1 YANGTHSARÜTI 7 - AMÜSA BAIBEL (BSI)

Solomon Yangthsarü Kuh

¹ Solomon-nü apu nengdangsü kang dhüreasang khyo kuh khüdu thsacho.

² Lebanon mürong ko dsiba Kuh tsü ashenglang khehap thsih khüdu, adilang khehap dhünyang, ko athsenglang khehap sangre licho, cedar dongdi chung khüdula dhüre münga-nganü chung asang ko hütsüri michah singnü abishücho.

³ Drexang tsü cedar singnü fümükhüm chii dongdi khyüm külüpcho.

⁴ Anyüdinglang züdi la tsü nyübongkhi chung asangsang yohcho.

⁵ Trahtri ko nyübongkhi tsü jongnah müyü thricho ko anyüdinglang nyübongkhi chung asangsang tsü arüh deta külüpcho.

⁶ Dongdi amüzalang tsü ashenglang khehap dhünyang ko adilang khehap sangre licho. Dongdinü khyüm-mülapü kukhüm khüdu külüpcho.

⁷ Yangthsarü pümji chongsah, yukha pümji khüde Solomon-nü khiyu khacho, hütsüsü alih lanü abishü chii cedar sing dunü chongcho.

⁸ Solomon apu linung kuh khanglang tsü hütsü akyokyo kuh apasü thsacho. Abinü anitpü Ijip yangthsaba tsulatpü khyangsü hütsü akyokyo kuh thsajücho.

⁹ Kuh hiri apüm ko yukha kuh arangcheh tsü akhengdi lanü amungthriba chii atsauba lungnü thsacho. Lungkhahji lanü lung tsü apümlang müjang xachehcho.

¹⁰ Akhengdi thsanung lung tsü lunghamji lanü khürü ashenglang khehap keh ko dhüre hamchehcho.

¹¹ Hütsüri michah tsü lung apa ko cedar sing akhengji licho.

¹² Yangthsaba kuh, Amübükuh ayonglangba chongsah ko Amübükuh la azüduji chongsah tsü ahamchehcho lung chung asang müipi cedar sing akhengji khüdu yoh külüpcho züdi licho.

Huram Nguchi

¹³ Yangthsaba Solomon-nü imüyeng kengba nguchila axangcheh, Tyre yangdila liba Huram dsinung müthehcho.

¹⁴ Au asu, sü imüyeng nguchila axangchehrü licho, abisü Tyre lanü licho; ko atpa tsü Naftali hung lanü licho. Huram tsü athsehdhsa ko axangcheh licho. Abinü imüyeng nguchi apüm dhingyehnung Solomon-nü dsiba tsü khyüchocho.

Imüyengnü Thsacho Dongdi Anyüh

¹⁵ Huram nü imüyengnü dongdi anyüh athsenglang khehap dhürekeh ko adilang khehap dhüreanyüh külüpcho ko Amübükuh trahtri la khyümcho.

¹⁶ Abinü dongdi mülechah kehnungsü imüyengnü yahthri anyüh athsenglang khehap münga külüpcho.

¹⁷ Dongdi anyüh bemong chah tsü ixilihnü chingkehta sehyah külüpcho,

¹⁸ ko imüyengnü tsanümsih chung anyüh külüpcho.

¹⁹ Dongdi bemi la yohba yahthri tsü lurü yungpi kyo athsenglang khehap müyü,

²⁰ ko ixilih kyo mükang liba michah tsü müdongcho. Yahthri müipi chah chung anyüh la tsü tsanümsih thsih anyüh licho.

²¹ Huram nü imüyeng dongdi anyüh tsü Amübükuh trahtri la tsü khyümcho: kihjing lahpi dongdi te Jakhin ko kihku lahpi dongdi te Boaz dsicho.

²² Lurü yungpi imüyengnü thriba yungpi tsü dongdi bemi chah tsü yohpücho. Hütsüta dongdi chah anguchinung tsü rungnümcho.

Imüyeng Kihkong

²³ Huram nü imüyengnü kihkong khüdu asohlang khehap münga, achehlang khehap dhüre, ko arümlang khehap sangre külüpcho.

²⁴ Kihkong bekhüm bemi chah tsü imüyengnü külüpcho shünga chung anyünü khüdu kang kihkong chah tsü shükehsohcho.

²⁵ Kihkong tsü imüyeng misüpung dhüreanyüh asangsang khang pitapü yaba khangtungchah müdongkehcho.

²⁶ Kihkong achehlang tsü kuthrung asang thsacho. Hütsü shing bemi kyo ko lurü yungpi mülongchicho roh-i dongkhulang müyangchehchü licho. Hiba kihkong la tsü liter hajar yüre-o züducho.

Imüyeng Misü Akhüluba

²⁷ Huram nü misü akhüluba imüyengnü ashenglang khehap müyü, adilang khehap müyü, ko athsenglang khehap asang dhüre külüpcho.

²⁸ Arüh tsü müyüdinglang sako

²⁹ ko abekhüm chah tsü kihkhünying, misüpung ko Cherufim aqo kehba kanglungrü yohnü külüp-pü khümticho; ko akhümticho chah tsü kihkhünying ko misüpung üde tsü ko apohki ko athahlang tsü yungpi mükang yohcho.

³⁰ Misü akhüluba müipi tsü imüyengnü külüpcho ajing müyü ko angusing adong licho. Jongnah müyüdinglang mütpah-tbhü nengdang adong licho; adongti tsü yungpi müking yohcho.

³¹ Mütpah-tbhü michah tsü mükangmüla abe khüm licho. Misü akhüluba michah tsünü khehap khüdu dhimüsu, ko khehap khüdu pü achangsho ayonglang züdusoh külüpcho. Hütsü mükang ayah tühkeh külüpcho.

³² Ajing tsü athsenglang khehap khüdupü achangsho ko arüh tsü akhyangcho pohki licho ko hütsüla angusing mübhilangnü khüdu-khüdu kehjungcho.

³³ Ajing tsü kuri akhüluba jing kyo licho; angusing, fühbhi, ajingtung ko angusing lahtising apüm tsü imüyengnü külüpcho.

³⁴ Misü akhüluba müipi tsü ajongnah müipi pohki adong müyüyü licho.

³⁵ Akhüluba müipi athahlang mükang tsü kuthrung dükunü müshüti lile ko akhüluba te tsü khüdu du kang athüji ko akhümticho licho.

³⁶ Adong ko athüyehji apüm tsü Cherufim qo kehba kanglungrü kihkhünying ko sedong yahthri yoh külüp licho.

³⁷ Hütsüta misü akhüluba tsü külüpcho, arüh apüm thrizi licho.

³⁸ Huram nü misü akhüluba müipi nengdang mütpah-tbhü dhüre külüpcho. Mütpah-tbhü müipi tsü adilang khehap müyü ko liter 800 züducho.

³⁹ Abinü Amübükuh kihjing lahpi misü akhüluba münga ko münga tsü kihku lahpi yohpücho; ko abinü kihkong tsülü kihjing-nyüchüro lahpi yohpücho.

Amübükuh la Kohroti

^40-45 Huram nü füh, michüthsohlung ko mütpah-tbhüsü külüpcho. Abinü yangthsaba Solomon khyang Amübükuh nengdang abi nguchi apüm thümcho. Abinü külüpchoti tsü: Dongdi anyüh Dongdi müle chah tbhü kyoba yungpi anyüh Yungpi anyüh chingkehtasohba ixilih Yungpi anyüh chah thsih-thsihnü chung anyüh imüyengnü tsanümsih thsih müyü Misü akhüluba dhüre Mütpah-tbhü dhüre Kihkong khüdu Kihkong thüyehba misüpung dhüreanyüh Füh, michüthsohlung ko mütpah-tbhü. Huram nü Solomon khyang Amübükuh nengdang külüpba kohro apüm tsü imüyeng asehcho du thsacho.

⁴⁶ Hiri apüm tsü yangthsabanü Jordan Ngah la Sukot e Zarethan nyüh kahla idhse müluji lanü mülusohcho.

⁴⁷ Solomon-nü hiri imüyengnü külüpcho kohro tsü mühodhingsohcho, tunüo hütsüri drongracho, hütsünü amülinglang tsülü mümüdhecho.

⁴⁸ Solomon-nü Amübükuh la tsü hon-nü hiri tsü külüp yohpücho: bholu, amübü kehpüji tsingthsang,

⁴⁹ Amüsauba chongsah bete yohpüba dsimüdongsing dhüremünga kihjing lahpi ko kihku lahpi münga; yungpi, dsi ko amüjüpsing;

⁵⁰ shing, midru pehsing, mütpah-tbhü, müchiji nengdang tbhü ko michüh yohsing füh; ko Amüsauba chongsah arehchising ko Amübükuh dongkhu arehchising. Hiri apüm hon dunü külüpcho.

⁵¹ Khode yangthsaba Solomon-nü Amübükuh la nguchi hiri apüm thümcho, abinü amübükuh azahkehjila au David-nü Abüdongba khyang müsachehjücho hon, taripi ko apa kohroti hiro yohpücho.