Biblia Todo Logo
Bìoball air-loidhne

- Sanasan -

1 SAMUEL 28 - AMÜSA BAIBEL (BSI)

1 Azachah lipü, Filistinrünü Israel te chitanung shibülungcho, ko Akish-nü David te yocho, “Nüh ko nü nyitsarüti I lahpi thsapü chitanungepü Ihnü müdhele.”

2 David-nü lalingcho, “Ih nü dikehrü ko Ihnü nü nengdang tu nguchirünang nüpunü ngunung.” Akish-nü yocho, “Tsale! Ihnü nüh mungkhung I nyahrü thsasohnung.”


Saul-nü Müchehrü te Tsingcho

3 Samuel sücho ko Israelrü apüm shimükhongnü apu yangdi Rama la dhrürangcho. Saul-nü amongrüti ko amüchehrüti apüm Israel lanü iipehcho.

4 Filistinrünü shimükhong Shunem yangdi te müdongcho; ko Saul-nü Israelrü nübülung Gilboa zong chah müdongcho.

5 Khode Saul-nü Filistinrü rothsarü ngucho, abinü drücho,

6 achotsü abinü Abüdongba te tsingcho. Ta Abüdongba-nü münguchehlanye, Urim ko Thummim khunünye, mahkhang azikehrü khunünye tu mülalingcho.

7 Hütsüde Saul-nü abi pohki adirüti te yuzengjücho, “Amonglarü khüdu yangching ko Ihnü wü abükyü te müchehdhingnung.” Arühnü lalingcho, “Endor la khüdu lile.”

8 Achotsü Saul-nü apu tsahthrimüla jengki pa khyüpü ko masohpü abi yola nyüh anyüh nüpü khingkutpü yanglang tsü wücho. Abinü abükyü te yocho, “Tu tikehnungnang müchehdhingjüng. Ko Ihnü yonung nyitsarü nbü tsü dsichehjüng.”

9 Khingkutpü tsünü yocho, “Yangthsaba Saul-nü nguchicho nühnü müdhele, abinü amongrü ko amüchehrü abi lih lanü iipehko. Khang, tuepü Ih kihyochü süsohnung müküpro?”

10 Hütsüde Saul-nü Amüsa yuchümcho. Abinü abükyü te yocho, “Ihnü akang liba Abüdongba nengla yore, nühnü hi nguchicho nengdang nüh mükhingchinung.”

11 Khingkutpü tsünü yocho, “Ihnü nü khyang sü dsichehjünung?” Abinü yocho, “Samuel.”

12 Khode khingkutpü tsünü Samuel ngucho, abükyünü züde Saul te yocho, “Tuepü Ih rahmütsaro? Nüh yangthsaba Saul lile.”

13 Yangthsabanü abükyü te yocho, “Tüdrü!” “Nühnü tu nguro?” Abükyünü lalingcho, “Alih lanü anbü khüdu chüro ngure.”

14 Abinü tsingdhingcho, “Tu kyoro?” Abükyünü yocho, “Hütsü ashirü khüdu fükhüm khümpü chüro ngure.” Hütsüde Saul-nü hütsü Samuel epü müdhe abinü jengrengjo alih la mükhukehcho.

15 Samuel-nü Saul te yocho, “Nüh tuepü Ih longmüziro? Tuepü Ih thali rosohcho?” Saul-nü lalingcho, “Ih dee chongcha la lile. Khüulang Filistinrü te khatarü ko khüulang Tsingrangba-nü Ih thrüchahchü pehjüko. Adelü müngucheh mahkhang azikehrü khunünye, Abüdongba-nü Ite mülalingre. Hütsünü Ihnü tu nguchinungnang müdhenung nüh dsicho lile.”

16 Samuel-nü yocho, “Abüdongba-nü nüh pehjü ko nüh abi rorüh kangpü lide, tuepü nühnü Ih dsiro?

17 Abüdongba-nü Ih khu nüte yobasü nguchiko; abinü yanglih tsü khyo David khyang jopehko.

18 Nühnü Abüdongba yocho münyiko ko Amalek-rü ko arüh licho apüm müchangjü. Hütsünü ade Abüdongba-nü nü chah hi nguchire.

19 Abinü nüh ko Israelrü Filistinrü kheh la jünung. Atu nüh ko nü tsurü Ite linung ko Israelrü rothsarü Filistinrü kheh la jünung.”

20 Samuel-nü yoba tsü yuchi dhrongyengnü Saul tsü alih la khülutsu zingchi jocho. Abi sumüzeh kangcho, tunüo hütsü nyümong ko romang ayung tu mütsucho.

21 Khingkutpü tsünü abi yang wüdhingde, abi drümüyangpü li ngucho, achotsü abi te yocho, “Adirü, I kang mii jo nühnü yocho nguchiko.

22 Yanglilüm ade Ihnü yocho nguching. Ihnü nü khyang tsuyongnung azikyah rungnümjünung. Nüh rezehchipü langtseh kohnung shulüm nühnü hütsü tsung.”

23 Saul-nü tusü mütsunung dhsonglicho. Ta abi pohki adirütinü mii tsunung kihchicho. Abinü akalang alih lanü shemüsu chongnong chah pümcho.

24 Dhsüdhsanü khingkutpünü abükyü kangyacho misüza khüdu müpsehcho. Hütsüpü hüm aza hiro bhüpza müyohpü hümdhse aza külüpcho.

25 Abükyünü Saul ko abi adirüti nengdang tsuyongba tsü küdang yohpüjücho ko arühnü hütsü tsucho. Hütsüpü arühnü hütsü romangnü shemüsu tsicho.

Sangtam Naga (Re-edited) Bible - AMÜSA BAIBEL

Copyright © 1995 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan