1 SAMUEL 25 - AMÜSA BAIBEL (BSI)Samuel Sücho 1 Samuel sücho ko Israelrü apüm abi meshünung shimükhongcho. Hütsüpü arühnü abi Rama la apu lih la dhrürangcho. Hütsüpü David-nü Paran akungaselihlang wücho. David Ko Abigail 2 Hütsüla nyüh khüdu Kaleb tsutpu lanü anengnü Nabal licho; abi Maon yangdilanü ko abi yo Karmel shündhün alih khüdu licho. Abi yo san hajar asang ko miza hajar khüdu licho ko abi dee alirü thsacho. 3 Anitpü Abigail tsü atsah dee tsacho ko athsehdhsa, ta apu tsü khütang azithsüthsah thsacho. Nabal-nü Karmel la abi san anbüh müjüpcho, 4 ko David-nü akungaselih la liyade hütsü yuchicho, 5 achotsü abinü Nabal yang dhrezarü nyüh dhüre Karmel lang abi salüm hipü wüsohcho. 6 Abinü Nabal te hita yonung thülacho: “Nüte, nü kukhi te ko nü licho apüm te David-nü salüm yochüre. 7 Nüh san nbüh müjüpcho abinü yuchiko ko nü san nyahrü ihrü yola lide ihrünü arüh tsa bichicho nüte müdhesohnyüre. Arüh Karmel la li ayung arüh yo tusü müchah. 8 Arüh te tsingdhing, arühnü nüte yonung. Ihrü thsüti nyümong khüdula rore ko ihrü tsa khyüchonung David-nü kihchire. Yanglilüm ihrü ko nü müyang David khyang nühnü tu kohro, hütsü jüng.” 9 David nyitsarünü yusi hi hiwü David nengla Nabal te yocho. Hütsüpü arühnü hütsüla yingcho, 10 ko Nabal-nü achangkala yocho, “David, abi süo? Ihnü khodesü abi müyuchidhing. Chünye atü atsichirü ayurünü limih jengko! 11 Tuepü Ihnü I hümdhse, kih ko shunbüh müjüprü khyang müpsehcho shuh khyo khüdenü rochonang mümüdherü khyang tüpnung!” 12 David nyitsarütinü thali wü David te Nabal-nü yoba yu tsü yocho. 13 David-nü yocho, “Nührü nohsheng yohng!” Ko arüh atümungnü yohcho ko David-sü abi nohsheng yoh bipü kohro te nyüh thsih anyüh pehjüpü nyüh thsih müyü nüpü küducho. 14 Nabal kulirü khüdunü Nabal nitpü Abigail te yocho, “Nühnü müyuchio? David-nü anyitsarü khürü akungaselih la tsünü Ihsa abüdongba yang salüm yusi hipü müthehcho, ta abinü nyüpmüsehpü tsisohko. 15 Ta arühnü ihrü te dee tsacho; ihrü rangmü la arüh te lide, arühnü tu mütsa mübichi mahkhang ihrü yo tusü müchah. 16 Ihrü san nyah lide, anyümong ko amala arühnü ihrü tsungticho. 17 Yanglilüm hiri lümdhing ko tu khütanung dhrongchehng. Hi Ihsa abüdongba ko abi kukhi apüm nengdang dhsürü lile. Abi tsürohrarü tsü abinü sü yusü münyinung!” 18 Abigail-nü dhsüdhsa hümdhse thsih anyüh, yongkha di anyüh, san münga shuh aruhcho, aruhcho tsang süreh dhüredhünyeh, shükusih müphung thsih khüdu, ko ngurüsih akungchonü külüpcho hümdhse thsih anyüh khyübülungpü gadu chah zangcho. 19 Hütsüpü kulirüti te abükyünü yocho, “Nührü akhu thsaang ko Ih iironung.” Ta abükyünü hütsü anii te tusü müyocho. 20 Abükyünü gadu chahnü wü akhang pohki langmüshila wüyade, dhrongyengnü David ko anyitsarüti abükyü lahpi rochi ngucho. 21 David-nü hita lümchi rocho, “Tuepü rangmü hila hütsüvi kuthsi tsungti rocho? Abi yo tusü müchah ko Ihnü abi trocho mülih abinü hita jücho ang? 22 Ihnü arüh tsü mütsingsede khüdusü münying mükyüsehkhang, Tsingrangba-nü Ih süsohng!” 23 Khode Abigail-nü David ngucho, abükyünü dhsüdhsa jüropü David jingte mükhukeh 24 abi te yocho, “Adirü, yanglilüm Ite nyieng. Ih mülangjüng. 25 Yanglilüm amükhyu Nabal te tu tünyi. Abi tsü anengchah chokeh ko dsirang, amükyang lile. Adirü, nü dikehrüti rode tsü hütsüla Ih müliko. 26 Nü rorüh chah rühmüyangsohba ko mükyüsehsohba tsü Abüdongbanüe. Ko ade Ihnü Abüdongba nengla nüte yuchümre, hütsünü nüh iichirü apüm Nabal kyo khingchinung. 27 Adirü, yanglilüm Ihnü nü khyang hirojücho jiyü hi khyüchojüng ko nü nyitsarüti khyang jüng. 28 Adirü, yanglilüm Ihnü lango dusü thsameh likhang I khyang mülang pehjüng. Abüdongba-nü nüh yangthsaba kangsohnung ko nü shümtsurü chii, tunüo nüh akangli ayung amütsa tusü münguchinung. 29 Khürünü nüh mah kyüsehnungnye, nyitsarünü thsidi kuthsi nyahcho kyo, Abüdongba nü Tsingrang-nü nüh nyahnung ko khümchonung. Ta nü rorülü, nyitsarünü lung tsayohchüpehcho kyo abinü arüh pehnung. 30 Ko khode Abüdongba-nü abinü nyengchocho kyo atsa apüm nguchi ko nüh Israel la yangthsaba kangsohnang, 31 hütsüde yuzi mülipü nühnü kyüsehcho ko rühyangcho hiri nengdang nühnü kohsha mülümnung. Ko adirü, khode Abüdongba-nü nüh müwajünang, yanglilüm Ih tünbüchü.” 32 David-nü abükyü te yocho, “Abüdongba, Tsingrang sünü chünye nüh I mütohnung rosohcho, abi seing. 33 Chünye Ihnü rühyang kyüseh amünyi shitpahnung lanü nü lümlong atsanü Ih tphahlicho nengdang Tsingrangba seing. 34 Nührü süsohnung lanü Abüdongba-nü Ih tphahliko. Ta Ihnü akang liba Israel Tsingrang nengla yore, nühnü dhsüdhsa ro Ih mümüdohrelang, mütsingsede Nabal nyitsarü apüm sükhangba thsako!” 35 Hütsüpü abükyünü hiroba tsü David-nü khyüchocho ko abükyü te yocho, “Kulang thali wüng ko tu tülümxü. Nühnü khyünyücho kyo Ihnü nguchinung.” 36 Khode Abigail kulang thali wücho, Nabal-lü kuh la yangthsaba kyo thsüti tsu pümcho. Abi müchasehpü lichonü, abükyünü nyangnyü khüu yingcheh abi te tu müyocho. 37 Hütsüpü abi mütsimütsa kangde, abi te lüpcho tsü yocho. Abi anehchonü afü yümsehcho. 38 Nyümong dhüreo lipü Abüdongba-nü Nabal chah xüpcho ko abi sücho. 39 David-nü Nabal sücho yuchi abinü yocho, “Abüdongba seing. Abinü Nabal chah Ih nyüpmüsehcho nengdang rühyangko ko amüthsalang nguchinung lanü abi dikehrü tphahliko. Abüdongba-nü Nabal apu nguchi amütsa mülih khingchicho.” Hütsüpü David-nü Abigail te kukangnung tsingdhingnung müthehcho. 40 Abi kulirünü Karmel lang wü abükyü te yocho, “David-nü nüh nowü abi nitpü thsanung ihrü mütheh lile.” 41 Abigail-nü alih la mükhukehnü yocho, “Ih abi dikehlarü, abi dikehrü jing thsütohnung rungnüm lile.” 42 Abükyünü dhsüdhsa shemüsu abükyü gadu chah küducho. Akulilarü arüh münganü müyang, David kulirüti yola wücho ko abi nitpü kangcho. 43 David-nü Jezrel lanü Ahinoam khyücho ko ade Abigail-sü abi nitpü kangcho. 44 Hütsütade, Saul-nü atsulatpü Mikal, sü David nitpü thsacho, abükyü tsü Gallim yangdila Laish tsurü Palti khyang khyüsohcho. |
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
Bible Society of India