1 TIMOTI 2 - AMÜSA BAIBEL (BSI)

Lithro Amübü

¹ Hütsüeko apüm te akhu, Ihsa longlüm atbachi akang linung ko Tsingrangba khyang jengrengjo athsalangnü lichehnung nengdang;

² Yangthsarüti ko tase bichirüti nengdang, ko nyitsarü atümung nengdang akihchiba, dangkhidangnang, kihchijüba ko anengse Tsingrangba khyang jüng.

³ Hi nguchi atsa ko hütsünü Ihsa Kangchehjüba Tsingrangba

⁴ sünü atümung khümcho yuje lang tsü rosohnyüro, abi künyangsohre.

⁵ Tunüo Tsingrangba khüdu du, ko Tsingrangba e amüi tsurü nyüh nürütaba nyitsarüsü khüdu du lile, hütsü Jisu Khrista,

⁶ sünü amüi tsurü atümung lihchehnung apu akang jücho. Tsingrangba-nü nyitsarü atümung khümchonyücho becho yuzi tsü hütsü thsacho.

⁷ Hütsünü Ih yangpirü nengdang riwürü ko adorü khüdu, yudsi ko yuje yusi sobhonung müthehcho. Ihnü arahkheh mah; ta yuje tsü yore!

⁸ Amübü ashibülung mükhu adhrerü sürü Tsingrangba khyang khakhuchüjo liro, arühnü zii müchüropü, mahkhang müritapü kheh dhimüsu dangkhidangnangsohnyüre.

⁹ Ihnü khingkurüsü, arüh kuva sihchehsiyoh külüp-pü mahkhang hon jengki mahkhang thsidilung mahkhang thsi athsah jengki mah,

¹⁰ ta nguchi atsa ko khingkurü chah phishuba yudsilarü kyo arüh shü ko jengki athsalangnü khyüsohnyüre.

¹¹ Khingkurünü azikyah kang sahmüthsapü nyichoung.

¹² Donung ko adhrerü michah tase bichinung mümülare; arüh yah-adu lisohng.

¹³ Tunüo Adam khanglang du Eve thricho.

¹⁴ Ko thsüyohchüsohba tsü Adam mah; ta thsüyohchüsoh Tsingrangba yuzeng lahsahba tsü khingkutpü tsü thsacho.

¹⁵ Ta rangchonü yudsi, amüi ko amüsa la longlümnü likhang abükyünü azarü surocho khu khümchonung.