1 SAMUEL 23 - AMÜSA BAIBEL (BSI)

David-nü Keila Yangdi Khümchocho

¹ Filistinrünü Keila yangdi mahpü fürü asi ayohpücho fo hitsikhanglepü David-nü yuchicho.

² Achotsü abinü Abüdongba te tsingdhingcho, “Ihnü wü Filistinrü hi mahnung o?” Abüdongba-nü lalingcho, “Wüng, arüh mahng ko Keila khümchoung.”

³ Ta David te abi nyitsarütinü yocho, “Juda hila mii Ihsa alümxünung lile; khang wü Keila la Filistinrü rothsarü te chitanung tsü alaa amütsau thsanung.”

⁴ Achotsü David-nü Abüdongba te thali tsingdhingcho, ko Abüdongba-nü abi te yocho, “Keila lang tsü wüng, tunüo Ihnü nü kheh la Filistinrü jünung.”

⁵ Achotsü David ko abi nyitsarütinü Keila lang wücho ko Filistinrü mahcho; arühnü arüh khütang kyüsehcho ko arüh kanglungrü khyüjücho. Ko hütsüta yangdi tsü khümchocho.

⁶ Ahimelek tsurü Abiathar tsicheh David yang wüde abinü bebü jengki hiwücho.

⁷ David tsü Keila lang tsicho Saul te yocho ko abinü yocho, “Tsingrangba-nü abi I kheh la jüko. David tsü tbünü tbüticho yangdi ko atbüticho tbükhüm yang wünü apu jangjang dhsürüla züduko.”

⁸ Achotsü Keila mahnü David ko anyitsarü rangnung chita wünung Saul-nü abi rothsarüti dsicho.

⁹ Saul-nü abi mahnung lümchung David-nü yuchi, abinü bebüba Abiathar te yocho, “Bebü jengki hirung.”

¹⁰ Hütsüpü David-nü yocho, “Abüdongba, Israelrü Tsingrang, Saul-nü Keila lang ro, Ih nü dikehrü thsacholanü hütsü changjünungepü Ihnü yuchiko.

¹¹ Keila-rünü Ih Saul khyang jünung mah-o? Yuchicho kyo yuje Saul tsü ronung mah-o? Abüdongba, Israel Tsingrang, Ite laling!” Abüdongba-nü lalingcho, “Saul ronung.”

¹² David-nü thali tsingdhingcho, “Khang Keila-rünü Ih ko I nyitsarüti Saul kheh la jünung mah-o?” Abüdongba-nü lalingcho, “Arühnü jünung.”

¹³ Achotsü David ko abi nyitsarü arüh thsih dhüroh-o tsü, Keila pehjüpü tsicho. Ta David ko abi nyitsarüti Keila pehjüpü rang tsicho Saul-nü yuchide, abinü abi lümchung pehjücho.

David Azong Lih la

¹⁴ David-nü azong lih la Zif shündhün akungaselih khüdula licho. Saul-nü mütozah abi jümcho, ta Tsingrangba-nü abi kheh la David müjücho.

¹⁵ Saul-nü abi kyüsehnung yangchicho David-nü müdhecho. David tsü Zif shündhün Horesh akungaselih la licho.

¹⁶ Jonathan-nü hütsüla wü abi shiro müci mülahsoh ko Tsingrangba atsungtiba alongdi jo,

¹⁷ “tu tüdrü, uwa Saul-nü nüh müdhsakehjüchehnungpü yo rezehsohcho. Israel la nüh yangthsaba thsanung ko Ih nü chitung kangnung abinü dee tsa müdhele.”

¹⁸ Hütsüta anyüh tsü Amüsa anyengchotaba yohpü shangrükhung külüpcho. Hütsüpü David Horesh la licho ko Jonathan kulang thali tsicho.

¹⁹ Nyitsarü khürü Zif lanü Gibea la Saul yang wünü yocho, “kihjinglang Juda akungaselih la, Hakila zong chah Horesh la David rang pümle.

²⁰ Nüh adibong, nühnü abi yangchicho ihrünü müdhele; hütsüeko ihrü lih lang rung ko ihrünü abi nü khyang rangjünung.”

²¹ Saul-nü lalingcho, “Ite hitoi tsacho nengdang Abüdongba-nü nührü müwajüng!

²² Thali wüng ko abi khüde liro ko sünü abi ngucho hütsü alaa tsidsaching. Abi dee arahmütsaepü Ihnü yuchire.

²³ Abi rangba müdümti tsü longi tsüpm ko müchongkhüti Ih yang yusi hirung. Hütsüpü Ih nührü yola wünung ko hütsüla tsü alidu likhang, Juda lih apüm la mii Ihnü abi yangchinung.”

²⁴ Achotsü arühnü Saul müngu Zif lang tsü rocho. David ko abi nyitsarüti tsü Maon akungaselih, Juda kihjinglang akungaselih ngah khüdula liyacho.

²⁵ Saul nyitsarütinü David yangchinung shemüsucho, ta hütsü yuchi David-nü Maon akungaselih la lungrah khüdula rang licho. Khode Saul-nü hütsü yuchicho, abinü David khanglang iiwücho.

²⁶ Saul ko abi nyitsarüti tsü David ko abi nyitsarü pümba azong khüulang tsü pümcho. Arüh tsü arüh bhünüp iiroba Saul ko anyitsarüti tenü dhsüdhsa rangtsicho.

²⁷ Hütsütade yuhirü khüdu ro Saul te yocho, “Zah thali rung! Filistinrünü Ihsa lih mahle.”

²⁸ Achotsü Saul-nü David mü-iiwüpü ximüla Filistinrü te chitanung wücho. Hütsü khu hiba müdüm te Zaba Khang pü tsicho.

²⁹ David-nü hütsü pehjüpü wü Engedi la rang licho.