1 YANGTHSARÜTI 4 - AMÜSA BAIBEL (BSI)

Solomon Pohki Adirüti

¹ Solomon tsü Israel yangthsaba,

² ko abi pohki thsazirüti hiri licho: Bebüba: Zadok tsurü Azaria.

³ Athrahrüti: Shisha tsurü Elihorep ko Ahija. Adhingyehrü: Ahilud tsurü Jehoshafat

⁴ Rothsarü anüchiba: Jehoiada tsurü Benaia Bebürüti: Zadok ko Abiathar

⁵ Governor ayingba: Nathan tsurü Azaria Lümlongjürü: Nathan tsurü bebüba Zabud

⁶ Kulirü xükümrü: Ahishar Anguchirü dhingyehrü: Abda tsurü Adoniram.

⁷ Solomon-nü Israel la district governorti nyüh dhüreanyüh throchehcho. Arüh müipinü kang ayung choo khüdu-khüdu mülita yangthsaba ko abi kukhi nengdang tsuyongba chixinung nyümkehjücho.

⁸ Adirüti ko arühnü xükümnung liba district anengti tsü hiri: Benhur: Efraim azong lih

⁹ Bendeker: Makaz, Shalbim, Beth Shemesh, Elon ko Beth Hanan yangdidi

¹⁰ Benhesed: Arubboth ko Soko yangdidi ko Hefer lih apüm

¹¹ Benabinadab, sü Solomon tsulatpü Tafat te kukangcho: Dor lih apüm

¹² Baana, Ahilud tsurü: Tanak, Megido yangditi ko Beth Shan shündhün lih apüm, Zarethan yangdi shündhün, Jezrel yangdi kihjinglang ko Abel Mehola ko Jokmeam yangdidi chiinü.

¹³ Bengeber: Gilead la Ramoth yangdidi, Gilead la Manase trah Jair hung yo yangdongti ko Bashan la Argob lih, atbüticho ko tbükhüm la dongdi imüyengnü külüpcho apümnü yangdidi rohre.

¹⁴ Ahinadab: Iddo tsurü: Mahanaim District

¹⁵ Ahimaz: Solomon tsulatpü apa khüdu Basemat khyücho: Naftali lih

¹⁶ Baana, Hushai tsurü Asher lih ko Bealoth yangdi

¹⁷ Jehoshafat, Perua tsurü: Isakar lih

¹⁸ Shimei, Elah tsurü: Benjamin lih

¹⁹ Geber, Uri tsurü: Gilead, Amor-rü yangthsaba Sihon ko Bashan yangthsaba Og nyühnü yangthsathsa yaba lih. Hiri governor dhüreanyüh chah lahkeh, apüm michah governor khüdu licho.

Solomon Amüwakeh Yangthsathsacho

²⁰ Judarü ko Israelrü tsü kihbekhümla lihpi kyo sucho; arühnü tsuyong ko künyang licho.

²¹ Solomon yanglih la Eufrates Yongkhi lanü Filistia ko Ijiprü lurü chii liba yanglih apüm zeh licho. Arühnü abi khyang akhüm tüpcho ko abi akang ayung abi pohki licho.

²² Solomon nengdang nyümong müthe hüm atsauba dsedong thsih asang ko tse dsedong thsih dhüroh;

²³ kuh la khangtipo kangcho misü dhüre, jungchah kangcho misü mükyü ko san thsih khüdu; hiri chah lahkeh, shümüshü, shuhu, shümüshü apung ko hüna hiri dhsütahcho.

²⁴ Solomon-nü Eufrates Yongkhi nyüzüdulang Eufrates Tifsa lanü Gaza yangdi nyüzüdulang chii yanglih apüm michah yangthsathsa licho. Eufrates nyüzüdulang yangthsarüti apüm abi pohki licho ko mükangmüshü yanglihti apüm te yangtsa licho.

²⁵ Abi akangli ayung, Juda ko Israel apüm la palu shükusih ko ngurüsih tsu tbachi licho.

²⁶ Solomon abi kuri akhüluba nengdang kuri hajar yüre licho ko kuri rothsarü hajar dhüreanyüh licho.

²⁷ Abi governor dhüreanyüh tsünü choo khüdu-khüdu mülihta abi ko yangthsaba kuh la tsuyongrü nengdang tsuyongba chixi licho; arühnü lede dhsütah apüm chixicho.

²⁸ Khüde dhsütahnang, kuri akhüluba ko apa kuri nengdang governor müipinü palu nohlüm lüdi ko manying jücho.

²⁹ Tsingrangba-nü Solomon khyang lümlong ko anyichehba dira jücho.

³⁰ Solomon tsü nyüchürolang müdhemüthehrü tenü ko Ijiprü amüdherü tenü amüdheu licho.

³¹ Abi amüdherü atümung tenü amüdheba: Ezrarü Ethan tenü, Mahol tsurüti Heman, Kalkol ko Darda tenü ko abi nengse tsü mükangmüshü yanglihti apüm la sobhocho.

³² Abinü choyoh yu hajar asang choyohcho ko khi hajar khüdu mihlang tangcho.

³³ Abinü singdonglidong, Lebanon Cedar lanü lungrah la yaba hyssopza nengdang chocho; abinü kanglungrü, uzati, chitsiba ko ngu nengdang chocho.

³⁴ Liküpla yangthsarütinü abi lümlong nengdang yuchicho ko abi yu nyinung arüh nyitsarü müthehcho.