1 SAMUEL 6 - AMÜSA BAIBEL (BSI)

Yuzeng Singdi Thalicho

¹ Abüdongba Yuzeng Singdi Filistin la choo dhünyeh lipü khanglang,

² müyurünü bebürüti ko azikehrüti dsi tsingdhingcho, “Ihsanü Abüdongba Yuzeng Singdi hi khütanung? Ihsanü hütsü abüdongrü yang thali müthehkhang, tu zehpü müthehnung?”

³ Arühnü lalingcho, “Nührünü Israel Tsingrang yo Yuzeng Singdi tsü thali müthehkhang, nührü münyi nengdang jünung jiyü zehpü müthehng. Hütsü adeng tüthalisoh. Hütsütakhang nührü kyangnung ko tuepü nührü mütozah khingchichonang nührünü müdhenung.”

⁴ Müyurünü tsingdhingcho, “Ihsanü tu khütari jiyü müthehnung?” Arühnü lalingcho, “Filistinrü yangthsarü müipi nengla shulaa madhsa kyo hon-nü külüpcho münga ko xubong-yongmüza kyo hon-nü külüpcho münga müthehnung. Hiba madhsa tsü nührü atümung chah ko yangthsarü münga chahsü akyokyo tsü chihsohcho.

⁵ Nührünü shulaa madhsa hiri kyothri ko nührü lih thsangnyangjüba xubong-yongmüza kyothri tsü külüpm ko nührünü Israel Tsingrang khyang adhichi jüng. Kümüdeo, Abinü nührü, nührü tsingrang ko nührü lih mükhingchinung.

⁶ Ijiprü yangthsaba ko Ijiprü kyo tuepü nührü hongziro? Arühnü Israelrü mütsisohde Tsingrangba-nü arüh khüta mütsa bichicho hütsü tünbüchü.

⁷ Hütsüeko, misü akhüluba anyüh ko hongzih müyohdhingcho misü anyüh hirung, hütsü misü akhüluba chah tsü hohching ko aza nyüh tsü kuh la khangtipüng.

⁸ Hütsüpü Abüdongba Yuzeng Singdi tsü khyo misü akhüluba la tsü yohng ko nührü münyi pehnung jiyü nührünü müthehba hon-nü külüpcho kyothri tsü hütsü shündhün singdi khüdula yohng.

⁹ Hütsüpü misü akhüluba tsü dse-müthehng ko ajangjang tsisohng. Hütsü Beth Shemesh langthring tsikhang, Ihsa chah dhsara hi Israel Tsingrang-nü müthehchobae, ta apalang tsikhang, hütsü abinü mah; suronü ro mütohchoba due.”

¹⁰ Achotsü arühnü hütsüta nguchicho. Arühnü misü anyüh noro misü akhüluba chah tsü xohchingcho ko aza tsü khangtipücho.

¹¹ Arühnü misü akhüluba la tsü Yuzeng Singdi ko hon-nü külüpcho shulaa ko xubong-yongmüza kyothriti singdi apa khüdula yohcho.

¹² Misü akhüluba tsü shemüsucho ko müchongkhüti Beth Shemesh lang tsicho. Misü tsü khongnü tsicho. Filistinrü yangthsarü münga tsünü Beth Shemesh lurü chii iiwücho.

¹³ Beth Shemesh-rü tsü angah la litoh tohyade dhrongyengnü Yuzeng Singdi tsü hiroya arühnü ngucho. Arühnü hütsü ngu khütang künyangtacho.

¹⁴ Misü akhüluba tsü Beth Shemesh la lirü nyüh khüdu anengnü Joshua-rü luhlang rocho ko hütsüla lung arangcheh khüdu shündhün nyehlicho. Nyitsarüti tsünü misü akhüluba tsü kyünahcho ko misü tsü kyüsehnü Abüdongba khyang kangmübü trüp mübücho.

¹⁵ Levirünü Abüdongba Singdi ko hon-nü külüpba kohro tsü dhi hiwü lung arangcheh chah tsü müdongcho. Hütsüpü Beth Shemesh-rünü trüp kangmübü ko apa amübüti mübücho.

¹⁶ Filistinrü yangthsarü münga tsünü hütsüta nguchiba tsü dhing yapü hütsü nyümongnü Ekron lang thalicho.

¹⁷ Filistinrünü hon-nü külüpcho shulaa kyothri münga tsü Abüdongba khyang arüh münyi pehnung nengdang Ashdod, Gaza, Askelon, Gath ko Ekron yangditi müipi nengla müthehcho.

¹⁸ Arühnü hon-nü külüpcho xubong-yongmüza tsüsü Filistinrü yangthsarü münganü yangthsathsaba atbüticho yangdi ko mütbüticho yangdongti müipi nengla khüdu-khüdu müthehcho. Abüdongba Singdi müdongpüba Beth Shemesh-rü Joshua luh la liba lung arangcheh tsü ade yingcheh lile ko atikehcho nengdang tsü hütsü yuzi lile.

¹⁹ Abüdongba-nü Beth Shemesh-rü adhrerü nyühre kyüsehcho, tunüo arühnü Yuzeng Singdi la yohchüdhingcho. Ko Abüdongba-nü arüh yola hütsütoi kyüsehcho nengdang arühnü meshü licho.

Kiriat Jearim la Yuzeng Singdi

²⁰ Achotsü Beth Shemesh-rünü yocho, “Sünü hiba AMÜSA Tsingrang, Abüdongba bete yachehnung? Ihsanü abi Ihsa tenü za khüde müthehnung?”

²¹ Arühnü Kiriat Jearim-rü te hita yonung yuhirü müthehcho, “Filistinrünü Abüdongba Yuzeng Singdi tsü thali jüko. Jürung ko hütsü hii küdung.”