1 YANGTHSARÜTI 6 - AMÜSA BAIBEL (BSI)

Solomon-nü Amübükuh Thsacho

¹ Israelrü Ijip lanü chüropü kang thsih müyüpü qure khanglang, Israel la Solomon-nü yangthsacho kang amüyüu ko Ziv choo anyüula, Solomon-nü amübükuh thsanung dikehcho.

² Kuh yonglang, ashenglang khehap rohre ko adilang khehap mükyü ko athsenglang khehap sangre licho.

³ Amütrahyoh chongsah tsü asohlang khehap mükyü ko adilang tsü amübükuh abükyü toi khehap dhüre licho.

⁴ Amübükuh züdi abükyü chah akhi tpehsohcho, ayonglang tenü dongkhu akhi azau vicho.

⁵ Amübükuh khanglang dongkhu züdichah thükeh chung asang, athsenglang chongsah khüdula khehap münga chungkeh thsacho.

⁶ Apohkiba chongsah tsü adilang khehap münga, alonglaba chongsah adilang khehap dhüroh ko amungthriba chongsah adilang khehap dhünyeh licho. Akhengdi müzehnye züdi tsü yachehnung nengdang, achung müipi züdi tsü khü ajengpau külüpcho.

⁷ Amübükuh thsade ahamsing, püh ko idhse hathiri mübichipü thsanung nengdang Amübükuh thsaba lung tsü lungkhahji lanü hamjungpü hirocho.

⁸ Athsakehba apohkiba chongsahlang züdunung tsü Amübükuh kihjinglang lahpi trahtri licho ko anyüuba ko asanguba chongsahlang küdunung tsü lopa kheng küducho.

⁹ Hütsüta yangthsaba Solomon-nü Amübükuh tsü rungnümcho. Abinü dre tsü cedar singnü ring hamcho.

¹⁰ Athsakehba chung asang, chung müipi athsenglang khehap münga tsü dongkhu Amübükuh züdichah ngakeh thsacho ko hütsü cedar singnü khengkeh thsakehtacho.

¹¹ Abüdongba-nü Solomon te yocho,

¹² “Nühnü I yuzeng ko amülaba apüm bichikhang, Ihnü nüu David te nyengchocho tsü nüte nguchinung.

¹³ Nühnü ade thsayaba Amübükuh hila Ihnü I müyurü yola linung ko Ihnü khodesü arüh müpehjünung.”

¹⁴ Hütsüta Solomon-nü Amübükuh tsü rungnümcho.

Amübükuh Ayonglang Sehyahcho

¹⁵ Züdi ayonglang tsü alih lanü dre chii cedar sing axachehcho dunü chongcho ko singtang tsü kee singnü tangcho.

¹⁶ Ayonglangba chongsah Amüsauba chongsah tsü Amübükuh khanglang thsacho. Hütsü ashenglang khehap mükyü ko alih lanü dre chii cedar singtpahnü chongsahcho.

¹⁷ Amüsauba chongsah abelang tsü ashenglang khehap yüre thsacho.

¹⁸ Cedar sing axachehcho chah tsü shünga ko yungpi ayah yoh xehcheh sehyahcho; ko lung züdi tsü müngusohnung nengdang ayonglang apüm tsü cedar singnü chongcho.

¹⁹ Amübükuh khanglang tsü Yuzeng Singdi yohpünung ayonglang chongsah khüdu thsacho.

²⁰ Hiba ayonglang chongsah tsü ashenglang khehap mükyü, adilang khehap mükyü, ko athsenglang khehap mükyü ko hütsü apüm hon amüthsinü münohticho. Bholu tsü cedar singtpahnü chongticho.

²¹ Amübükuh ayonglang tsü hon dunü münohticho ko ayonglangba chongsahlang züduba trahtri tsü hon ixilihnü zengti yohpücho ko hütsüsü hon-nü münohti licho.

²² Amübükuh yonglang apüm ko Amüsauba chongsahla bholu tsüsü hon dunü münohti licho.

²³ Olive singnü Cherufim aqo kehba kanglungrü anyüh athsenglang khehap dhüre külüpnü Amüsauba chongsahla tsü yohpücho.

^24-26 Anyüding tsü thrizi khüdu thsacho. Anyüding aqo anyüh-nyüh kehcho aqo khüdu ashenglang khehap münga, ko aqo anyüh adukahla tsü khehap dhüre licho.

²⁷ Arüh tsü Amüsauba chongsah longla aqo anyüh tsü anyüh thahpüta ko aqo apa khüulang anyüh tsünü züdi thahpo deta yohpücho.

²⁸ Ko Cherufim aqo anyüh kehba kanglungrü tsü hon-nü külüpcho.

²⁹ Chongsah adiuba ko ayonglangba chongsah anyüdingla züdi tsü Cherufim aqo kehba kanglungrü, Sedong ko yungpi xehcheh sehyah külüpcho.

³⁰ Singtang tsü mii hon-nü münohcho.

³¹ Amüsauba chongsah kukhang tsü olive sing xi anyünü külüpcho; kukhang thahlang tsü mühinü külüpcho.

³² Kukhang tsüsü Cherufim aqo kehba kanglungrü, sedong ko yungpi xehcheh sehyah külüpcho. Kukhang, Cherufim aqo kehba kanglungrü ko singdong dsi tsü hon-nü münoh külüpcho.

³³ Chongsah adiubala züduba trahtri jongnah müyü trüp tsü olive singnü külüpcho.

³⁴ Kee singnü külüpcho alohba kukhang anyüh

³⁵ aqo kehba kanglungrü, sedong ko yungpi xehnü sehyahcho, hütsürisü hon-nü münohti külüpcho.

³⁶ Amübükuh bete tsü lung chung asang müipi cedar sing khengnü züdinü chongti kekhüm khüdu külüpcho.

³⁷ Amübükuh akhengdi tsü Solomon yangthsathsacho kang müyüu, choo anyüu, Ziv choo la dikehcho.

³⁸ Ko Solomon-nü yangthsathsacho kang dhüre keh-u, choo akeh-u Bul choo la, Amübükuh tsü dhrongcho kyo tsü rungnümcho. Hütsü thsanung Solomon-nü kang dhünyeh khyücho.