1 TIMOTI 1 - AMÜSA BAIBEL (BSI)

¹ Ihsa akangcheh Tsingrang, ko Ihsa alongdi Jisu Khrista khu riwürü, Paul chahnü—

² Yudsi la I tsurükhung, Timoti yang: Au Tsingrang ko Ihsa Abüdongba Jisu Khrista chahnü nührü te achomang, yanglilüm ko atbachi thsaang.

Arahkheh Adoba nyüm Amüzahnung

³ Ih Macedonia lang wüde nüte yocho roh-i, Ihnü nüh Efesia la mungsohnyüre. Hütsüla khürünü arahkheh athonguba dole, ko hütsü nühnü iitinungbae.

⁴ Jümü yukheh ko jümü-trah chung khüinü yubejarong du chürosohpü yudsinü müdhecho Tsingrangba lümchung mütikehsohre, hütsütari pehnung arüh te young.

⁵ Hiba yuzeng jüba alümcho tsü amüdhseng lasih, atsidsa lümlong, ko adekheng yudsi lanü roba amüi chürosohnung nengdang lile.

⁶ Nyitsarü khürü hiri lanü tsimüla amükhyu thüptaba la thrümthrüm-mamale.

⁷ Arühnü tu choro, ko tu nengdang longlangrünang münyichehpü yuzeng adorüti kangnyüre.

⁸ Yuzeng tsü athsalangnü bichikhang atsaepü Ihsanü müdhele.

⁹ Yuzeng tsü nyitsarü atsa nengdang mükülüp, ta yuzeng thsangnyangrü ko fükhohrü, Tsingrangba müdrürü ko münyirü, yangthsa ko anbü mümüirü, sürünü au mahkhang atpa müpsehrü, nyitsarü müpsehrü,

¹⁰ nahtrahnaxengrü, amüyahlang mükhongrü, khingrangrü, yuje müchorü, arahkheh yuzi jürü ko yuje athonguba tenü chümbhi nguchirü nengdang külüpcho.

¹¹ Ahechi ko müwajübong Tsingrang chahnü Yuse I khyang sobhonung nyümkehjüba adoba tsü Yuse Atsa vakhala ngure.

Tsingrangba Yanglilüm nengdang Anengse

¹² Ihsa Abüdongba Jisu Khrista, sünü I nguchi nengdang I khyang re jücho, abi nengsere. Atsicho la Ihnü abi nyüm chonü, dhsümthse ko abi nyüpmüsehnye,

¹³ abi dikehnung adekheng roh-i khichi Ih throcho nengdang abi nengsere. Tanye Tsingrangba-nü Ite yanglilüm ngucho, tunüo Ih müyudsiechonü Ihnü tu nguchirünang hütsü Ihnü mümüdhecho.

¹⁴ Ko Ihsa Abüdongba-nü I khyang abi achomang bholo mükhakehjücho ko Jisu Khrista la yudsi ko amüi jücho.

¹⁵ Hiba yu hi yuje-epü apümnü khyücho yudsinungthsa: Jisu Khrista limih yang münyirü khümchonung rocho. Ko arüh apüm tenü Ih amütsauba.

¹⁶ Jisu Khrista-nü abi arangcho kükyo licho I chah ngunung, ko Tsingrangba-nü akhanglang abi chah yudsirü atümung müchangkaba akang ngusohnung adüzü kangnü, Ih amünyi-uba te yanglilüm ngucho.

¹⁷ Müchangkaba yangthsaba, amüsüba ko amünguba, Tsingrang khüdu du, abi khyang adhichi ko ahechi müchangkapü thsaang! Amen.

¹⁸ I tsurü Timoti, akhulang nü nengdang choyohcho kyo, Ihnü nü khyang yuzeng hi nyümkehjüre.

¹⁹ Hütsüri yu tsü thsunohrü roh-i bichinü khata atsa khataang, yudsi yohpüng, ko lümlong müsa lieng. Nyitsarü khürülü arüh lümlong atsa la mütsehchonü arüh yudsi thsangnyangpehko.

²⁰ Arüh yola Hemenaes ko Alexander zehle, arüh müthsamünyüba zahnung nyichosohnung Ihnü arüh Satan kheh la jüko.