1 SAMUEL 24 - AMÜSA BAIBEL (BSI)

David-nü Saul Akang Mükhyücho

¹ Saul-nü Filistinrü te khatapü thali rode, abi te David-sü Engedi akungaselih la lilepü yocho.

² Saul-nü abi rothsarü yola athrungrü nyüh hajar asang nüpü shuhu Lungrah nyüchürolang David ko abi nyitsarüti yangchi iiwücho.

³ Abinü langjüp san kuh khürü münyeh lungkoh khüdu yang rocho ko hütsüla pehyahnung pümcho.

⁴ Arühnü abi te yocho, “Hi nü nyümonge. Abüdongba-nü nüte Ihnü nü kheh la nü rorüh jünung ko nühnü nü thsanyücho thsanung, pü yoba tsü hi lile.” David-nü rangnü chii chüdu Saul apunü mümüdhepü abi shü chahnü dsi-o xachocho.

⁵ Ta hütsüde David lüm la bhamülingchonü abinü abi nyitsarü te yocho,

⁶ “Ihnü I büdongrü, Tsingrangba-nü throchehcho yangthsaba nyüm amütsa münguchinung Abüdongba-nü yatieng! Ihnü abi chah tu amütsa münguchinung, tunüo abi tsü Abüdongba-nü throchehcho lile!”

⁷ Hütsüta David-nü anyitsarü te Saul mükyüsehnung kihchocho. Saul shemüsucho ko lungkoh pehjüpü tsicho.

⁸ Hütsüde David-nü abi khanglang chüdu abi dsicho, “Nüh Adibong!” Saul-nü ximüla dhingcho ko David-nü alih la abi te jengrengjo mükhukehcho ko yocho,

⁹ “Tuepü nühnü Ihnü nüh kyüsehnung müküprepü yoba nyitsarü yu nyiro?

¹⁰ Ade tsatsa lungkoh la tsü Abüdongba-nü nüh I kheh la jücho. I nyitsarünülü nüh kyüsehnung yocho, ta Ihnü dhsa lümcho ko Ihnü arüh te yocho, tuepü Abüdongba-nü throchehba yangthsarü chah kheh thahnung.

¹¹ Dhing uwa, Ihnü nü shü chahnü dsi-o xasah biba hi dhing. Ihnü nüh kyüsehnung kohcho, ta shü hidu tsehsah khyücho. Hi khu Ihnü nüh nyümnung ko kyüsehnung alümcho mülepü nühnü nyichehnung. Ihnü tu thsameh mülipü nühnü Ih kyüsehnung iichire.

¹² Ihjü sü mülangnang Abüdongba-nü khaang. Nühnü Ih nyümcho nengdang abinü nüh khingchinung, tunüo Ihnülü nü chah tusü müdhsakehjünung.

¹³ Choyoh yu ahi hi nühnü müdhele, ‘Nguchi amütsa tsü amütsarünü du nguchire.’ Hütsünü Ihnülü nüh müdhsakehjünung.

¹⁴ Israel yangthsabanü kyüsehnung müküpba hi dhing! Sü iichiro! Füza asücho khüdu mah-o? Ashüdi khüdu mah-o?

¹⁵ Abüdongba-nü yukhanung ko Ihjü sü mülangnang abinü müdhenung. Abinü khiyu tsü dhingdhing, Ih khüm, ko nütenü Ih khümchoung.”

¹⁶ Khode David-nü chokacho, Saul-nü yocho, “Hi yuje nüh I tsurü David mah-o?” Ko abinü tranung dikehcho.

¹⁷ Hütsüde abinü David te yocho, “Nüh yuje ko Ih mülangko. Ihnü nüte hitoi mütsa bichipü, nühnülü Ite khütang tsa bichiko!

¹⁸ Nühnü Ite tsacho chünye ngusohko, ko Abüdongba-nü Ih nü kheh la jüpü mii nühnü Ih mükyüseh.

¹⁹ Khodelü nyüh khüdunü abi rorüh rangpü müdhsakehjüpü tsisohro? Chünye nühnü Ite tu nguchicho hütsü ngang Abüdongba-nü nüh müwajüng!

²⁰ Israel la nüh yangthsaba kangnung ko nü thsacho pohki yanglih linung Ihnü ade müdheko.

²¹ Ta Ih ko I trah müchangsohnung Abüdongba nengla Ite nyengchoung.”

²² Hütsüta nguchinung David-nü nyengchocho. Hütsüpü Saul yanglang thali wülungcho, ko David ko anyitsarüti arüh rangjilang wücho.