1 YANGTHSARÜTI 16 - AMÜSA BAIBEL (BSI)

¹ Abüdongba-nü Hanani tsurü azikehrü Jehu te chotacho ko Baasha khyang yusi hi jüsohcho:

² “Nüh tumah licho ta Ihnü nüh I müyurü Israel michah langnürü kangsohcho. Ko ade nühnü Jeroboam kyo amünyi shitpahko ko I müyurüsü amünyi shitpahsohko. Arüh münyi tsünü I rihlong chürosohcho,

³ ko hütsünü Ihnü Jeroboam te nguchicho kyo, nüh ko nü kukhi te nguchinung.

⁴ Nü kukhirü yangdila sükhang, abi füzanü tsunung ko rangmü la sürü tsü hogon-nü tsunung.”

⁵ Baasha-nü nguchicho apa ko abi kurahcho apüm Israel yangthsarü Yukheh la thrahyoh lile.

⁶ Baasha sücho ko Tirza la dhrürangcho ko atsurü Elah tsü abi mülih yangthsaba kangcho.

⁷ Baasha ko abi kukhi apüm Abüdongba chahnü hütsüba yusi tsü azikehrü Jehu-nü jücho, tunüo Baasha-nü Abüdongba nyüm amünyi shitpahcho. Abi belang Jeroboam-nü nguchicho kyo abinü amünyi shitpahcho khu Abüdongba zichürosohcho du mah, ta abinü Jeroboam kukhi apüm kyüsehcho ngang licho.

Israelrü Yangthsaba Elah

⁸ Juda la yangthsaba Asa yangthsathsaba kang mükyüpü dhüroh-ula, Baasha tsurü Elah tsü Israel la yangthsaba kangcho ko abinü Tirza la kang anyüh yangthsathsacho.

⁹ Abi pohki kuri akhüluba achangsho xükümba Zimri-nü, abi nyüm arah külüpcho. Tirza la nyümong khüdu, Elah tsü yangthsaba kuh xükümrü Arza kuh la müchacho.

¹⁰ Zimri-nü kuh la tsü züdu Elah tsü müpsehpü abi mülih yangthsaba kangcho. Hi Juda la yangthsaba Asa yangthsathsacho kang mükyüpü dhünyeh-ula tikehcho.

¹¹ Zimri yangthsaba kangyeng, abinü Baasha kukhirü atümung kyüsehcho. Arüh jünirü adhrerü atümung kyüsehcho.

¹² Hütsüta, Abüdongba-nü Baasha nyüm azikehrü Jehu khu chocho kyo, Zimri-nü Baasha kukhirü apüm kyüsehcho.

¹³ Arühnü kyothri thsacholanü ko arühnü Israelrü amünyi shitpahsohcho khu, Baasha ko atsurü Elah nyühnü Israel Tsingrang Abüdongba rihlong chürosohcho.

¹⁴ Ela-nü nguchicho apa apüm tsü Israel yangthsarü Yukheh la thrahyoh lile.

Israelrü Yangthsaba Zimri

¹⁵ Juda la yangthsaba Asa yangthsathsaba kang mükyüpü dhünyeh-ubala, Israel michah Tirza la Zimri-nü nyümong dhünyeh yangthsathsacho. Israel rothsarünü Filistia la Gibethon yangdi mahyade,

¹⁶ arühnü Zimri-nü rah külüp yangthsaba kyüsehkopü yuchicho, hütsüde tsünü arühnü arüh anüchiba Omri tsü Israel yangthsaba kangsohcho.

¹⁷ Omri ko arothsarütinü Gibethon pehjüpü wü Tirza mahcho.

¹⁸ Khode yangdi tsü khülucho Zimri-nü müdhecho, abinü wü yangthsaba kuh la roshengvi ayonglangbala michang thsürangcho ko michang la tsü apusü sücho.

¹⁹ Hi Abüdongba nyüm abi münyi ngang tikehcho. Jeroboam kyo abinü amünyi shitpah ko amüyurü münyi shitpahsoh Abüdongba mükünyangsohcho.

²⁰ Zimri-nü nguchicho apüm ko abinü arah külüpcho zeh Israel yangthsarü Yukheh la thrahyoh lile.

Israelrü Yangthsaba Omri

²¹ Israelrü tsü changnahcho: arüh khürünü Ginath tsurü Tibni ko khürünü Omri tsü arüh yangthsaba thsasohnyücho.

²² Achangkala, Omri te zehrünü kohcho; Tibni sücho ko Omri yangthsaba kangcho.

²³ Hütsüta, Juda la yangthsaba Asa yangthsathsacho kang sangrepü kheh-ula, Omri tsü Israel la yangthsaba kangcho ko abinü kang dhüreanyüh yangthsathsacho. Akhudiba kang dhüroh tsü abinü Tirza la yangthsacho,

²⁴ ko abinü nyüh khüdu anengnü Shemer chahnü Samaria zong tsü taripi hajar dhürohnü lihcho. Omri-nü azong tsü tbüticho, hütsüla yangdi khüdu külüpcho ko azong abüdongba Shemer nengla hütsü Samaria pü dsicho.

²⁵ Omri-nü abi belangrü tenü alaa adiu Abüdongba nyüm amünyi shitpahcho.

²⁶ Abi belang Jeroboam kyo, apu münyi ko müyurü münyi shitpahsoh ko kyothri külüpsoh Israel Tsingrang, Abüdongba zichürosohcho.

²⁷ Omri-nü nguchicho ko nguchichehcho lüpcho Israel yangthsarü Yukheh la thrahyoh lile.

²⁸ Omri sücho ko Samaria la dhrürangcho ko atsurü Ahab tsü abi mülih yangthsaba kangcho.

Israelrü Yangthsaba Ahab

²⁹ Juda la yangthsaba Asa yangthsathsaba kang sangrepü keh-ula, Omri tsurü Ahab tsü Israel la yangthsaba kangcho ko abinü Samaria la kang mükyüpü anyüh yangthsacho.

³⁰ Abinü amüngu yangthsathsarüti atümung tenü alaa Abüdongba nyüm amünyi shitpahcho.

³¹ Yangthsaba Jeroboam kyo, amünyi shitpahcho du mah; ta abinü alaa Sidon yangthsaba Ethbaal tsulatpü Jezebel khyücho ko Baal tsingrang mübücho.

³² Abinü Samaria la Baal khyang amübükuh khüdu thsajücho, bholu khüdu külüpjücho ko amübükuh la tsü yohpücho.

³³ Abinü Ashera tsingranglarü kyothrisü khüdu yohpücho. Abinü Israel la abi müngu yangthsarüti apüm tenü Israel Tsingrang, Abüdongba rihlong alaa chürosohcho.

³⁴ Abi chichah Bethel lanü Hiel-nü Jeriko külüpchicho. Abüdongba-nü Nun tsurü Joshua-nü choyohcho kyo, Hiel-nü Jeriko akhyümdi khyümde, atsurü aziba Abiram tsü sücho ko abinü trahtri külüpde atsurü achangba Segub sücho.