1 SAMUEL 3 - AMÜSA BAIBEL (BSI)

Abüdongba -nü Samuel Dsicho

¹ Azaba Samuel tsü Eli pohki Abüdongba dikeh licho. Ko hütsü shikhe Abüdongba chahnü yusi tsü adükeh du thsacho ko abi chahnü müngucheh tsü dee müdsi licho.

² Romang khüdu, Eli, sü adelü anahnü müngupehcho, abi apu chongsahla yüpjo licho;

³ ko Samuel tsü Amüsa Yuzeng Singdi yohpüba amübükuh la tsü yüpjocho.

⁴ Mütsingse-ede ko dsi tsü mümeh-ede, Abüdongba-nü dsicho, “Samuel, Samuel! Ko abinü yocho, Ih hila lile!”

⁵ Ko Eli yanglang shang wü yocho, “Ih hila lile, tunüo nühnü Ih dsiko.” Ta Eli-nü yocho, “Ihnü nüh müdsi; thali wü yüpm.” Achotsü Samuel thali wü yüpcho.

^6-7 Abüdongba-nü thali Samuel dsicho ko azaba tsünü hütsü Abüdongbanüepü mümüdhecho, tunüo Abüdongba-nü khodesü abi te müchotadhing. Achotsü abinü shemüsucho ko wü Eli te yocho, “Ih hila lile, nühnü Ih dsicho mah-o?” Ta Eli-nü yocho, “Itso, Ihnü nüh müdsi; thali wü yüpm.”

⁸ Abüdongba-nü thali Samuel asangpiu dsicho; abinü shemüsucho ko Eli yang wünü yocho, “Ih hila lile, nühnü Ih dsicho mah-o?” Hütsüde azaba tsü Abüdongba-nü dsilepü Eli-nü lümchehcho,

⁹ achotsü abinü abi te yocho, “Thali wü yüpm; ko adesü thali dsikhang hita young, ‘Chotaang, Abüdongba, nü dikehrü nyiyale.’” Achotsü Samuel-nü thali wü yüpcho.

¹⁰ Abüdongba rocho ko hütsüla yapü akhulang roh-i dsicho, “Samuel! Samuel!” Samuel-nü lalingcho, “Chotaang; nü dikehrünü nyiyale.”

¹¹ Abüdongba-nü abi te yocho, “Dhing, Israel la ayuchirü atümung nehnungthsa Ihnü adrünung lango nguchinung.

¹² Hütsü nyümong Ihnü Eli nyüm chocho adikeh lanü achangka chii apüm nguchinung.

¹³ Abi tsurütinü Ih nyüm amütsa chocho nengdang, Ihnü abi kukhi lede nengdang khingchinungepü Ihnü apu te yopehko. Arühnü hütsüta nguchicho Eli-nü müdhepü abinü arüh müyati.

¹⁴ Hütsünü Ihnü Eli kukhi te tu amübü mahkhang kangmübü nüsü hiba adrünung münyi hi khyümüinung mükohnungepü yuchümpehko.”

¹⁵ Samuel-nü mütsingse-ede yüpcho ko abinü shemüsu Abüdongba kuh khangthrucho. Abinü müngucheh tsü Eli te yonung drücho.

¹⁶ Eli-nü abi dsicho, “I tsurü Samuel.” Samuel-nü lalingcho, “Ih hila lile.”

¹⁷ Eli-nü tsingdhingcho, “Abüdongba-nü nüte tu yocho? Tusü rang tüyohbü. Abinü yocho apüm Ite müyokhang, Tsingrangba-nü nüh khingchinung.”

¹⁸ Achotsü Samuel-nü abi te apüm yocho; abinü tusü rang müyohpücho. Eli-nü yocho, “Hütsü Abüdongba lile; Abi te tu tsanang Abinü nguchinung.”

¹⁹ Hütsüta Samuel zide, Abüdongba abi te zehcho ko Samuel-nü yocho lüpcho tikehsohcho.

²⁰ Hütsüta, Israelrü achangnü achangchinü Samuel tsü Abüdongba azikehrü khüduepü müdhecho.

²¹ Abüdongba-nü Samuel te shiro chotaba müdüm Shiloh la tsü apu jangjang abi te mütozah shiro licho. Ko khode Samuel-nü chocho, Israelrü atümungnü nyicho.