipü kihchikhang,

⁴⁹ arühnü kihchicho nyijüng. Ninglang Nü kuh lanü arüh te nyijüng ko arüh te yanglilüm ngung.

⁵⁰ Nüh nyümcho münyiti apüm lanü arüh mülang pehjüng ko arüh rorütinü arüh te tsa bichisohng.

⁵¹ Arüh tsü Nühnü Ijip la michang lanü nüchehrü Nüpu müyurüti lile.

⁵² “Akohba Abüdongba, Nühnü Nü müyurü Israelrü ko arüh yangthsaba te lede yanglilüm ko arühnü khodederü kihchinang nyijüng.

⁵³ Nühnü ihrü jümürü Ijip lanü nüchehde Nü dikehrü Mosa khu arüh te yocho kyo, arüh tsü limih yucho apüm lanü Nühnü Nüpu yo thsanung throchehcho lile.”

Achangka Dangkhidangnang

⁵⁴ Solomon-nü Abüdongba te kheh dhimüsu mükhohthungnü dangkhidangnangkapü, abinü bholu bete yacho.

⁵⁵ Züdenü hütsüla shimükhong lirüti chah Tsingrangba amüwa chingjo abinü yocho,

⁵⁶ “Abinü nyengchocho kyo müyurü khyang yangtsa jüba Abüdongba seing. Abinü Mosa khu külüpcho anyengchocho apüm yohpüko.

⁵⁷ Abüdongba Ihsa Tsingrang, Ihsa jümürü te licho kyo Ihsa tesü lisohng; Abinü khodesü Ihsa tüpehjü mahkhang tüthrüchahchübeh;

⁵⁸ Abinü Ihsa jümürü khyang jüba yuzeng ko amülaba bichi Abinü khyünyücho roh-i Ihsanü lichehnung nengdang, Abinü Ihsa ayochonyi kangsohng.

⁵⁹ Abüdongba Ihsa Tsingrang-nü Abi te Ihnü kihchiba hi lede lümkehsohng. Arüh dhsütah aichi Abinü lede Israelrü ko arüh yangthsaba te yanglilümsohng.

⁶⁰ Hütsüta limih la yuchoti apümnü apa süsü mühle, ta Abüdongba du tsü Tsingrangba epü müdhesohng.

⁶¹ Ko chünye roh-i nührü Abi müyurütinü lede Ihsa Tsingrang Abüdongba te Abi yuzeng ko amülaba bichi yuje cho lisohng.”

Amübükuh Müsachehcho

⁶² Hütsüpü yangthsaba Solomon ko hütsüla yarü müyurüti atümungnü Abüdongba khyang kangmübü mübücho.

⁶³ Abinü akehta amübü misü hajar mükyüpü anyüh ko san lakh khüdu hajar mükyü kangmübü jücho. Hütsüta müyurü ko yangthsabanü Amübükuh tsü müsachehcho.

⁶⁴ Hütsü nyümong tsü abinü Amübükuh bete kekhüm tsüsü müsachehcho ko üpümshünü trüp mübü ko akehta mübü nengdang kanglungrü sunü mübücho. Imüyengnü külüpba bholu tsü zarachonü abinü hita nguchicho.

⁶⁵ Hiba Amübükuh la tsü, Solomon ko Israelrünü nyümong dhünyeh Tsikeh Thsüti müzeh mungcho. Hütsüla kihku lahpi Hamat Lang ko kihjing lahpi Ijip lurü chii lirüti lanü shimükhongcho.

⁶⁶ Akeh-u nyümong Solomon-nü müyurüti palu kulang thalisohcho. Abüdongba-nü abi dikehrü David ko abi nyitsarü Israelrü khyang jüba amüwa khütango nengdang arühnü abi se kulang thalicho.