1 SAMUEL 30 - AMÜSA BAIBEL (BSI)

Amalek-rü te Khatacho

¹ Asangu nyümong David ko abi nyitsarüti ro Ziklag chihcho. Amalek-rünü kihjinglang Juda ko Ziklag mahpü licho.

² Arühnü yangdi tsü trüp-pehjücho ko khingkurü apüm rangcho; arüh khüdusü mükyüseh, ta arüh tside arüh atümung notsicho.

³ Khode David ko abi nyitsarü rochihcho, arühnü yangdi trüp-pehcho ngucho ko arüh nitpürüti, khingkurü azarü apüm notsipehpü licho.

⁴ David ko abi nyitsarüti tramüsucho ko arüh tase mükingkade tracho.

⁵ David nitpü Ahinoam ko Abigail nyüh mii zeh notsipehcho.

⁶ David athsangthsi arangcheh mütohcho, tunüo abi nyitsarütinü arüh tsuzarü chahcho nengdang tsü dee wahcho ko abi kengsehnung dhrongcho; ta Abüdongba abi Tsingrang-nü abi khyang tase jücho.

⁷ David-nü Ahimelek tsurü bebüba Abiathar te yocho, “I khyang bebü jengki tsü hirojüng” ko Abiathar-nü abi khyang hirojücho.

⁸ David-nü Abüdongba te tsingdhingcho, “Ihnü amahrü khanglang iiwonung o? Ko Ihnü arüh iiphünung mah-o?” Abinü lalingcho, “Arüh iiwüng; nühnü arüh iiphünung ko akümtsirü tsü kengchonung.”

⁹ Achotsü David ko abi nyitsarü thsih dhüroh tsü shemüsucho ko arüh ro Besor yongkhi chihde, arüh khürülü hütsüla nyehlicho.

¹⁰ David-nü nyüh thsih müyü nüpü mütozah wücho; ta anyingcho nyüh thsih anyüh tsü yongkhi kehnung tsü khura kyahpehchonü nyehlipehcho.

¹¹ David te liba nyitsarütinü Ijiprü dhrezarü khüdu ngunü abi David yanglang norocho. Arühnü abi khyang tsuyongnung,

¹² ngurüsih akungcho khürü ko shükusih müphung anyüh tüpcho. Abinü hütsü tsupü rezeh kangcho; tunüo abi nyümong asang ajeng tusü mütsuyongpü licho.

¹³ David-nü abi te tsingdhingcho, “Nü büdongba süo? Ko nüh khüdenüo?” Abinü lalingcho, “Ih Ijiprü khüdu ko Amalek-rü yurü khüdu lile. I abüdongba-nü Ih pehjüpü nyümong asangu lile; tunüo Ih füdhsa licho.

¹⁴ Ihrünü Juda kihjinglang thring Keret-rü lih ko Kaleb tsutpu lih mahcho ko Ziklag yangdi trüp-pehjücho.”

¹⁵ David-nü tsingdhingcho, “Nühnü hütsüri amahrü yang Ih nowüng o?” Abinü lalingcho, “Nühnü Ih mükyüsehnung mahkhang I büdongba khyang Ih thali müjünungepü Tsingrangba nengla nyengchokhang, Ihnü nowünung.”

¹⁶ Ko abinü arüh yang David nowücho. Amahrüti tsü tsisho, tsu, yong ko thsüti khyo licho, tunüo arühnü Filistia ko Judarü yo kohro mükhilong zang hiro licho.

¹⁷ Nyümong khüu mütoh David-nü arüh mahcho ko nyüzeh khatacho. Dhrezarü nyüh thsih müyü ut chahnü tsicho chah khu arüh süsü mütsicheh.

¹⁸ Amalek-rünü khyücho nyitsarü ko kohro atümung anitpü anyüsü zeh David-nü ruhchocho;

¹⁹ tusü müchahcho. David-nü abi nyitsarüti tsuzaniza atümung ko Amalek-rünü khyüba kohro apüm thali ngucho.

²⁰ Abinü arüh yo kanglungrüsü apüm thali ngucho, abi nyitsarütinü arüh bete kanglungrü tsü kümcho wünü yocho, “Hi David-nü ruhchocho lile!”

²¹ Hütsüpü Besor yongkhi müchihde nyüh thsih anyüh kyahsehpü pümpehba yang David-nü thali wücho. Arühnü David ko abi nyitsarüti mütohnung rocho ko David ko abi nyitsarütinü arüh yang küdu künyangseh khyüchocho.

²² Ta David yola würü amükhyu ko adongmücho nyitsarü khürünü yocho, “Arüh Ihsa yola müro, hütsüeko akengchocho kohro, arüh nitpürü ko arüh tsuzarü jüpü tsisohng.”

²³ Ta David-nü yocho, “Ajünirüti, Abüdongba-nü Ihsa khyang jücho la nührünü hita nguchinung mükoh. Abinü Ihsa khümchoko ko amahrü michah Ihsa khyang akoh jüko.

²⁴ Nührünü yoba tsü sünüsü mükhyüchonung. Atümung sako changtanung; yang nyahrü tsüsü rothsalang würü te tsü sako changtanung!”

²⁵ David-nü hütsüta yuzeng külüpcho ko hütsütinü Israel la hütsüroh-i bichicho.

²⁶ Khode David Ziklag lang thali rocho, abinü akengchocho lanü nohlüm-o amüyangrü Juda la langnürü khyang mühehchonü yocho, “Abüdongba rorüti chahnü kengchocho lanü jiyü aza hi mühehre.”

²⁷ Abinü hütsü Bethel-rü, kihjinglang Juda la liba Rama-rü ko Jatir,

²⁸ Aroer, Sibmoth, Estimoa,

²⁹ ko Rakal; Jeramel tsutpu, Ken-rü,

³⁰ ko Horma, Borashan, Athah,

³¹ ko Hebron yangdila lirüti khyang mühehcho. Abinü hütsüta abi ko abi nyitsarüti bong roba lih la lirüti apüm yanglang mühehcho.