1 SAMUEL 5 - AMÜSA BAIBEL (BSI)

Filistinrü Yola Yuzeng Singdi

¹ Filistinrünü Yuzeng Singdi tsü rohchopü, Ebenezer lanü arüh yangdi Ashdod yang hiwücho,

² ko hütsü arüh tsingrang Dagon amübükuhlang hiwü arüh kyothri müshüm müdongpücho.

³ Nyangnyü khüu mütoh, Ashdod-rünü Dagon kyothri tsü Abüdongba Yuzeng Singdi bete mühaplangnü khülutsu jo ngucho. Achotsü arühnü hütsü khamüsu thali ayohpüjila tsü yohpücho.

⁴ Anyüu nyangnyüsü arühnü kyothri tsü Yuzeng Singdi bete tsü khülutsu jo ngucho. Ade hilalü, athah ko akheh anyüding thsangnyangpü trahtri yingte jocho ko afü du nying licho.

⁵ (Hütsünü chünye yingcheh Dagon bebürü ko Ashdod la hütsü mübürütinü hütsü mütrahkhu tsire ko hütsü michah mütsehre)

⁶ Abüdongba-nü Ashdod-rü dee khingchicho ko arüh drümüyangsohcho. Abinü arüh ko mükang liba müyurüti chah kii chürosohnü arüh khingchicho.

⁷ Arühnü atikehcho tsü ngu yocho, “Israel Tsingrangba-nü Ihsa ko Ihsa tsingrang Dagon dee khingchile. Ihsanü Yuzeng Singdi tsü Ihsa yola müyohpübae.”

⁸ Achotsü arühnü Filistinrü yangthsarü müngading dsibülungpü arüh te tsingdhingcho, “Israel Tsingrang Yuzeng Singdi tsü Ihsanü khütanung?” Arühnü lalingcho, “Gath lang hiwüng.” Achotsü arühnü Filistinrü yangdi apa khüdu Gath lang hiwücho.

⁹ Ta hütsü chihpü, Abüdongba-nü hütsü yangdisü khingchicho ko lümdhama arangcheh chürosohcho. Abinü yangdila lirü aza-azi atümung chah kii chürosoh arüh khingchicho.

¹⁰ Achotsü arühnü Filistinrü yangdi apa khüdu Ekron lang Yuzeng Singdi tsü müthehcho; ta hütsü chihde, nyitsarütinü züdecho, “Ihsa süsohnung arühnü Israel Tsingrang Yuzeng Singdisü Ihsa yanglang hirole!”

¹¹ Achotsü arühnü adesü Filistinrü yangthsarü dsibülung yocho, “Ihsa ko Ihsa kukhiti müsükhangnung nengdang Israelrü Yuzeng Singdi tsü thali apu licho yang müthehng.” Yangdi apümlang drümüyang arangcheh licho tunüo Tsingrangba-nü arüh dee mütsa khingchicho.

¹² Amüsürü chahsü shulaa tsü chürocho ko müyurünü arüh tsingrang yang kihchi züdecho.