1 SAMUEL 9 - AMÜSA BAIBEL (BSI)

Saul-nü Samuel Shirücho

¹ Benjamin hung lanü alirü nyüh khüdu anengnü Kish licho; abi Abiel tsurü ko Zeror shümtsurü, Afia hung changsho Bekorath tsutpu lanü.

² Abi tsurü khüdu anengnü Saul licho ko abi pümtrung atsa ko alongde thsacho. Athsenglang Saul tsü Israel la atümungnü apakyarü du chihcho ko pümtrungsü chiri du thsacho.

³ Kish-rü yo gadu khürü chahcho, achotsü abinü Saul te yocho, “Kulirü khüdu nüyola nüng ko wünü gadu tsü yangching.”

⁴ Arühnü Efraim azong lih ko Shalisha mükyah bong yangchicho, ta müngucho; achotsü arühnü Shalim mükyah la yangchicho, ta gadu tsü hütsüla mülicho. Achotsü arühnü Benjamin lih bong wücho, ta hütsülasü müngucho;

⁵ khode arühnü Zuf mükyah la rocho, Saul-nü kuliba te yocho, “Ihjünü kulang thalinung mahkhang uwalü gadu tsü mahpü Ihjü nengdang lümxüseh linung.”

⁶ Kulibanü yocho, “Yalieng! Hiba yangdila apümnü khichiba Tsingrangrü nyitsarü khüdu lile ko abinü yocho apüm tikehre. Ihjünü abi yang wünung, kümüdeo gadu tsü khüde lirünang abinü yochehnung.”

⁷ Saul-nü tsingdhingcho, “Ihjünü abi yang wükhang, abi khyang tu jünung? Ihjü shibhala tsuyongnungsü nying mühle ko abi khyang hijünung tusü mühle!”

⁸ Kulibanü yocho, “I kheh la taripi shekel nohlüm müyüla khüdushi zehle. Hütsü jonung ko Ihjü dhsütah tsingdhingnung.”

^9-11 Saul-nü lalingcho, “Tsale, Ihjünü wünung.” Achotsü anyünü Tsingrangrü nyitsarü liba yangdi lang tsü wücho. Anyünü yangdila tsü chüdude, kih khanung rorüh khingkurü khürü mütohcho. Anyünü arüh te tsingdhingcho, “Amongba tsü yangdila mülio?” (Hütsütade azikehrü te amongrü pü dsicho, hütsünü khode Tsingrangba te yodhingnyünang, “Ihsanü amongrü yanglang wünungpü” du chocho)

¹² Khingkurütinü yocho, “Lile! Abi nühjü bete du tsü tsiyale. Dsaya wükhang nühjünü iiphünung. Nühjünü yangdi tsü chihyeng, abi shirünung. Akhangla bholu chah Müyurünü kangmübü jünung lichonü, abi chünye yangdi lang tsü rore.

¹³ Abi ro hütsü müchide adsiyohrü tsüsü tsunung mükoh, tunüo kangmübü tsü abinü akhu müwajünungbae. Ade wükhang, abi akhanglang tsü mütuwüede abi shirünung.”

¹⁴ Achotsü Saul e kuliba nyühnü yangdi lang tsü wücho ko arüh züdude, Samuel tsü mübüji lang wünung chürochi ngucho.

¹⁵ Nyümong khüdu li Abüdongba-nü Samuel te yopü licho.

¹⁶ “Atu hitade Ihnü Benjamin hung lanü nyüh khüdu müthehnung; I müyurü Israelrü yangthsaba thsanung abi müyühjüng; ko abinü arüh Filistinrü khehlanü khümchonung. I müyurü chongcha Ihnü nguko ko arüh züdecho Ihnü yuchiko.”

¹⁷ Khode Samuel-nü Saul ngucho, Abüdongba-nü abi te yocho, “Ihnü nüte yoba nyitsarü tsü hivie. Abinü I müyurü michah yangthsanung.”

¹⁸ Hütsüde Saul-nü trahtri shündhün yaba Samuel yanglang wünü yocho, “Amongrü khüde lirünang Ite young?”

¹⁹ Samuel-nü lalingcho, “Amongrü tsü Ih lile. Mübüji lang tsü I belang püte. Nühjüding chünye I yola tsuyongnung. Nühnü tsingnyüba apüm Ihnü atunyang lalingnung.

²⁰ Nyümong asang belang chahba gadu nengdang tsülü tu tülümxü; arüh ngupehko. Ta Israelrünü hitoi mükhyahba tsü süo? Hütsü nüh, nüh ko nüu kukhi.”

²¹ Saul-nü lalingcho, “Ih Israel la azauba Benjamin hung lanü ko ihrü hung la ihrü kukhi tsü adongmücho khüdu lile. Khang, tuepü Ite hita yoro?”

²² Hütsüpü Samuel-nü Saul ko akuliba nyüh tsü kuh chongsah arangcheh khüdula nowücho ko shirü nyüh sangreo pümcho thahte tsü pümsohcho.

²³ Ko Samuel-nü chongkyaba te yocho, “Ihnü nü khyang pathsa yohpünung jüba shusü hirung.”

²⁴ Achotsü chongkyabanü athrochehcho ajing tsü hiro Saul bete yohpüjücho. Samuel-nü yocho, “Dhing, hi nü khyang yohpüjücho lile. Hütsü tsung, tunüo hiba bekhyah Ihnü adsiyohrü yola tsusohnung nü khyang pathsa yohpüjücho lile.” Hütsüta Saul-nü Samuel te hütsü nyümong tsuyongcho.

²⁵ Khode arüh mübüba müdüm lanü yangdi lang tsü jowücho, arühnü Saul nengdang amunglang chongnong rungnümjo licho,

²⁶ ko abi hütsüla yüpcho. Anyangnyü tsü Samuel-nü amunglang Saul dsicho, “Surung, Ihnü nüh tsisohnung.” Saul surocho ko abi ko Samuel yanglonglang wücho.

Samuel-nü Saul Yangthsanung Müyühjücho

²⁷ Anyünü yangdi tsü khukhangde Samuel-nü Saul te yocho, “Kuliba te tsü bekhu tsiyanung young.” Kuliba tsü tsicho ko Samuel-nü mütozah yocho, “Hila suh-o yaang ko Ihnü nüte Tsingrangba-nü yocho yu yonung.”