1 SAMUEL 7 - AMÜSA BAIBEL (BSI)

¹ Achotsü Kiriat Jearim-rünü Abüdongba Yuzeng Singdi tsü ronü khyücho ko akhangchah lirü nyüh khüdu anengnü Abinadab kuh la yohpücho. Arühnü abi tsurü Eleazar tsü hütsü xükümnung müsachehcho.

Samuel-nü Israel Michah Yangthsacho

² Abüdongba Yuzeng Singdi tsü Kiriat Jearim la anyahli kang mükyü-o licho. Hütsü bekhyah tsü Israelrünü Abüdongba te arüku nengdang züde licho.

³ Samuel-nü Israelrü te yocho, “Nührünü nührü lasih apümnü Abüdongba yang ximülaekhang, nührünü yangpirü tsingrang ko Astarte tsingranglarü tenü zang. Abüdongba te nührü jangjang müsachehng ko Abi du mübüng, khang Abinü nührü Filistinrü khehlanü khümchonung.”

⁴ Achotsü Israelrünü Baal ko Astarte tenü zacho ko Abüdongba du mübücho.

⁵ Ko Samuel-nü yocho, “Israelrü atümung Mizpa la shibülung ko Ihnü hütsüla nührü nengdang dangkhidangnangjünung.”

⁶ Achotsü arüh atümung Mizpa la shibülungcho. Arühnü kih khabülungcho ko Abüdongba te amübü kang tungpehcho ko hütsü nyümong mükhyang kongcho. Arühnü yocho, “Ihrünü Abüdongba nyüm amünyi shitpahko.” (Mizpa la Samuel-nü Israelrü khiyu khacho)

⁷ Khode Filistinrünü Mizpa la Israelrü shibülung lilepü yuchicho, Filistinrü yangthsarü münga tsünü arüh mahnung shemüsucho. Israelrünü hütsü yuchipü drücho,

⁸ ko Samuel te yocho, “Filistinrü kheh la Ihsa khümchosohnung Abüdongba te mütozah dangkhidangnang.”

⁹ Samuel-nü sanza khüdu müpsehcho ko Abüdongba khyang üpümshünü trüp kangmübü jücho. Hütsüpü abinü Abüdongba te Israelrü tronung kihchicho ko abinü kihchicho lalingcho.

¹⁰ Samuel kangmübü jüyade, Filistinrünü arüh mahnung rocho; ta hütsütade Abüdongba-nü ninglangnü ningki müthehcho. Arüh khütang drümüyang nehpehcho.

¹¹ Israelrünü Mizpa lanü arüh iiwü Bethkar chii, lang ayung kyüsehcho.

¹² Hütsüde Samuel-nü lung khüdu hirocho ko Mizpa ko Shen nyüh kahla hütsü khyümcho ko yocho, “Abüdongba-nü hi chii Ihsa troko” ko hütsü “Atroba lung” pü dsicho.

¹³ Hütsüta Filistinrü kohchehcho ko Samuel akangli ayung, Abüdongba-nü Israel lih mümahsohcho.

¹⁴ Ekron ko Gath nyüh kahla Filistinrünü khyüba yangditi apüm Israel khyang thali jücho ko hütsüta Israel-nü thali alih tsü ngucho. Ko Israel ko Kanan-rü kahla yangtsa licho.

¹⁵ Samuel-nü abi akangli ayung Israel la yangthsathsacho.

¹⁶ Kang mükhu abinü Bethel, Gilgal ko Mizpa bong wünü hirila yukhacho.

¹⁷ Hütsüpü abinü Rama la apu kuh yang thali wüli hütsü lasü abinü yukhaba nguchisü nguchicho. Ko abinü Rama la Abüdongba khyang bholu khüdu külüpcho.