1 YANGTHSARÜTI 5 - AMÜSA BAIBEL (BSI)

Solomon-nü Amübükuh Thsanung Küdangcho

¹ Tyre-rü yangthsaba Hiram tsü lede David shangrüthsa licho ko Solomon tsü au David mülih yangthsaba kangba tsü yuchi abinü abi yang langbürü müthehcho.

² Solomon-nü Hiram yang yusi hi müthehlicho:

³ “Iu David-nü abi mükang arorüh yanglihti te lede chita du lirocho khu, abi rorüh apüm mükohchehde abinü Abüdongba abi Tsingrang mübünung Amübükuh khüdu müthsachehcho nühnü müdhele.

⁴ Ta ade Abüdongba I Tsingrang-nü I khyang I lurü apüm la yangtsa jo lile. I rorüh mühle ko Ih mahnung dhsürü mühle.

⁵ Abüdongba-nü Iu David te hita nyengchoko, ‘Nü tsurü, sü nü khanglang yangthsaba kangsohnang, abinü I khyang amübükuh khüdu thsanung.’ Ko ade Abüdongba I Tsingrang mübünung hütsüba amübükuh thsanung tsü Ihnü dhrongchehko.

⁶ Hütsüeko Lebanon la Cedar sing renung nü müyurü rosohng. I müyurüti arüh yola nguchinung ko nü nyitsarü nyükheh ngang nühnü tu khasahnang Ihnü jünung. Nührünü kyo I müyurütinü sing renung mümüdhe pü nühnü dee tsa müdhele.”

⁷ Hiram-nü Solomon chahnü yusi yuchide dee künyang abi te yocho, “Hütsüba yucho arangcheh michah yangthsanung David khyang athsehdhsa atsurünü abi mülihnungthsa jücho nengdang chünye Abüdongba neng seing!”

⁸ Hütsüpü Hiram-nü Solomon khyang yusi hita mühehcho: “Ihnü nü yusi yuchiko ko nühnü khyünyücho kyo nguchinung rungnüm lile. Ihnü cedar ko kee sing jünung.

⁹ I nyitsarütinü singpungtüm tsü Lebanon lanü kihdi tsü chii hijürojünung ko hütsüri tsü nühnü throchehcho müdüm chihjünungthsa bhongrütapü müyeh müthehnung. Hütsüla I nyitsarütinü lehchehnung ko nü nyitsarü khyang jünung. Nü lahpinü, I nyitsarüti khyang tsuyongba jüsohnyüre.”

¹⁰ Hütsüta Solomon-nü khyünyücho cedar ko kee singpungtüm tsü Hiram-nü jücho,

¹¹ ko Solomon-nü Hiram khyang abi nyitsarüti kangsohnung kang müthe litoh ko hüm ton hajar anyüh ko olive tuji amüdhseng liter lakh müyü jücho.

¹² Abüdongba-nü abi anyengchocho yohpo Solomon khyang lümlong jücho. Hiram ko Solomon nyüh kahla yangtsa licho ko anyünü anyüh kahla mongtsa külüpcho.

¹³ Yangthsaba Solomon-nü Israel apüm lanü anguchirü hajar sangre throcho,

¹⁴ ko arüh michah Adoniram anüchiba thsasohcho. Abinü arüh hajar dhürerenü mülung asang kangsohcho ko mülung müipi tsü Lebanon la choo khüdu nguchisohli ko thali kulang choo anyüh nengdang thalisohcho.

¹⁵ Solomon-nü azong lih la tsü lung hamnung nyüh hajar qure yohpücho ko ahinung nyüh hajar nyühre,

¹⁶ ko abinü hütsü nguchi dhingyehnung anüchirü nyüh hajar asang thsih asang yohpücho.

¹⁷ Yangthsaba Solomon-nü Yuzengjo Amübükuh akhyümdi thsanung atsauba lung amülülah hamchehsohcho.

¹⁸ Solomon ko Hiram nyüh anguchirü ko Byblos yangdi lanü rorütinü Amübükuh thsanung lung ko singtpahti khyübülungcho.