1 SAMUEL 8 - AMÜSA BAIBEL (BSI)

Müyurünü Yangthsarü Chingcho

¹ Samuel shi rode, abinü Israel la atsurüti yukharü kangsohcho.

² Atsurü aziba neng Joel ko azaba neng Abija licho; anyüh Beersheba la yukharü licho.

³ Ta anyünü au kyo akang mülicho; arühnü thsi du mükhyahcho hütsü khu arühnü pohsa khyücho ko khiyu tsü yuje cho mükhacho.

⁴ Achotsü Israel zirü atümung mükhongpü Rama la Samuel yang wünü yocho,

⁵ “Dhing, nüh shire ko nü tsurütinü nüh mükyo. Hütsüeko, aparü yuchoti kyo ihrü michah yangthsanung, ihrü khyang yangthsarü khüdu throchehjüng.”

⁶ Arühnü yangthsarü khüdu chingba tsünü Samuel mükünyangcho; hütsünü Abüdongba te dangkhidangnangcho,

⁷ ko Abüdongba-nü yocho, “Müyurünü yoba lüpcho tsü nühnü nyieng. Arühnü nüh du mükhyüchorü mah, ta Ih yangthsaba mükhyüchore.

⁸ Ihnü arüh Ijip lanü nücheh nyümong tinü arühnü I tenü za aparü tsingrang mübüre; ko lede Ite nguchiba tsü ade nüte nguchire.

⁹ Hütsüeko, arühnü yocho nyieng, ta yangthsarü khüdunü arüh khüta bichinung hütsü müzahnung tsidsa young.”

¹⁰ Yangthsarü chingba müyurü te tsü Samuel-nü abi te Abüdongba-nü tu yocho apüm arüh te yocho.

¹¹ Samuel-nü yocho, “Nührü yangthsarü tsünü nührü te hita bichinung. Abinü nührü tsurü rothsarü kangsohnung, khürü khata nyübong akhüluba bichisohnung ko khürü abi kuri rothsarü ko khürü nyübong akhüluba bete shangsohnung.

¹² Abinü arüh khürü nyitsarü hajar michah ko khürü dhünyang michah anüchirü thsasohnung. Nührü tsuzarüti tsü abi luh xüsohnung, maxasohnung ko abi thsunohrü ko nyübong akhüluba dhsütahti külüpsohnung.

¹³ Nührü tsularüti tsü abi khyang axümlichi külüpsohnung ko khürü abi chongkyarü ko hüm külüprü kangsohnung.

¹⁴ Abinü nührü luh, shükusih yo ko olive yo atsauba khyo abi pohki adirü khyang jünung.

¹⁵ Abinü nührü fürü ko shükusih lanü nohlüm dhürela khüdu khyo abi pohki adirü khyang jünung.

¹⁶ Abinü nührü kulirü, nührü misü atsauba ko gadu khyo abi nengdang nguchisohnung.

¹⁷ Abinü nührü kanglungrüti lanü dhürela khüdu khyüjünung ko nührübürüsü abi yurü kangsohnung.

¹⁸ Hütsütade nührübürünü throchehba nührü yangthsaba nyüm longmüsü amütsa jünung, ta nührü yu tsü Abüdongba-nü münyijünung.”

¹⁹ Müyurünü Samuel-nü yoba tsü tu münyicho ta yocho, “Imoh,

²⁰ ihrü aparü yuchoti kyo, ihrü michah yangthsa thsanung, khatalang ihrü nünung ko ihrü rothsa khatanung, yangthsarü khüdu khyünyüre.”

²¹ Samuel-nü arühnü chocho apüm nyicho ko wü Abüdongba te yocho.

²² Abüdongba-nü lalingcho, “Arühnü khyünyücho roh-i arüh khyang yangthsarü khüdu jüng.” Hütsüpü Samuel-nü Israelrü atümung kulang thali wüsohcho.