1 SAMUEL 26 - AMÜSA BAIBEL (BSI)

David-nü Anyüpiusü Saul Akang Mükhyücho

¹ Zif lanü nyitsarü khürü Gibea lang ro David tsü Juda akungaselih achangka Hakila zong la lilepü Saul te yocho.

² Hütsüdenü Saul-nü Israel la rothsarü athrungrü nyüh hajar asang nüpü David yangchinung Zif akungaselih lang wücho,

³ ko Hakila zong la langte müdongcho. Hütsü tashi David tsü akungaselih la licho, ko khode Saul abi yangchinung rocho yuchicho,

⁴ abinü füzathsarü khürü müthehnü yuje Saul tsü ro licho mülicho tsingsohcho.

⁵ Abinü hütsüde wü Saul ko abi rothsarü anüchiba Ner tsurü Abner yüpji tsü ngucho. Saul tsü ayonglang yüpcho ko anyitsarüti tsü abi mükang yüpcho.

⁶ Hütsüde David-nü Hit-rü Ahimelek ko Joab nirü Abishai te tsingdhingcho (arüh atpa tsü Zeruia) “Saul müdonglang nühjü yola Ite sü ronung?” Abishai-nü lalingcho, “Ih ronung.”

⁷ Achotsü hütsü romang David e Abishai nyühnü Saul yüpjochola züducho ko Saul tsü athsuh athah te thungpüpü yüpjo ngucho. Ko Abner ko rothsarüti tsü abi mükang yüpjocho.

⁸ Abishai-nü David te yocho, “Shomülang Tsingrangba-nü nü rorüh nü kheh la jüko. Ihnü ade apu thsuh tsü khyo khüdupi dunü alih la thrakeh chisehnung.”

⁹ Ta David-nü yocho, “Abi tükyüseh! Abüdongba-nü throchehcho yangthsaba sünü kyüsehnung, tunüo abinü khingchi tsatsanung.

¹⁰ David-nü yocho, Abüdongba apunü Saul kyüsehnung, abi bekhyah chihde, füdhsa mahkhang khatala abi sünung.

¹¹ Abüdongba-nü throchehcho yangthsaba chah kheh müküdunung Abüdongba apunü Ih yatieng. Ihsanü abi thsuh ko dhomo khyüpü tsinung.”

¹² Achotsü David-nü Saul thah te tsünü abi thsuh ko abi dhomo khyücho ko Abishai anyünü tsicho. Hütsü sünüsü müngu mahkhang tu tikehchonang mümüdhe mahkhang ajesu mii müjesu, arüh apüm yüpsülah licho, tunüo Abüdongba-nü arüh alaa yümsohcho.

¹³ Hütsüpü David-nü angah tsü khu wüpü adukah ashu zehpü, akhangchah tsü küducho,

¹⁴ ko Saul rothsarüti ko Abner te züdecho, “Abner! I yuva müyuchio?” Abner-nü lalingcho, “Züde yangthsaba khamüsuba tsü süo?”

¹⁵ David-nü lalingcho, “Abner, nüh Israel la adiuba mahrü do? Khang tuepü nü abüdongba; yangthsaba mütsungtiro? Ade tsatsa nü büdongba kyüsehnung nührü müdongchah khürü züroko.

¹⁶ Abner, nüh, nü nguchila amükoh jüroko. Nührü atümung sünung alengepü Ihnü akang liba Abüdongba nengla yuchümre, tunüo Abüdongba-nü throchehcho yangthsaba nührünü mütsungti. Dhing! Yangthsaba thsuh khülo? Abi thah te liba abi dhomosü khülo?”

¹⁷ Saul-nü David yuva nyicheh tsingdhingcho, “I tsurü David, hi nüh mah-o?” David-nü lalingcho, “Ho, Nüh Adibong.”

¹⁸ Ko abinü yocho, “Adirü, nüh ade yingcheh Ih iichirü do? Ihnü tu nguchicho? Ihnü tu thsamehcho?

¹⁹ Nüh Adibong, Ihnü yonung hi nyieng. Abüdongba-nü nü khyang Ih nyümsohrü thsakhang, amübü khüdunü alasih thsamülasohnung; ta hütsü nyitsarünü thsakhang, Abüdongba chokehchola arüh chah küdung. Tunüo arühnü Ih Abüdongba lih lanü iipehpü yangpirü tsingrang du mübünung kangre.

²⁰ Ih yangpirü lih la Abüdongba tenü za tükyüsehsoh. Tuepü Israel yangthsabanü Ih kyo ashüdi khüdu kyüsehnung? Tuepü abi khyang Ih rangmü uza kyo iichisohnung?”

²¹ Saul-nü lalingcho, “Ihnü thsamehko. Thali rung, I tsurü David. Ihnü khodesü nüh mükyüsehnung, tunüo shomang nühnü I kang mükhyüjü. Ih dohko! Ihnü adrünung nguchiko!”

²² David-nü lalingcho, “Nü thsuh hila lile, Nüh Adibong. Nü nyitsarü khüdu ro hi khyüsohng.

²³ Yuje chorü ko amüsarü Abüdongba-nü jiyüre. Chünye abinü nüh I kheh la jücho, ta Abüdongba-nü throchehcho yangthsaba, Ihnü mükyüseh.

²⁴ Chünye Ihnü nü kang mürühyangcho kyo, Abüdongba-nü I chah hütsüroh-i nguching, ko dhsürü apüm lanü khümchoung.”

²⁵ Saul-nü David te yocho, “Tsingrangba-nü nüh müwajüng, Itso! Nü nguchicho lüpchola akoh ngunung.” Hütsüpü David tsicho ko Saul kulang thali wülungcho.