1 YANGTHSARÜTI 12 - AMÜSA BAIBEL (BSI)Kihku lang Yuchotinü Nyüm Yacho ( 2 Roh 10.1-19 ) 1 Rehoboam-nü Shekem lang wücho, hütsüla kihku lang liba Israelrü atümung abi yangthsaba kangsohnung shibülunglicho. 2 Nebat tsurü Jeroboam, sü Solomon chahnü tsiwü Ijip la licho, abinü yusi hi yuchide, abinü Ijip lanü thali rocho. 3 Kihku lang liba yuchotinü abi adsinung müthehcho ko hütsüpü arüh atümungnü Rehoboam yanglang wünü yocho, 4 “Nüu Solomon-nü ihrü dee mütsa bichicho ko ihrü michah bhamüling zangkehjücho. Nühnü hiba bhamüling hi yingya kangsohkhang, ko ihrü akang linung müla kangsohkhang, ihrünü nüh dikehnung.” 5 Abinü yocho, “Nyümong asang lipü rung ko Ihnü alalingba jünung.” Achotsü arühnü tsicho. 6 Yangthsaba Rehoboam-nü au chichah lümlong jürüti te kihtacho. Abinü yocho, “Ihnü hiri te tu lalingnung?” 7 Arühnü lalingcho, “Nühnü hiri müyurü tsa dikehnyükhang, arühnü kihchiba tsü tsa laling ko arühnü lede nüh dikehnung.” 8 Ta abinü azirüti athsüchiba pehjüpü arüh müjang zichehrü dhrezarü ko ade abi khyang lümlong jürü yang wücho. 9 Abinü yocho, “Ihnü khüta nguchisohnyüro? Arüh bha yingya kangsohngpü yoba nyitsarüti te Ihnü tu lalingnung?” 10 Arühnü yocho, “Nühnü arüh te hita young: ‘I müyungza achangtpü hi Iu kihrüm tenü achehba lile!’ 11 ‘Iunü nührü michah bha amüling zangkehjücho; Ihnü alaa amülingu kangsohnung. Iunü nührü chah müyahnü xüpcho; Ihnülü nührü chah tbolu yonü xüpnung.’” 12 Nyümong asang khanglang, abinü yocho kyo Jeroboam ko müyurü apüm Rehoboam yanglang rocho. 13 Yangthsabanü azirüti athülaba pehjüpü dhrezarütinü yochonyi arüh te dee kako chotacho. 14 Abinü yocho, “Iunü nührü chah bha amüling zangkehjücho; Ihnü alaa amülingba zangkehjünung. Abinü nührü chah müyahnü xüpcho; Ihnü tpoluyonü xüpnung!” 15 Hi Shiloh la azikehrü Ahija khu Nebat tsurü Jeroboam te tu yocho hütsü tikehsohnung Abüdongba lümcho licho. Hütsü khu yangthsabanü müyurü tsü sehseh mükhichi licho. 16 Khode arüh lümcho yangthsabanü mükhyücho müyurünü müdhecho, arühnü hita züdecho, “David ko abi kukhi khülusohnung! Arühnü Ihsa nengdang tu nguchicho? Israelrü, Ihsanü kulang thalinung. Rehoboam tsü ajangjang thsasohng.” 17 Hütsüta Israelrünü nyüm yacho ko Rehoboam tsü Juda la lirü michah du yangthsasohnung pehjüpü tsicho. 18 Achotsü yangthsaba Rehoboam-nü Israelrü yanglang hehnehthsarü michah anüchiba Adoniram müthehcho, ta arühnü abi kengseh süsohcho. Hütsü ngu Rehoboam-nü dhsüdhsa abi kuri akhüluba chah pümpü Jerusalem lang rang tsicho. 19 Hütsütinü kihku lang liba Israelrünü David hung te nyümta licho. 20 Khode Israelrünü Jeroboam Ijip langnü thalicho yuchicho, arühnü müyurü shimükhong lichola abi dsiyohcho ko abi Israel yangthsaba kangsohcho. Juda hung du David trah te kehta licho. Shemaia-nü Choyohcho ( 2 Roh 11.1-4 ) 21 Khode Rehoboam ro Jerusalem chihcho, abinü Juda ko Benjamin hung lanü rothsarü athrungrü dunü nyüh lakh khüdu hajar qure dsibülungcho. Abinü wü khatapü kihku lang liba Israelrü tsü thali abi pohki noronyücho. 22 Ta Tsingrangba-nü azikehrü Shemaia te 23 yusi hi Rehoboam, Juda ko Benjamin hung te yonung yocho: 24 “Nührübürü jünirü Israelrü tümah. Nührü atümung kulang thali tsieng. Tu tikehcho hütsü Ihnü lümcho lile.” Arüh atümungnü Abüdongba yu nyi arüh kulang thali tsicho. Jeroboam Abüdongba tenü Ximülacho 25 Yangthsaba Jeroboam-nü Efraim azong lih la Shekem yangdi tsü tbüticho ko azachah shulüm hütsüla licho. Hütsüpü abinü wü Penuel yangdi tsü tbüticho. 26-27 Abinü lümcho, “Ade hiroh-i nülü, I müyurünü wü Jerusalem la Amübükuh la tsü kangmübü mübüde arüh Juda yangthsaba Rehoboam te kehta kangnung ko Ih kyüsehnung.” 28 Hütsüta lümdhingpü, abinü misüpungza anyüh hon-nü külüpcho ko müyurü te yocho, “Nührü Jerusalem lang mübünung wünung tsü shurale. Israelrü, nührü Ijip lanü nüchehba tsingrang tsü hila lile!” 29 Hütsüta abinü misüpung aza khüdu Bethel la ko akhüu tsü Dan la yohpüjücho. 30 Hütsüta müyurünü Bethel ko Dan la mübü amünyi shitpahcho. 31 Jeroboam-nü akhang müjohtila amübükuh thsacho ko Levi hung lanü mahpü apalanü abinü bebürü throchehcho. Bethel la Mübüba Mülangjücho 32 Jeroboam-nü Juda la kyo, choo akeh-u nyümong dhüremüngala mübü yangthsa thsüti throchehcho. Bethel la bholu chah tsü abinü hon-nü külüpba mübüji nengdang bebürü yohpücho. 33 Ko choo akeh-u dhüremünga nyümong apunü throba nyümong tsü, Israelrü nengdang apunü throchehjüba thsüti hütsü wü abinü kangmübü mübücho. |
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
Bible Society of India