1 YANGTHSARÜTI 11 - AMÜSA BAIBEL (BSI)

Solomon Tsingrangba tenü Zacho

¹ Solomon-nü yangpilarü adrong müicho. Ijip yangthsaba tsulatpü chah lahkeh abinü Hit-larü, Moab-larü, Amon-larü, Edomlarü, ko Sidon-larü khyücho.

² Israelrünü hiri nyitsarü te kuthriyangthri müthsanung Abüdongba-nü yaticho, tunüo arüh khu Israelrünü apa tsingrangti lahpi ximülanung, ta abinü arüh khyücho.

³ Solomon-nü anitpü thsih dhünyeh khyücho ko ashamlarü thsih asang yohpücho. Ko arühnü abi Tsingrangba tenü ximülasohcho,

⁴ ko abi shi rodelü yangpirü tsingrang mübüsohcho. Au David mükyopü abinü Abüdongba abi Tsingrang te yuje müchocho.

⁵ Abinü Sidon-rü tsingranglarü Astarte ko Amon-rü tsingrang Molek mübücho.

⁶ Au David mükyopü abinü Abüdongba nyüm amünyi shitpahcho ko abi te yuje müchocho.

⁷ Jerusalem nyüchürolang zong chah tsü, abinü Moab tsingrang Molek mübüji kuh thsacho.

⁸ Anitpü yangpilarüti nengdangsü arühnü arüh palu tsingrang khyang mübüji tahsohnung ko kangmübü mübüsohnung abinü amübükuh papa thsajücho.

^9-10 Abüdongba Israel Tsingrang-nü, Solomon te chüro shiro abi te yangpirü tsingrang mümübünung yuzeng jünye, abinü Abüdongba yu münyipü Abi tenü ximüla tsicho.

¹¹ Hütsünü Abüdongba-nü Solomon te zichüro abi te yocho, “Nühnü Ite azengtacho ahsa thsangnyang I amülaba mübichirü tsü, Ihnü nü chahnü nü yanglih khyo nü pohki adirü nyüh khüdu khyang jünung Ihnü yuchümre.

¹² Ta nüu David khyanglangnü nü akang li hütsü münguchinung, ta nü tsurü yangthsa shikhe Ihnü hütsü nguchinung.

¹³ Ko Ihnü abi chahnü yanglih apümlü mükhyümüijünung; ta I dikehrü David ko Ihnü Ipu yo thsanung külüpba Jerusalem yangdi khyanglangnü, Ihnü abi khyang hung khüdu yohpüjünung.”

Solomon Rorüti

¹⁴ Hütsüpü Abüdongba-nü Solomon nyüm Edom yangthsarü hung lanü Hadad chürosohcho.

^15-16 Akhulang, David-nü Edom mahchehde, abi pohki rothsarü anüchiba Joab-nü asürü me dhrürangnung hütsüla wücho. Abi ko abi nyitsarüti Edom la choo dhüroh licho ko hütsütade,

¹⁷ arühnü Hadad ko Ijip lang rang tsiba au kulirü Edomrü chah khu adhrerüecho apüm kyüsehcho. (Hütsütade Hadad tsü azarü du licho.)

¹⁸ Arühnü Midian pehjüpü Paran lang wücho ko hütsüla aparü khürü ro arüh yola zehcho. Hütsüpü arühnü Ijip lang wücho ko abinü Hadad khyang alih, kuh ko tsuyongnung jücho.

¹⁹ Hadad-nü yangthsaba te shangrü thsacho ko yangthsabanü Hadad khyang anitpü yangthsalatpü Tapanes nirü khyüsohcho.

²⁰ Abi khyang abükyünü adhrerü khüdu Genubath nümüsujücho ko abi tsü yangthsaba kuh la yangthsaba tsurüti yola zichehcho.

²¹ Khode Hadad-nü David sücho ko rothsarü anüchiba Joab sücho Ijip la yuchicho, Hadad-nü yangthsaba te yocho, “Ih Ipu lih lang thali wüsohng.”

²² Yangthsabanü yocho, “Tuepü? Ihnü nü khyang lango dusü müjo lirü mah-o? Hütsü khu nüh thali tsinyürü mah-o?” Hadad-nü yangthsaba te yocho, “Yah Ih wüsohng.” Ko abinü apu lih lang thali wücho. Edom yangthsaba kangnü, Hadad tsü Israel amütsauba rorüh licho.

²³ Tsingrangba-nü Solomon nyüm Eliada tsurü Rezon-sü chürosohcho. Rezon tsü Zoba la abi abüdongrü yangthsaba Hadadezer tenü rangkhu tsicho,

²⁴ ko yuzeng thsangnyangrü mülungo michah anüchirü kangcho. (Hi David-nü Hadadezer kohchehpü ko abi yola zehrü Syria-rü kingthrümpü khanglang tikehcho.) Rezon ko abi nyitsarüti wü Damaskas la licho ko hütsüla abi müyurünü abi Syria yangthsaba kangsohcho.

²⁵ Abi Solomon akangli ayung Israel rorüthsa licho.

Jeroboam te Tsingrangba-nü Nyengchocho

²⁶ Yangthsaba Solomon nyüm yaba aparü khüdu tsü abi pohki adirü yola khüdu, Efraim la Zereda lanü Nebat tsurü Jeroboam licho. Atpa tsü chomilarü khüdu anengnü Zerua licho.

²⁷ Nyümtaba yukheh tsü hiroh-i licho. Solomon tsü Jerusalem nyüchürolang alih süh ko züdi külüpchi licho.

²⁸ Jeroboam tsü rezeh dhrezarü khüdu thsacho ko Solomon-nü abi müküp nguchicho ngu Manase ko Efraim lih la hehnehthsarü michah anüchiba kang yohpücho.

²⁹ Nyümong khüdu, Jeroboam tsü Jerusalem lanü shitseh wüyade, Shiloh lanü azikehrü Ahija-nü asehsa langla abi müleng te shirücho.

³⁰ Ahija-nü abi khüm yacho fükhüm tsü phungchehcho, dhüreanyüh kang rehnahcho

³¹ ko Jeroboam te yocho, “Hila dhüre khyüng, tunüo Abüdongba Israel Tsingrang-nü nüte yore, ‘Ihnü Solomon chahnü yanglih tsü khyümüinung ko nü khyang hung dhüre jünung.

³² Ko I dikehrü David ko Israel lih lanü Ipu yo thsanung throchehcho Jerusalem khyanglangnü, Solomon khyang hung khüdu yohpüjünung.

³³ Ihnü hi nguchinung, tunüo Solomon-nü Ih dhsonglipehko ko yangpirü tsingrangti: Sidon-rü tsingranglarü Astarte; Moab tsingrang Kemosh; ko Amon-rü tsingrang Molek hiri mübüko. Solomon-nü I yocho mühnyi; abinü amüthsalang nguchiko ko au David-nü nguchicho mükyopü abinü I yuzeng ko amülaba mübichi.

³⁴ Ta Ihnü Solomon chahnü yanglihti apüm mükhyümüinung ko abi akang lidelü abi tase lisohnung. Hi I dikehrü David, sü Ihnü throchehcho ko sünü I yuzeng ko amülaba bichicho abi khyanglangnü nguchinung.

³⁵ Ihnü Solomon tsurü khehlanü yanglih tsü khyümüinung ko nü khyang hung dhüre jünung,

³⁶ ta Ih mübünung Ihnü throchehba Jerusalem la lede I dikehrü David trah lanü yangthsarü nyüh khüdulü linungthsa, Ihnü Solomon tsurü khyang hung khüdu yohpüjünung.

³⁷ Jeroboam, Ihnü nüh Israel michah yangthsaba kangsohnung ko nühnü khyünyücho lih apüm michah yangthsanung.

³⁸ Nühnü Iyu nyikhang, I yuzeng bichikhang ko I dikehrü David-nü kyo Ihnü mülacho apüm bichi likhang, Ih lede nüte linung. Ihnü nüh Israel yangthsaba kangsohnung ko Ihnü David te nguchicho kyo, nü khangtesü nü trah lanü yangthsarü chürosohnung.

³⁹ Solomon münyi ngang, Ihnü David trah khingchinung, ta hütsü lede nengdanglü mah.’”

⁴⁰ Hütsünü Solomon-nü Jeroboam kyüsehnung müküpcho, ta abinü Ijip yangthsaba Shishak yang tsi wücho ko hütsüla Solomon müsü yingcheh licho.

Solomon Sücho

⁴¹ Solomon-nü nguchicho lüpcho, abi akang nguchi ko abi lümlong apüm Solomon yukheh la thrahyoh lile.

⁴² Abi Israel apüm michah Jerusalem la kang yüre yangthsathsacho.

⁴³ Abi sücho ko David yangdila dhrürangcho, ko atsurü Rehoboam tsü abi mülih yangthsaba kangcho.